venerdì 29 gennaio 2016

Anade ( XIX ) n.2 Fevrâr 2016

Periodic-mensîl di informazion e culture sul cont de minorance celtiche
dai Ladins de Furlanie. Edizion par cure de associazion “Union Scritôrs Furlans”

Serracchiani-Telesca: graziis di cûr

Naturalmentri chei di Latisane lu disin par mût di dî

     Ospedâl di Latisane: “E je nassude intant che tal cîl a slusivin i fûcs di artifizi”. Lu conte cjalantle cu la emozion intai vôi il papà Emanule. La sô piçule Camilla e je stade la prime nassude in Friûl tal 2016, juste vincj minût daspò de miezegnot. E je vignude ae lûs tal pont nassite che la Regjon e à decidût di sierâ, naturalmentri par sparagnâ. Destin indât al vignarès di dî!
    Subite daûr no rive a scuindi la sô emozion, e la sô sodisfazion, la mari di Alice, vignude di San Michêl al Taiament a fâ nassi la sô frutine a Latisane daspò la sierade dal pont nassite dal ospedâl di Puart, tal daprûf Venit. Ma no je finide achì parcè che simpri a Latisane aes dôs di gnot al è nassût ancje Tommaso. In fin, simpri tal ospedâl de Basse, aes trê e mieze daspò misdì e je nassude Amelia. In sumis un alc e ce di straordenari: ma nol è dal sigûr bastât co la “biele copie” Serracchiani-Telesca e à decidût che a Latisane nol varà di lâ a nassi plui nissun, lassant par chest cont come pont di riferiment par dute la Basse Furlanie l’ospedâl di Palme.
    Al sarà ricuardât come l’an de mobilitazion. Il passât 2015 al à segnât il pas inte storie dal ospedâl di Latisane. A vincj agns de sô definizion di ospedâl di rêt, cu la prime leç di riforme de sanitât regjonâl, il presidi de Basse ocidentâl si è cjatât al centri di un vivarôs contrast, par rivâ a salvâ cierts servizis dal dipartiment materni infantîl. Di une bande la Regjon, che cu la leç 17 di riordin dal sisteme sanitari e intint taiâ i cussì clamâts “doplons”, o sei chei servizis che, par un aspiet economic, ma ancje di personâl disponibil, no podaressin plui jessi mantignûts su ducj i presidis.
Di chê altre e je rivade, impreteribil, la mobilitazion popolâr, cun in teste il comitât “Nassi a Latisane” che nol à pierdût une ocasion par valorizâ lis ecelencis dal repart, puartant in place la cualitât e la sigurece dai servizis.
     Assembleis publichis e conseis comunâi si son davueltis un pôc dapardut, cussì come ats uficiâi fats bogns dai municipis dai contors di Latisane e mandâts in Regjon. E un continui proponi su la opinion publiche i numars des presincis, e des nassitis, dai doi presidis di Palme e Latisane, cun cjapadis di posizion fuartis che ae fin dal Istât a àn inviâ la reazion dai miedis gjnecologjics di Latisane, che seondâts de direzion gjenerâl de Aziende sanitarie, a smentivin declarazions palesementri inventadis.
   Ma la Regjon e à aromai decidût: Latisane e varà di deventâ il centri des emergjencis-urgjencis, ancje pediatrichis. Dut câs la vastitât dal teritori dulà che al opare l’ospedâl di Latisane, par altri a pôcs chilometris di distance dal centri turistic di Lignan (che d’Istât al po rivâ a une popolazion di dusinte mil abitants), al rint indispensabil che il presidi si specializi ancje su lis emergjencis e su lis urgjencis. Par chest a Latisane al sarà sperimentât il servizi di elisocors noturni, mentri intai spazis dal ospedâl al sarà rindût operatîf un centri pe assistence primarie e la vuardie dal miedi pediatriche e sarà ative siet dîs su siet dilunc la interie de zornade intai mês dal Istât. E reste la pediatrie ambulatoriâl e la aree di emergjence e varà di jessi in grât di frontâ ancje lis emergjencis materni infantîls in totâl sigurece.
   Naturalmentri dutis chestis sigurazions e impromissions ae int di Latisane no bastin, cussì la bataie par salvâ il “pont nassite”, ma ancje altris servizis ritignûts fondamentâi e va indenant. Dut nol po sei rindût a une cuestion di bêçs e di sparagns, co in altris puescj de Regjon, come a Triest, chescj concets no vegnin mai tirâts in bal. No si po vê dut, ma no si po nancje rinunziâ a dut parcè che, in teorie, o vin ducj i stes dirits, che si loghi a For di Sore o pûr a Palaçûl, a Sacîl o pûr a San Pieri al Nadison.
    Intant che o scrivevin chest articul e je vignude fûr une gnove butade sun chest fondamentâl argoment. La president de Regjon Serracchiani e à tirât fûr la propueste, zirade ae Zonte regjonâl dal Venit, di un pussibil acuardi par tignî viert il pont nassite di Latisane (Friûl) se al restarà sierât il pont nassite di Puart (Venit). La rispueste di di là dal Taiament e je rivade imediade, de bande dal stes president de Regjon, Luca Zaia. “O rispietin fint da pît lis sieltis programatichis de Regjon Friûl-V.J., ma o ribatin, come che o vin fat plui voltis, che la Regjon Venit e riten di no podê rinunziâ al pont nassite presint tal ospedâl di Puart”. Pocjis e che si tocjin al vignarès di dî, e fin dal zûc. A chest pont la bataie par “nassi a Latisane” e reste plui che mai vierte parcè che la int no intint molâ, e a Serracchiani-Telesca no ur disin graziis une ostie! (tarvos)




Ladins dal Friûl pag.2 - Fevrâr 2016

DAL TIMÂF A LA LIVENCE
I cincuante agns dal “Moviment Friûl”
Storie di un moviment autonomist che al à disveât il Friûl

     Il “Moviment Friûl” al à 50 agns. Sabide stade 9 di Zenâr al à juste apont fiestezât l’inovâl dal mieç secul di impegn politic tal lûc dulà che ai 9 di Zenâr dal 1966 al nassè pe volontât di une assemblee di ativiscj convocade daspò une rieste di riunions organizadis alì dal Circul de stampe e alì Palas hotel di vie Carducci, vuê Ambassador hotel. E achì i autonomiscj si son tornâts a cjatâ, par ricuardâ lis motivazions e problemis di chê volte, che par tancj aspiet a son presints ancje vuê, come il pericul de pierdite de autonomie regjonâl, la disgregazion dal Friûl storic par colpe des UTI, la creazion de macroregjon dal “Triveneto”, cu la disparizion di fat nestre identitât, la mancjance di volontât politiche tal meti in vore ad in plen lis leçs di tutele de lenghe furlane (LR 29/1997 e LN 482/1999).
    I ultins mês dal 1965 a rapresentin un moment di grande mobilitazion in Friûl pe rivendicazion de Facoltât di Midisine a Udin. Lis manifestazions dai students di Novembar e Dicembar indreçadis a condizionâ il Consei Regjonâl e a blocâ i ats de istituzion e po dal ricognossiment de bande dal Stât de Facoltât di Midisine a Triest no otegnin l’esit sperât. Cundut achel la mobilitazion che si realize si palese come une rivelazion e e segne cence altri un moment significatîf di cjapade di cussience coletive dai interès locâi e di identitât furlane che indi fâsi di supuart.
   Il sfuei mensîl “Int Furlane” (che al veve cjapât la volte ae “Patrie dal Friûl” tal rapresentâ la cjarte stampade par furlan) al sta naturalmentri daûr cun grande partecipazion aes fasis de lote saborant ae mobilitazion, al risvei de cussience dai furlans no dome i zovins, ma ancje i lôr paris, e tal so editoriâl al scrîf: “I Furlans si movin! Vuê si movin i students universitaris; doman si movaran i paris dai students. Si movin finalmentri e si messedin pal lôr interès co i partîts e intai partîts no si fâs e no si à fat il lôr interès. Cheste grande agjitazion che e sei benedete, e simpri laudâts i students che si sbracin pe vere vite dal Friûl. No si trate di sioperâ pe Coree, ni pal Stât Libar di Triest, ni pal Sud Tirôl, ma pal nestri fogolâr, pe nestre culture, pe nestre personalitât. La politiche in cheste facende e je dome chê vere, ven a stâi chê di fâ il ben dal Friûl. Daspò cinccent agns cheste rivoluzion pacifiche, ma secont i dirits di nature e aduncje tremende, e je in viaç”.
    La vicende de Universitât e à rindût inmò plui fuarte la critiche ae classe sorestante furlane ae cuâl “Int Furlane” si jere indreçade plui voltis riclamantle ae unitât, almancul inte maiorance, par podê rivâ a vinci lis resistencis triestinis. L’obietîf de Universitât al è sintût in fats come determinant pe rinassince complessive dal Friûl, istituint un leam diret tra cheste istituzion (colegade a un slargjament plui gjenerâl de istruzion) e la jessude dal sot svilup economic. La delusion e la sfiducie intai politics, zontade ae cussience des pussibilitâts daviertis de mobilitazion popolâr, a puartin aduncje un pôcs tra i plui rapresentatîfs aderents di “Int Furlane” a colegâsi a chês fuarcis che si stavin batint pe Universitât a Udin. Al ven cussì decidût di dâ vite a un moviment di opinion, il “Moviment Friûl”, che si costituìs uficialmentri ai 9 di Zenâr dal 1966. La rivendicazion de Universitât a Udin e divente in sumis il pont di agregazion par un moviment, che, si definìs “apartitic” e si propon come smire “la tutele a ducj i livei e in ducj i setôrs dai interès dal Friûl”. Lis components che si cjatin adun ator di chescj obietîfs a son di divierse formazion culturâl e professionâl e variementri organizadis: il grup dai students furlans, organizât dai circui universitaris, un pôcs di miedis cun a cjâf il professôr Cecotto, un pôcs di insegnants e libars professioniscj, plui di cualchi predi come pre Pieri Londar e Pre Checo Placerean.
   Su lis pagjinis di “Int Furlane” la nassite dal gnûf moviment e je anunziade cun grant vivôr e cun cetantis sperancis: “Al è nassût il Moviment Friûl tiere, tiere furlane, scolte cidine la vôs che e ven sù dai secui e des lagrimis dai vons. Il Moviment Friûl al à la uniche intenzion e braure di puartâti come un anel tal dêt. “Int Furlane” che cun tancj altris furlans di buine volontât, e à suspirât e lavorât cence padin e cence sflandorosis visions di glorie pal ben dal Friûl, vuê si sint dabon travanade di gjonde. Il Friûl si alce in pîts par mert dal Moviment Friûl. “Int Furlane” si indalegre di chest fat, e e fas auguris, e da la peraule di continuâ a lavorâ spale a spale cul Moviment Friûl pal ben dal Friûl”.
   Da une analisi des components che a dan vite al Moviment Friûl, e dai obietîf prioritaris ai cuâi si smire, al risulte evident che il grup di fondazion, pûr proponintsi di realizâ un rapuart organic cuntune plui slargjade base popolâr par dai cussience dai propis dirits, al propon dut câs une rieste di tematichis e rivendicazions, inte cui elaborazion e selezion al cjape la volte, almancul tal in prin, il teme de Universitât. Vadì che e je chê la rivendicazion “di riclam” ator ae cuâl il moviment si ricognòs e al môf i siei prins pas. Agregantsi su cheste “bataie” il moviment al rive par altri a slargjâ la riflession componint valutazions e istancis plui gjenerâls, determinât a rapresentâ “a ducj i livei e in ducj i setôrs il Friûl”.
   Il Moviment Friûl, secont “Int Furlane”, al rapresente il strument politic adat a dâ rispuestis a chês problematichis che il gjornâl al va di timp sotliniât, lant daûr doi filons che si incrosin: la incapacitât dai partîts “talians” di fâsi interpretis des istancis furlanis e la necessitât di une buine aministrazion, fate di oms plui che di ideologjiis e programs complessîfs. Cussì secont “Int Furlane”: “Il Moviment Friûl al varès di jessi un superament dai partîts intes cjossis aministrativis di cjase nestre, come che si brame che la union de Europe e sei un superament dai nazionalisims. Un Moviment Friûl fat di bravis personis di buinis intenzions, di ideis e credos ognun par so cont, ma dulà che ducj si metin adun dome par fâ, a lôr spesis, un fregul di ben al Friûl”.
In conclusion o podin ben dî chê tra il 1965 e i prins mês dal 1966 si à vude une grande stagjon di libertât, di democrazie popolâr, di voie di scombati e di brame di autonomie pal nestri Friûl. Oms, ideis, aspirazions che no rivarìn mai a dismenteâ. Podaraial mai tornâ inmò un timp cussì?
(renzo balzan)




Ladins dal Friûl pag.3 – Fevrâr 2016 

CRONICHIS DI CHENTI
CoopCa: nus reste dome di vaî
La fin de viere Cooperative e à lassât un grant vueit in Cjargne

Tumieç – Al vai il cûr. La CoopCa e je stade sierade in maniere definitive, no esist plui. Al vai il cûr soredut e denant di dut pai socis che a vevin prestâts i bêçs e pai dipendents, i prins parcè che a scugnaran gloti dai cuintri colps pesants dome par vê dade fiducie a cui che al aministrave i lôr bêçs, cussì come che a vevin fat dilunc la storie de CoopCa i socis di prime. I seconts, une buine mitât di lôr, si cjataran inte situazion di scugnî cjatâ un gnûf lavôr, cu la sperance che cui che al à il dovê istituzionâl ur dedi lôr une man.
   Al vai il cûr, parcè che la storie de CoopCa intindude no come une aziende, ma come un insiemit di feminis e di oms, e je rivade insom, e cun jê e je rivade insom la storie di miârs di personis di vuê, socis e lavoradôrs. La CoopCa e je stade, magari cussì no, stravuelte cun dams che inmò no si riviju a calcolâ.
   La Cooperative Cjargnele di Consum e nassè tal 1907, cun Riccardo Spinotti e Vittorio Cella come president e come diretôr. Tal stes an e vierzè la buteghe di Tumieç e daûr altris cinc sparniçadis inte mont dal Friûl. I socis a jerin 556, soredut socialiscj o ben dongje a chestis ideis, co la idee di fonde e jere chê dal socialisim riformist. Chestis personis e chês che a vignirin daûr a derin vite ae plui grande realtât de Cooperazion di consum furlane ae cuâl si zontà ancje chê dal credit, secont il sisteme che i dipuesits dai socis a fasevin di capitâl par podê slargjâ la ret comerciâl, par comprâ a presis plui convenients i prodots, par permeti a cui che nol veve bêçs par paiâ daurman di podê “segnâ sul libret” ce che al comprave, paiant po ae fin dal an o al rientri des rimessis dai emigrants. La CoopCa e rapresentave la sigurece sevi par cui che al partive sevi par cui che al restave. Nancje la prime Vuere Grande e rivà a sdrumâ la Cooperative, profughe ancje jê (a Bologne) come miârs e miârs di furlans.
   Tornâts a Tumieç ae fin de vuere, i aministradôrs a forin bogns no dome di tornâ a
vierzi lis vieris buteghis, ma fintremai di aumentâ il lôr numar. Dopo vê dade la adesion (a sorprese) ae federazion fassiste des cooperativis, la CoopCa e frontà lis duris vicendis de seconde Vuere grande e e jentrà a fâ part de prime esperience di democrazie daûr vincj agns di ditature: chê de Republiche Libare de Cjargne.
   La svolte e fo chê dai agns ’80 e de fin dal secul XX, deventant da cooperative cun finalitâts di solidarietât a une entitât divierse, une societât che investive in ativitâts imobiliârs, in cetris comerciâi, tal slargjament dai ponts di vendite, ancje viers la Basse Furlanie e fûr de Regjon viers il Venit. Al semeave di intuî une jentrade tal marcjât de libare concorince e pe ricercje dal profit a discapit de premessis ideâls, forsit ideologjichis tal sens miôr dal tiermin, che a vevin juste apont puartât indenant i fondadôrs.
   Al vai il cûr parcè che al ven a mancjâ un pont fêr de economie de montagne e no dome pe Cjargne, un servizi par cui che al resist inte economie dai paîs o par cui che al è anziant e cence jutoris di sorte. Magari cussì no pôc o nuie si podarà fâ. O speri che e esisti inmò la cussience dal patrimoni storic e culturâl che l’archivi e i archivis de CoopCa a rapresentin. O speri che lis istituzions culturâls e politichis no permetin che al vadi dispierdût dut chest patrimoni, magari proponint al Archivi di Stât di Udin di cuistâ il materiâl. Miôr al sarès impen che al podès jentrâ a fâ part de Biblioteche-Archivi Gortani, custodide a Tumieç.
   Une prionte di contribût e varès di consisti tal studi de bande dai inteletuâi dal moviment cooperativistic de nestre Regjon, di cheste straordenarie esperience democratiche, oltri che economiche nassude dal bas. Un alc pardabon di fûr dal comun par chei timps. Dome cussì o podarìn fâ in mût che no vegnin dispierdude la ereditât di miârs di feminis e oms che a àn crodût intun mont miôr, e plui just. (zuancarli l. martina)




CoopCa: buinis gnovis pai socis prestadôrs

Damâr – Il prometût, e tant spietât anunci al è in fin rivât ai 9 di Zenâr stât. L’at di liberalitât decidût a so timp de bande di Coop Nordest – ma po fat propi da Coop Alleanza 3, la holding nassude di resint de aleance tra la stesse Coop Nordest, Coop Adriatica e Coop Estense – al è stât confermât cuntun comunicât uficiâl. Al sarà cussì rifondût, in trê ratis (la prime dentri il mês di Avrîl cu ven) , circje il 50 par cent (13,5 milions di euros) des sumis depositade dai socis prestadôrs di CoopCa (27 milions di euros).
   La sume di 13,5 milions cemût che al è stabilît fint dal inizi, e sarà rindude disponibil da Coop Alleanza 3 in trê ratis: “Pal 2016 dentri il mês di Avrîl cu ven , cuntun impuart pari a 6 milions di euros; tal 2017 a vignaran tornâts 4 milions di euros; la operazion si sierarà po inte Vierte dal 2018 pai restant 3,5 milions di euros”. Alc al è alc e nuie nol è nuie al vignarès di dî.
   Par chel che al inten po la situazion de vendite dai negozis e supermarcjâts, a spietin inmò un compradôr 11 ponts vendite, pai cuâi il judiç licuidadôr, Paola Cella, al podarès decidi di bandî une gnove aste. Oltri a chest in pîts al reste il probleme dal magazen di Damâr: par cumò al semee che e sedi stade fate une ufierte de bande aziende todescje Aldì. (mdp)




Ladins dal Friûl pag.4 – Fevrâr 2016

DOCUMENTS
Friûl plui autonom e Triest par cont so
Propuestis par un gnûf model istituzionâl de nestre Regjon

   Che lis iniziativis dal senatôr triestin Francesco Russo pro Triest Citât metropolitane a puedin creâ ancje un ciert malstâ tal so partît (il Partît Democratic n.d.r.) in Consei regjonâl al è comprensibil. Soredut in cui che al è seriementri preocupât pe minacis nazionâls ae specialitât regjonâl. Ma no si po dal sigûr da tuart a un parlamentâr triestin di fâ il so mistîr. Ce che par altri al convinç di mancul al è il fat che il Consei regjonâl e altris istituzions a vebin vude une reazion scuasit di sconzûr sun chest probleme invezit di frontâlu e dibatilu. Al ven suspietâ che il probleme nol sedi tant Triest citât metropolitane ma ce indi vignarès di conseguence vadì, come che justementri al fâs presint Zuanfranc D’Aronco riclamant Sergio Cecotti, une ristruturazion de Regjon su dôs grandis centis funzionâls e istituzionâls: Triest e il Friûl. No dome il president de Provincie di Udin ma ancje numerôs circui autonomiscj e furlaniscj (oltri che triestins) a àn di timp in ca assimilade la idee associantle a une gnove, plui clare e funzionâl definizion de Regjon Friûl Vignesie Julie: di une bande, juste apont, Triest Citât metropolitane e, di chê altre, une, clamìnle par cumò “Provincie” autonome dal Friûl. No je, aduncje, une cjosse gnove. Si indi fevele di timp in ca. Il moment al po jessi o no jessi favorevul ma si trate di une propueste serie, di stazâ e su la cuâl misurâsi.
      Dal sigûr a ’nd è des condizions che a laressin denant trat stabilidis: che si discuti sì di Triest Citât metropolitane ma, dutun in chel, che si discuti purpûr di chest gnûf Friûl, intindût, o propon jo, come federazion di teritoris (e achì la stampe locâl e à dal sigûr une funzion fondamentâl): il Friûl, in prionte, intindût come furlans (popul furlan) e no dome come istituzions, che nol stedi sul barcon e cjalâ ma che al partecipi a chest confront cuntune propie propueste metude al stes livel des ambizions e des prospetivis di Triest Citât metropolitane.
     Par scomençâ a discuti, o ai di dî intant che, se lis resons dal sì a son dutis di meti inmò a fûc, lis resons dal no mi semein cetant debulis: Triest Citât metropolitane (ma, che si vebi di lei, un diviers asset de Regjon) e sarès une sielte cuintri il policentrisim regjonâl des Uti (Unions Teritoriâls Intercomunâls n.d.r.) e e zovarès ae contraposizion (o ae cooperazion) tra Triest e il rest dal teritori regjonâl.
   A son argoments debui in prin lûc parcè che al è assoludementri vêr che une Regjon articolade intune citât metropolitane fuarte e in altris 17 Uti e sarès scuilibrade e no acetabil. Triest e cuistarès gnovis competencis a difarence dal rest dal teritori che al restarès incjadenât al model Uti. Il “policentrisim” des Uti (ametût che si vegni a cjâf dai berdeis al esam denant dal Tar inmò in at) al vignarès cussì a rapresentâ l’atuâl ecuilibri inte gjestion dal teritori regjonâl. Ma lis Uti, cemût che o ai vût mût di scrivi, cence podês e finanziaments vêrs, a son dome un tentatîf di riorganizazion, in aree plui slargjade, di servizis che bielzà a esistin. A davuelzin, ven a stâi, compits gjestionâi e no di svilup. Cubiâ Triest Citât metropolitane di une bande e Uti di chê altre e sarès une ofese rude pal rest dal teritori regjonâl. Al deventarès partant inevitabil sevi pensâ a un infuarciment istituzionâl dal restant teritori regjonâl sevi a ripensâ completementri la funzion de Regjon che e varès ocupâsi mancul di teritori e plui di grandis strategjiis e di internazionalizazion. No esistin dubis, partant, che Triest Citât metropolitane e intizie un efiet a cjadene che al oblee, in ultime analisi, propi la Regjon a rinovâ di plante fûr se stesse. Al è di chest, aduncje, che si sta verementri dibatint.

     In secont lûc Triest Citât metropolitane di une bande e un gnûf Friûl di chê altre, no saressin, in prionte, par nuie cuintri la cooperazion infraregjonâl e ancje interregjonâl. Il retôr de Universitât di Udin Alberto De Toni intune interviste al semee vualmâ chest riscjio. Ma o vorès sigurâlu. Il puart regjon di lui stes riclamât inte interviste, al è un concet, strategjic e tecnic insiemit, creât e elaborât intun resint libri curât di cui che al scrîf parie a Maurizio Maresca (“Fvg-Europa: ultima chiamata. Un Porto-Regione tra Mediterraneo e Centro Europa”. Forum, Udine, 2014) che si base sul meti al lavôr, intun slargjât procès di cooperazion economic-teritoriâl, dutis lis economiis dal teritori ma ancje lis istituzions di chês plui locâls fint al livel european, superant necessariementri, ma cence pensâ di eliminâju, confins e podês aministratîfs comunâi, provinciâi, regjonâi e ancje nazionâi. Il puart regjonâl al è, aduncje, se mai, propi un grant esempli di federazion teritoriâl che e domande fuarts procès di cooperazion tra ents e istituzions diviersis ma fuartementri autonomis e une vore validis dal pont di viste strategjic e operatîf.
     O crôt , in fin, che il Friûl nol vebi di vê pôre di Triest Citât metropolitane ancje par resons plui profondis. Il “model Friûl” nassût de ricostruzion – che si larà a celebrâ in chest 2016 ae ocasion dal inovâl dal cuarantesim dal taramot -, al è un grant model di sussidiarietât dal teritori (verticâl e orizontâl), di vision strategjiche, di autonomie operative e partecipazion dal bas. Magari cussì no, chel model, cemût che o sosten di timp in ca e che, o documentarai intun libri che o stoi scrivint, al è, di agns in ca, in fuarte crisi. Une prime cjosse di fâ pal cuarantesim al è, aduncje, chel di tornâ a studiâlu par rilançâlu e no fuscâlu inmò di plui. Un Friûl che al recuperi chel spirt e chês fondis concetuâls e operativis nol po sintîsi menaçât di Triest Citât metropolitane, ma se mai, saborât inte sô funzion uniche e storichementri fondade, di salvaguardie e promozion di diviersitât, autonomie, identitât e capacitâts locâls di fâ e di cooperâ. Al Friûl, partant, tal segn de specialitât regjonâl ma ancje di chel so model di tornâ a rigenerâ, il compit di prospetâ une plui slargjade sintesi strategjiche tal dibatiment che al è daûr a davuelzisi. (alessandro fabbro - professôr associât di tecniche e planificazion urbanistiche alì de Universitât di Udin – test tirât fûr dal “Messaggero Veneto” dai 24 Setembar 2015 e voltât par cure de redazion)




Ladins dal Friûl pag.5 – Fevrâr 2016

JOSEF MARCHET: I GRANCJ OMS DAL FRIÛL
Zuan Candido: autôr dai “Commentarii Aquileienses”
E protagonist disfortunât des vicendis dai Çambarlans e Strumîrs

   Ben pôc nus riferissin i vieris racueidôrs di memoriis biografichis sul cont dal storic Zuan Candido: forsit parcè che la sô no fo une esistence movimentade, ni ricje di vicendis di cui sa ce grande impuartance.
   La nobil famee dai Siôrs di Luserià (daprûf Tresesin), ae cuâl al apartignive il Candido, e jere inmò siore tal secul XV; ma il domini venezian al stave butant jù i prejudizis aristocratics che a vevin tignude lontane la nobiltât des comuns professions e dai studis. Zuan, fi di Nucolau Candido, nassût a Udin inte mitât dal Cuatricent, al fo cussì mandât a scuele: prime inte citât di nassince, dulà che a chel timp a jerin maestris celebrâts il venezian Sabellico e il vicentin Quinto Emiliano Cimbriaco; po al studi (universitât) di Padue, dulà che al cuistà la lauree in utroque jure: e dut chest al nestri Zuan dal sigûr no i disconvignive.
   Tornât in Friûl viers il 1475, si dedicà ae profession di nodâr, e il contemporani Belloni nus sigure che lu fasè cuntune buine riessude: dal rest no vin altris testemoneancis di cheste sô ativitât, che al davuelzè fint al prin deceni dal secul daspò. Al è di scrupulâ che dilunc dute cheste dade di timp che al varà scomençât a passionâsi aes vicendis storichis de nestre Patrie e a racueilis, intai archivis publics che l’esercizi de profession i dave la pussibilitât di consultâ, tirant fûr cussì dâts, informazions, cronichis e acjadiments di prime impuartance. Ma po prime che di chest materiâl al pensàs di zovâsi par un lavôr di sintesi, a vignirin a discjolilu, pal tant che al semee, vicendis di altri gjenar.
   Za intai ultins agns dal secul XV si lave palesant in Friûl e soredut a Udin chê division politiche-sociâl, tra la viere aristocrazie feudâl, che il domini venezian al stave metint de bande, e la borghesie citadine cun a cjâf i nobii Savorgnans, che e je ben cognossude dai storics sot il non des dôs fazions dai Strumîrs e dai Çambarlans. Il fat che il partît dai Çambarlans al ves a cjâf i Savorgnans, al à puartât a pensâ che in dute cheste vicende Vignesie e ves, in fonts, plui di cualchi interès: naturalmentri in favôr dal partît borghês e pal tramit dai Savorgnans. Dut chest al fâs crodi che il Zuan Candido, come un so parint Zuanbatiste, al vebi dade la sô adesion al partît dai Strumîrs. Il contrast par cualchi an di manifestà dome in piçulis barufis di place, ma po al sclopà in dute la sô violence sul scomençâ dal an 1511, intant de vuere tra l’Imperadôr todesc e Vignesie: i nobii di part Strumire nol jere un segret che a jerin partesans dal Imperadôr Massimilian.
    Cussì, ai 27 di Fevrâr dal 1511, zornade di joibe grasse, une sdrume di contadins si derin adun a Udin sapontâts dai soldâts al solt dai Savorgnans, par po discjadenâsi in brusariis di palaçs e macilis di nobii Strumîrs. Antoni Belloni al conte che in chel grant batibui il Candido al corè un grâf pericul: insiemit cuntun pôcs di partesans strumîrs dal Colorêt al tentà di oponisi a la int aromai indiaulade ma a forin savoltâts e a scugnirin cori a parâsi intes lôr cjasis. Zuan Candido al rivà a salvâsi scjampant a platâsi sul cjampanili dal domo. E alì al scugnì restâ fintremai che, il prin di Març, a cjossis fatis, Vignesie intervignì e il lutignint al fasè parâ fûr de citât la ribaldarie dai scalmanâts. Dut câs no si ritignì inmò al sigûr e al ve miei par cualchi timp lâ a parâsi a Cividât. Nol è il câs achì di lâ dilunc a contâ dai particolârs sanganôs di chê vicende ni des conseguencis de vuere, che e continuâ a lâ dilunc fintremai tal mês di Otubar dal 1516.

    Daspò di chescj fats il Candido si metè a ordenâ lis memoriis storichis che al veve racueltis e a scomençâ a meti jù i “Commentarii Aquileienses”; il prin tentatîf di esposizion fate in maniere metodiche des vicendis dal Friûl. Al semee che, oltri a zovâsi des notiziis di lui racueltis, al sedi ricorût, par integrâ lis sôs informazions, di un pôcs dai siei savints amîs, tant che Jacopo di Purcie, Pieri Passarino e altris, che i varessin furnît gnûf materiâl; e che, puartât insom il lavôr, no lu volès plui publicâ, vint pôre di disfigurâ cul so latin di nodâr masse lontan de classiche purece e elegance che aromai la culture umanistiche e pratindeve. In fin si decidè pe publicazion daûr lis insistencis di altris amîs, tra i cuai dal sigûr il nodâr Belloni; ma prime al volè fâ sotponi il test, par otignî lis mendis che a coventavin, a Giambattista Egnazio, professôr di letaris a Vignesie; e, no inmò content, al preà il Belloni di fâlu riviodi ancje da Gregorio Amanseo. Chest al fasè un pôc il dificil ma po, cjapât in man il lavôr, no content di ritocjâlu o, forsit, di rifondi il test sul cont de lenghe, al volè meti dentri ancje dal so tal contignût come, par esempli, des grandis lauts pai siei basavons. Il Candido, in fin, al publicà i “Commentarii” tal 1521, alì de stamparie di Alessandro de’Bindoni di Vignesie, ma nol fasè nissune menzon des colaborazions che al veve vudis, anzit al lassà fûr cence rivuart lis zontis metudis jù dal Amanseo, che cussì se ve cetant par mâl.
    Al covente dit che chel libri, tal ambizionôs latin coret di ben trê savint, nol resist vuê ae critiche plui benevul? Cundut achel, par chel che al inten i acjadiments plui dacîs dal autôr, al è inmò une font preseose; e di chê altre bande nol va dismenteât che si trate dal prin saç di sintesi di une materie une vore imberdeade e plene di incompletecis. I contemporanis, in gjenar, lu presein pe sô obietivitât. Il so esempli al ve darest dai imitadôrs, come il cividalês Marc Antoni Niocoletti (1536-1596), che al scrivè la vite di dodis patriarcjis di Aquilee e di altris oms ilustris. Po il za vût iniment Belloni, Indrì Palladio, Fabi Quintilian Ermacora, prin storic de Cjargne, Jacopo Valvason di Manià e altris inmò.
    Zuan Candido al vivè fintremai ai 20 di Lui dal 1528.
(Josef Marchet – test tirât fûr da “Il Friuli: uomini e tempi”, - ridot e voltât par cure de redazion)

Friûl: un popul, une tiere, une lenghe!




Ladins dal Friûl pag.6 – Fevrâr 2016 

DAI FATS E DE CULTURE
DES TIERIS LADINIS

Lis tradizions intes valadis ladinis dolomitanis

Publicât un fondamentâl atlant etnografic in cinc volums

San Martin de Tor / St. Martin in Thurn (Bz) – Di resint, par cure dal Istitût Ladin “Micurà de Rü” di San Martin de Tor in Val Badie, e je vignude fûr une opare fondamentâl in cinc volums “Tradizioni nelle vallate ladine dolomitiche”, curade dal ricercjadôr Alessandro Norsa.
     La ricercje e je pratichementri dedicade a ogni mês dal an intai comuns de Ladinie Dolomitane, partintint tal prin volum cui mês di Novembar e di Dicembar, dal sigûr tra i plui interessants dal pont di viste dai acjadiments folclorics. Cundut achel il lavôr al è struturât in dôs parts fondamentâls: 1) une ricercje sistematiche sui dâts za cjolt sù dai autôrs che si son ocupâts des ricercjis sul cjamp e che a àn dât i lôr lavôrs aes stampis, partint de bibliografie plui resinte e po lant indaûr fint ai prins documents publicâts. Culì in cierts câs a son stâts analizâts ancje dâts di archivi; 2) il completament e il recupar di chês notiziis che a mancjavin intai lavôrs realizâts denant trat, cu la testemoneance di une rêt di informadôrs mediant la ativazion dai Istitûts Etnografics, lis Associazions Culturâls, i Museus e lis Bibliotechis presintis sul teritori.
     L’implant utilizât par organizâ il lavôr al è stât chel che normalmentri al ven doprât pe racolte dai acjadiments che a colin tal calendari dilunc l’an, come par esempli: Cja dal an, Pifanie, Carnevâl, Domenie Ulive, setemane di Pasche Maiôr, Pasche des Rosis, Corpus Domini, solstizi dal Istât, fiestis dedicadis ae Madone, i Sants, San Nicolau, Sante Luzie, Nadâl, gnots di Nadâl e Pasche Tafanie. A son stadis individuadis in zonte tradizions particolârs no presints in ducj i lûcs come par esempli il rituâl dal trai lis cidulis infogadis, o pûr altris fiestis o tradizions locâls particolârs.
    Par chest cont al jere stât prontât un cuestionari par une interviste a domandis viertis che e permetès di racuei in maniere sistematiche lis informazions sul cont des diviersis fiestis di glesie e profanis. Dut câs in rivuart aes specifichis tradizions di valade, l’autôr si è zovât purpûr di publicazions locâls particolarmentri significativis, come par esempli il test di Simon De Giulio, “Usanzes e lurgeres da zacan” pe Val di Fasse, che a son stadis utlizadis par impostâ i cuestionaris specifics di ogni valade .
In merit aes tradizions di glesie, al è stât tignût cont par ogni fieste ce che si diferenzie de ordenarie celebrazion e che partant al à segnât il pas pe descrizion efetive des tradizions locâls. Incrosant i cuestionaris gjenerâi e chei specifics di valade al è stât po predisponût un cuestionari definitîf a domandis a rispueste sierade par atestâ la presince de tradizion e a domandis viertis par dâ spazi al aprofondiment, proponût inte midiesime forme e cu la midiesime sucession a ogni informadôr des 29 parochiis (cjapadis dentri in 19 comuns) esaminadis.
    Intai timps e ritmis il studis al è stât cussì dividût: trê agns di ricercje ative sul cjamp par un totâl di 19 comuns esaminâts, e partant une medie di 7 comuns ogni an, a ognidun dai cuai a son stadis dedicadis cuatri zornadis in lûc. Ogni interviste e je stade po regjistrade cuntun regjistradôr digjitâl Sony ICD-P630. La ricercje tal so complès si divît in dôs parts: un test descritîf che al sotlinie par ogni acjadiment calendariâl, une esposizion storiche e la sô gjenesi, l’eventuâl presentazion in lûc di testemoneancis artistichis, i rituâi sacris e profans, lis sagris o i marcjâts; e une rieste di cjartis che a traviers dai simbui a metin in evidence la presince sul teritori dai elements vûts iniment denant trat.

    Di impuartance primarie, come che si à vût iniment, la “Bibliografie” par realizâ cheste opare. Prin argoment, darest, a une fondamentâl leterature locâl essenziâl pal completament dai dâts racuelts sul teritori. Sul argoment in fats al esist tal teritori une biele rieste di dâts in publicazions locâls, un pocjis des cuâl tratadis in maniere sistematiche, come par esempli il volum “Momenti di vita” di Marco Forni (2007), publicât dal Istitût Ladin Micurà de Rü, dulà che il timp dal an e je une part di un lavôr plui complès di caratar gjenerâl, e chel dal Istitût Culturâl Ladin Majon de Fascegn di Simon De Giulio (1983) specific pe Vâl di Fasse. A ’nd è po dai lavôrs che, pûr cjapant dentri une cierte documentazion, a fasin cont soredut sul aspiet emotîf dal ricuart, come chel dal titul “I giorni, la vita in Ampezzo nei tempi andati”, di Amelia Menardi Illing.
     Par vie dal fenomen de modificazion de economie, cetantis tradizions a àn vût un lent, impreteribil discjadiment, ma par fortune cierts autôrs a àn in maniere diligjente fermade la memorie dal timp, come l’ampezan Silvestro Arduino De Franceschi che intai agns tra il 1894 e il 1897 al scrivè un librut dal titul “La Valle di Ampezzo” il cui manoscrit, no inmò publicât ad in plen, si cjate custodît tal archivi de Ra Ciasa de ra Regoles” di Cortina. Ancje se di pocjis pagjinis un altri interessant document (inmò di publicâ) relatîf ae tradizions de La Plì de Fodom al è chel di Riccardo Gabrielli dulà che l’autôr al à ritrat un pocjis des usancis presints une volte in chê val. Par chel che al inten la Val Gardene, invezit, il sindic di Urtijëi di chê volte Franz Moroder al de aes stampis tal 1891 il libri “Das Grönden Tal” dulà che si cjate dedicadis uns dîs pagjinis ae descrizion des usancis locâls za in chê volte in discjadìnce. E bisugne inmò ricuardâ il sfuarç di ducj chei che tal timp si son impegnâts a furnî cualchi scaie dai lôr ricuarts publicâts su lis rivistis, come la riviste di identitât etniche “Nos ladins” che e cjapà vite tal 1949, il sfuei che al ven publicât inmo in dì di vuê “La Usc di Ladins” e ducj i preseôs contribûts dâts aes stampis intai diviers boletins parochiâi.
   In sumis, cemût che o vin vût mût di sotliniâ, une opare fondamentâl di consultazion par ducj chei che a vuelin cognossi plui a fonts la realtât de Ladine Dolomitane, la sô vite plui sclete, la storie, lis sôs tradizions, che par plui aspiets a cjatin dai parêi significants ancje cul nestri Friûl. (edelweiß)




,Ladins dal Friûl pag.7 - Fevrâr 2016

INTAI PRÂTS DE CULTURE FURLANE
Biagio Marin: poete locâl, poete globâl
A son colâts i trente agns dal inovâl de muart dal cjantôr di Grau

Grau – Ai 24 di Dicembar stât a son colâts i trente agns che al è muart Biagio Marin, cjantôr di Grau, poete che al doprave une lenghe locâl, ma di contignûts e di valence dal sigûr globâl. Marin, insegnant, bibliotecari, poete, al è nassût a Grau tal 1891. Al studià a Gurize, Viene, Florence e Rome dulà che si laureà cun G. Gentile. Bon prosadôr par talian, al à componût, tal dialet di Grau, viers splendits di savôr maluseriôs. Spirt estrôs, non si tirà mai indaûr sul cont des polemichis, ancje mastinis, cun aversaris vêrs o presumûts. Al à vût il Premi Moretti d’aur di poesie tal 1968, il Premi Pifanie tal 1975. Al fo candidât al Nobel pe leterature, su iniziative di Gianfranco D’Aronco.
Sul cont di chest personaç, che al à dât lustri e innomine ae nestre leterature regjonâl, o publichìn culì sot vie un ricuart di Paolo Medeossi. Il test za publicât sul “Messaggero Veneto” dai 24 di Dicembar stât, al è stât voltât par furlan par cure de nestre redazion. (red.)

Cavo de nembo”, cjâf di temporâl, lu clamave tal dialet gradesan la sô cetant amade none Tonia che i veve fat di mari daspò che, di frut, al jere restât vuarfin. Un caratar burascjôs, imprevedibil lu compagnà dilunc une esistence incuiete, vivarose, cemût che e pant di lui la biografe Edda Serra, che e zonte: al è vivût intune condizion di inamorament seguitîf. Aspiets che a contrastin cul piçul mont antîc deventât il palc di sene di une vicende significative e decisive pe culture dal Nûfcent in chest blec di Italie sospindût su problemis sociâi e politics che dispès a fasin fadie a comprendi chei che a rivin chenti di altris zonis.
Biagio Marin, il poete di Grau, l’autôr de “I canti dell’isola”, il polemist, l’anticlericâl laic sostignût di une ferbinte fede religjose, l’amì di Prezzolini, di Pasolini e di ducj i protagoniscj a traviers i cuai e je nassude la grande leterature regjonâl, al à segnât une ete come pôcs altris e par chest al è necessari e just ricuardâlu vuê, 24 di Dicembar, vee di Nadâl, a trente agns che al è vignût a mancjâ, avignude tal 1985, cuant che aes dôs di buinore il so respîr di vieli di novantecuatri agns si distudà par simpri, lant a confondisi cun chel mâr sot i barcons de cjasute dulà che al jere tornât a logâ tal 1969, ae fin dal so timp plui biel, passât Triest.
Il mont poetic di Marin al è dutun in chel avuâl al mont za cussì poetic di Grau. A pensâju insiemit no si diferenziin, tant la pagjine e traspâr inte realtât”, al disè Pier Paolo Pasolini che al amì, a traviers une fisse corispondence, al confidave i pinsîrs plui scuindûts: “Se al fos par me, o fasarès la vite di Dino Campana”. E Marin, cu la ande dal fradi plui grant, al conseave prudence: “Sta atent, dal sigûr ti spietin a cualchi varc. A zirin storiutis straneosis sul to cont, e dutis che a smirin a disfamâti. Sta atent Pier Paolo”.
Cundut achel la vicende di Marin e fo compagnade di ecezionâi incuintris e amistâts, dantji ancje par chest un puest centrâl inte storie de leterature di confin. Funzion inspietade par chel fantat sveât, incjantât dal atrat feminîl, nassût tal mês di Jugn dal 1891, fi di Antonio Marin, gjestôr a Grau de ostarie “Tre Corone”, il che i garantive un pôc di benstâ rispiet ae miserie dai pescjadôrs. Par cheste reson, Biagio al podè studiâ alì dal innomenât Staatsgymnasium di Gurize, dulà che la sô formazion e fasè pas une vore impuartants co al podè jentrâ in contat cun personaçs che si cjatin intai romançs di Claudio Magris, come Enrico Mreule, Ervino Pocar, Nino Paternolli, che i fevelarin di Carlo Michelstaedter. Amistâts slargjadis po a Florence dulà che i talians residents in teritori austriac a podevin restâ a studiâ par un an. Su lis rivis dal Arno, Marin al cognossè i poetis e i scritôrs dal grup “La Voce” e i inteletuâi iredentiscj. Tal mês di Dicembar dal 1911, inte tratorie dai students, graziis a Gianni Stuparich al jentrà in confidence cuntun zovin alt, dai bafs biots, Scipio Slataper. Chest ultin e il “vociano” Giuseppe Prezzolini a deventarin i amîs plui sancîrs dal fantat di Grau che po si trasferì a Viene par lâ indenant cui studis, arlêf dal glotolic Carlo Battisti che lu inviulâ a scrivi par dialet. Il 1912 al fo un an ecezionâl sul cont dai esordis: in pôcs mês a vignirin publicâts “Il mio Carso”, di Slataper, la raccolte “Con i miei occhi, Trieste è una donna” di Umberto Saba, il “Piccolo canzoniere” di Virgilio Giotti biel che Marin si screave cun “Fiuri de tapo”, racolte stampade dal editôr Paternolli di Gurize. Epoche dulà che a Triest si lave svilupant la amicizie tra doi personaçs inmò discognossûts, che si incuintrarin juste par câs, James Joyce e Italo Svevo. Nons che a revochin ducj insiemit chel timp, fasint capî il tant che al è ae fonde di une civiltât scuasit di no rivâle a comprendi par vie de sô origjinâl complessitât.

La storie di “Biaseto” (cun chest sorenon al jere cognossût su la isule) e je incuiete ancje sot l’aspiet personâl. Al maride une fantate cognossude a Florence, Pina Marini. Si lauree in filosofie a Rome cun Giovanni Gentile. Dal matrimoni a nassin cuatri fîs, dai cuai un sôl mascli, il cetant amât Falco, il fantat dulà che al torne a viodi Scipio Slataper, l’amì muart intant de vuere di volontari. Ma ancje Falco al è spietât di un tragjic destin: militâr in Slovenie, al reste copât intun scuintri cui partigjans ai 25 di Lui dal 1943, la zornade che il fassisim al cole.
Par mantignî la famee, Marin al fasè l’insegnant, po al vignì cjolt sù a Grau come diretôr de Aziende dai Bagns, al de la sô adesion ancje al fassisim, ma par po jessi mandât fûr. Al fo perseguitât cun siet procès dulà che dibant si cirì di condanâlu. Ae fin si rindè e al le a logâ a Triest, dulà che al restà par trente agns fint ae pension.
Tra i lavôrs davuelts, al à fat ancje il bibliotecari pes Assicurazioni Generali. Al intratignì simpri bogns rapuarts cul Friûl, soredut cun Chino Ermacora e Lelo Cjanton de Filologjiche. La sô innomine di poete e scomence a slargjâsi tal 1951 cuntune opare monumentâl “I canti dell’isola”, e il premi Barbarani, che al riclame la atenzion di Pasolini. Da cjantôr di Grau al devente simpri plui cjantôr de vite, rapresentative di un mont no provinciâl, ma ben invezit de culture taliane dal secul, come espression di une Regjon jessude de tragjedie di dôs vueris. Il so tornâ inte isule al ripropon dut câs il dificil dialic cu la sô int. Intune poesie cussì al dîs: “Stanco de solitae / l’omo ha batuo ala porta / de dute le contrae / de la so zente morta”. In cheste flabe liriche al conte aduncje la condizione dal poete, che al fronte stradis discognossudis se al vûl crevâ il cercli che lu ten presonîr.
La opare di “Biaseto”, cemût che al sosten Elvio Guagnini, no si configure gran tant che une gjeneriche racolte di lirichis o un cjançonîr di stamp petrarchesc, ma pluitost come un gjornâl di viaç, un archivi, un diari, dulà cjatâ la straordenarie vôs di un scritôr european, talian, di Grau che al à cirût il respîr dal eterni, la vie de veretât (la persuasion vude iniment di Michelstaedter) e il sens di un univiers mai discuviert denant trat, disint di sé: “Me so el specio terso d’un fondào. Me so el vento”. (paolo medeossi)




Ladins dal Friûl pag.8 - Fevrâr 2016

SCRITÔRS E LIBRIS IN MARILENGHE
Cuaders di Culture Cjargnele” numar XIV
La publicazion e ven fûr par cure de Universitât de Tierce Etât de Cjargne

    Juste sot fiestis di Nadâl al è vignût fûr de stamparie Andrea Moro di Tumieç il volum numar XIV dai “Cuaders di Culture Cjargnele”, realizât come simpri dal cors di “Lenghe e Leterature Ladine Furlane” de Universitât de Tierce Etât de Cjargne. Volum penç di pagjinis (102), e di contignûts dedicât come che al è a un dai personaçs plui impuartants de nestre leterature, o sei il comediograf e poete Luigi Candoni.
    Inte prime part dal “Cuader”, chê dulà che i tescj a vegnin voltâts dal talian par furlan, o cjatìn in fats publicâts trê cjapitui di “Valpino – Le favolose imprese di un bambino alla scoperta de mondo”, un libri che Candoni al veve scrit pai zovenuts, ma che al cjape dentri dai significatîfs insegnaments ancje pai grancj. Po a vegnin ancje proponudis un mac des sôs poesiis plui bielis in lenghe furlane. Di grant riclam, e palês significâts, in chest câs e je chê che e à par titul “Friûl puarte di violis”.
     Pai tancj che no lu san al merte ricuardât che Luigi Candoni, nassût a Cedarcjis di Darte tal 1921 e muart a Udin ai 13 di Avost dal 1974, al è cognossût in Italie e tal forest pe sô straordenarie produzion teatrâl, cun aspiets di avanguardie verementri origjinâi. Par furlan al à scrit il test “Strissant vie pe gnot”, premiade de Filologjige tal 1974, e une racolte di dodis poesiis titulade “Lontan dai vôi”, publicade su la riviste “La Panarie”.
     Une des sôs plui fortunadis comediis, “Il dediderio del sabato sera”, rapresentade a dilunc ancje tal forest, e fo ispirade da tematichis leadis ae emigrazion furlane e cjargnele. Darest il stimul e la fuarce dal so teatri no àn mancjât di incidi su la leterature e sul teatri furlan, cu l’esempli di contignûts e tecnichis modernis e cetant validis, che il comediograf al veve cjapât sù lavorant a Rome, in Japon e in altris grancj centris di culture teatrâl. Cussì la sô opare plui polemiche, ispirade de storie dal Friûl, “Fuochi sulle colline”, e fasè burì fûr, a chei timps, une vore di sunsûr e di contestazions cuant che e fo rapresentade a Udin, tal 1966.
    La mont dal Serenât, il Cjanâl dal Incjaroi, la Bût e il Cjarsò, vadì i elements dal ambient fisic e favolôs de Cjargne si ju cjate ancje tal za vût iniment “Valpino”, un libri par fruts publicât tal 1972, o miei, par doprâ lis peraulis di Candoni, intun “romanç de infanzie viodude cui vôi di frut”. Ma lis monts, cu la lôr bielece e la lôr tragjedie, a comparin ancje intes poesiis par furlan, come in chê titulade in maniere significative “Vajont”: “Cumò là ch'al jere il lât / legri di trutis / a si viodin i budiei da mont...”. O ben inmò intai viers che a componin la curte liriche “La vite”: “Un sivilâ di treno / tra dôs galariis”.

     Candoni, che viers la fin de sô parabule vitâl, acelerade di un di chei mai che si use a dî che no perdonin, al scuvierzè ancje la segrete bielece de sô fevelade native, e la doprà, come che o savìn, pes sôs ultimis oparis. Come che lui stes al disè, il furlan al deventà la lenghe di Cain, in “Strissant vie pe gnot”, parcè che e je une lenghe popolâr, sclete, vere cussì i semeave plui adate par esprimi i sintiments primitîfs.
    Intai ultins agns al cjapà part cun passion al dibatiment su la istituzion di une Universitât autonome a Udin (che si viodi, sun chest cont, une sô letare vignude fûr su “Il Gazzettino” dai 29 di Lui dai 1971) e al fo purpûr un ferbint sostenidôr de creazion di un “Teatri stabil regjonâl” inte capitâl dal Friûl.
     Daspò vê predisponût un lassint par un premi teatrâl, il “Candoni – Arta Terme”, che indi tignìs vive la memorie di operadôr culturâl, oltri che di comediograf, al spietà chel il sipari al calàs su la sô vite, ative e impegnade fintremai inte ultime zornade.
     La seconde part, chê dulà che si voltin i tescj dal furlan-cjargnel par talian, e je stade invezit dedicade al poete, fotograf, pitôr e animadôr culturâl di Dimplan Luigi Dereatti (Vigji Dereat), vignût a mancjâ tal mês di Avrîl dal 2014. In fin, come simpri, la tierce part de publicazion e cjape dentri lis poesiis e lis prosis dai arlêfs che a àn frecuentât il cors di “Lenghe e Leterature Ladine Furlane”. In chest câs cetant interessantis a son lis prosis che a àn par argoment lis vicendis de “Vuere Grande”, tal inovâl dai cent agns che e je sucedude chê grande tragjedie, che e à tibiât in maniere particolâr la Cjargne, la sô int, il so teritori.
____________________________________________________________________________________________________________
La schede: PP.AA. , “Quaderni di Cultura Carnica / Cuaders di Culture Cjargnele” XIV / 2015, Ed. Universitât de Tierce Etât de Cjargne, Tumieç 2015, pp.102 .

Ladins dal Friûl” Diretôr responsabil : Renzo Balzan - Reg. Tribunâl di Tumieç n. 123 dai 09.03.98
Redazion : 33028 Tierç di Tumieç - V. Dandolo16 / tel. 0433/43696 / e-mail : ladinsdalfriul@gmail.com
F.I.P. (fotocopiât in propi) a Tierç di Tumieç (Ud) V. Dandolo 12 pes Edizions “Union Scritôrs Furlans”.
La publicazion e ven spedide es Bibliotechis dal Friûl, es Istituzions Culturâls Ladinis des provinciis di Bolsan, Trent e Belun, e a ducj chei che a mandin la lôr libare contribuzion doprant il C.C. bancjari nr.19162 dal “Banco di Brescia” (Filiâl di Tumieç) - codiç IBAN: IT50H 03500 64320 0000000 19162
Chest gjornâl inte sô version online si lu cjate tal sît : http://ladinsdalfriul.blogspot.it
Publicât cul sostegn de Provincie di Udin – L.R.24/2006 art.26



venerdì 1 gennaio 2016

Anade ( XIX ) n.1 Zenâr 2016

Periodic-mensîl di informazion e culture sul cont de minorance celtiche
dai Ladins de Furlanie. Edizion par cure de associazion “Union Scritôrs Furlans”

Friûl cence fruts: un amont demografic che al da di pensâ

A coventin politichis plui concretis par podê sostignî la famee

    L’indis di natalitât in Friûl-Vignesie Julie al è ai minims storics. In cinc agns, dal 2008 al 2013, al è calât inmò di passe dîs ponts in percentuâl, secont i dâts dal Istat elaborâts dal Ires Fvg. La curve e tocje il mancul 4,2 par cent se il confront al è tra il 2013 e l’an denant. A cambiâ al è ancje il profîl di chei a decidin di vê un frut: nuie matrimoni pai gjenitôrs di un piçul su trê e e cres la etât des gnovis maris.
    Dal 2008 al 2013 in Fvg si son contâts oltri mil frutins in mancul (esatementri il 10,4 par cent, un fenomen inmò plui marcât tra lis copiis furlanis (mancul 12,7 par cent a Gurize che al à lis percentuâls plui altis). Inte stesse dade di timp la cuote dai gnûfs nassûts cun almancul un gjenitôr forest e je passade da 21,7 a 23,7 par cent e chê cun ducj i doi i gjenitôrs forescj dal 16,6 al 17,4 par cent.
    In sumis a nassin simpri mancul fruts, e di maris cuntune etât simpri plui alte, di norme sore i trente agns. Si maridisi di mancul e, dât unic e inedit, a son in câl ancje i nassûts di almancul un gjenitôr forest. Cussì lis scunis a restin simpri plui vueidis e si sierin i ponts nassite intai ospedâi, viôt juste apont il câs ultin di Latisane. Intai ultins cuindis agns, par altri, il numar dai fruts nassûts chenti al è stât “sostignût” da gjenitôrs forescj. In fats, tal 1999 i nassûts di almancul un gjenitôr forest a rapresentavin il 6,8 par cent dal totâl e chei cun ducj i doi i gjenitôrs forescj il 3,5 par cent. Tal 2013, come che o vin displeât denant trat, lis percentuâls a son incressudis dal 23,7 e dal 17,4. In conclusion, si po dî che in cheste dade di timp i nassûts di almancul un gjenitôr forest a son cuadruplicâts, mentri chei cun ducj i doi i gjenitôrs imigrâts a son incressûts di cinc voltis. Vuê in Fvg, scuasit un frutin su cuatri al à il pari o la mari, se no ducj i doi, di nazionalitât divierse di chê taliane.
    Par chel che al inten lis copiis mistis, lis maris forestis a son soredut rumenis, marochinis e polachis, mentri i paris forescj a son tal ordin, albanês, marochins e rumens. Romanie, Maroc e Albanie si confermin i principâi paîs di citadinance ancje tal câs che i gjenitôrs a sedin ducj i doi forescj.
    Si divente maris simpri plui tart e cheste e je la cause principâl dal fuart câl des nassitis. In particolâr inte nestre regjon lis maris cun mancul di 25 agns a rapresentin il 9,5 par cent dal totâl. Chês cun plui di 40 agns a son il 8,5 par cent. Se par altri, si considerin dome lis maris furlanis, il 6,3 par cent al à
mancul di 25 agns ae nassite dal prin fi, il 10,2 par cent al à fintremai plui di 40 agns.       Vâl a dî che o sin in presince di un câl demografic impreteribil. E no si viodin, almancul tal imediât, des inversion di tindince, viodude ancje la alte percentuâl di disocupazion zovanîl e il persisti de crisi economiche.

     La demografie nus presente numars e statistichis, ma nô o scugnì fâ ancje cualchi resonament oltri lis cifaris. Di famee par esempli si fevele pôc, e pûr e reste inmò la jone de societât, ancje se, a dî la veretât, a zirin ancje ideis diferentis. Ma nô o sin tradizionaliscj e o tornin a bati sul concet che la famee e je un element fondamentâl de nestre societât. De societât e de comunitât furlane.
   Epûr, osservant ce che al è daûr a sucedi in Friûl-Vignesie Julie, al ven di domandâsi ce pês che a àn lis politichis pe famee e cuâl futûr che e puedi vê la nestre regjon se si va indenant fasint tais invezit di sostignî e judâ economichementri cui che al acete la sfide di meti al mont dai fîs.
     Ae fin di Dicembar 2014 il “Comitât Maris e Paris dal Friûl-V.J.” a àn consegnât in Regjon trê mil firmis par domandâ che al vegni ripristinât il bonus bebè pai nassûts dilunc il 2014, un pas essenziâl par judâ lis copiis, considerât che dal 2008 in ca si contin mil nassitis in mancul. Une bataie ae fin vinçude. Ma nol baste.
    Vuê chel che la Regjon e met in cjamp pes fameis al è dabon pôc, il minim. Par cuintri, un bon intervent al è il contribût par judâ a paiâ lis retis pe frecuence dai nîts de infanzie, pai servizis integratîfs e i servizis sperimentâi logâts sul teritori regjonâl; altris formis di sostegn economic interessantis a son i contribûts par comprâ i libris di scuele e pal traspuart public. Ma par fâ in mût che une copie si sinti serene tal meti al mont un frut dut chest nol è bastant: bisugne invezit pontâ suntune politiche fiscâl che e privilegji lis fameis cun plui fîs e e sburti i aiûts regjonâi in cheste direzion.
     No esist une formule magjiche par salvâ la nestre societât, ma a esistin il bon sens e la voie di cambiâ in maniere radicâl lis cjossis mantignint al centri la famee, radiis e pont di riferiment de nestre comunitât furlane. Ce che al covente al è plui coragjo di metisi ducj insiemit ator di une taule par resonâ sul tant invocât ben comun, se a cualchidun inmò i interesse, naturalmentri. Bon An Gnûf 2016 a ducj Voaltris! (tarvos)




Ladins dal Friûl pag.2 – Zenâr 2016       

DAL TIMÂF A LA LIVENCE
Eletrodots e arogance di Stât
Biel che i industriâi a tornin a proponi la linie Würmlach-Somblât
    Al jere di spietâsal. Pal eletrodot Udin-Redipuie, l’iter al è tornât a partî. Daspò il stop al cantîr decretât dal Consei di Stât che tal mês di Lui al veve anulade la autorizazion concedude a Terna par un vizi di forme di un dai parês concedûts dilunc il timp domandât pe racolte des autorizazions necessariis, ai 12 di Novembar stât ministri dal Svilup economic al à dât l’ausvais a chel che al ven definît “procediment di rideterminazion”. Il tananai de arogance di Stât al à tornât a metisi in vore.
    Cemût che si ricuardarà, a esprimisi in maniere negative intai confronts di cheste opare e jere stade la Soreintendence dal Friûl-V.J. che e veve judicât l’eletrodot masse di dam pal ambient. Ma po chest parê negatîf al jere stât superât dal pronunciament dal ministri dai Bens ambientâi e culturâi che, su la fonde des resons puartadis indenant di Terna su la impussibilitât, in ogni câs, di evitâ dams ambientâi significants, ancje fasint passâ sot tiere lis liniis, al veve dât il so parê favorevul. Dut câs a judizi dal Consei di Stât chel parê nol jere stât motivât in maniere adeguade. Cussì al veve acolzût i ricors e fermât i lavôrs.
    Daûr dal gnûf pronunciament lis “pleris dal palaç” a àn tacât a sunâ la lôr musiche, subite slargjade des televisions e dai gjornâi: “L’eletrodot Udin Ovest-Redipuie al è indispensabil par risolvi il pericul di interuzions de corint de rêt eletriche furlane, formade di dôs solis liniis a 380 KV e vieris dai agns 70/80, a front dai consums che a son plui che dopleâts intai ultins trente agns. L’investiment – e sosten simpri Terna -, al rive a 110 milions di euros, e al smire a fâ sparagnâ oltri 60 milions di euros ad an graziis ae aumentade sigurece dal sisteme eletric, ae pussibilitât di aurî corints tal forest e ai minôrs coscj pes impresis e pai citadins”. Dutis buinis resons, al vignarès di pensâ, ma chest nol po justificâ lis devastazions ambientâls e la mancjance di rispiet des regulis, viodût che une linie di cuarante chilometris, suntun teritori dut plan, e podeve benon jessi fate passâ sot tiere, cence grancj dams e in massime sigurece. Considerât, par altri, che sun chê trate alì al passè bielzà, naturalmentri sot tiere, un oleodot.
   A chest pont l’iter aduncje al torne a partî, ma nissun al po dî se ae fin si varà il vie libare o mancul par lâ indenant cui lavôrs. Tant al dipent dai gnûfs parês che a vegnin domandâts, scomençant di chel de Soreintendence, e da eventuâi ricors che a podaressin vignî depositâts di cui che, di simpri, si opon ae realizazion dal eletrodot e al domande, se propit chest al scugne jessi realizât, che al vegni fat passâ sot tiere.
A dispiet des declarazions sunsurosis rivadis daûr la sentence, no ’nd è riferiments intes comunicazions ai azioniscj dal ricors che Terna e à puartât in Cassazion. Ricors che al è stât efetivementri presentât, ma che nol po rivuardâ il merit de vicende: al po dome cirî di dimostrâ che inte sô sentence il Consei di Stât al è lât oltri lis sôs competencis. Cuestion, par altri, no sempliç di definî. “Terna, tal so ricors, e à metût dentri ancje dai no pertinents riferiments al presumût pericul di une delocalizazion de Danieli di Buri, che dut câs in chest contest a semein dome une mercantîl azion di propagande – al displee Aldevis Tibaldi, leader dal Comitât pe vite dal Friûl rurâl -. Chest ricors – al va dilunc inmò Tibaldi - e je une mosse par plaidî i interès pai cuai e opare Terna”. I ricorints si son costituîts part civîl come denant dal Consei di Stât, in maniere separade i sindics e i privâts par no messedâ i interès publics cun chei privâts. Al merte sun chest cont memoreât che i comuns che si son oponûts al eletrodot a son chei di: Basilian, Listize, Mortean, Pavie, Palme, Trivignan e S. Vît de Tor. Mentri il “Comitât pe vite rurâl dal Friûl” al difint i interès di passe 250 impreditôrs agricui.

    Di chel che si capìs, invezit, Terna e smire cumò a altri. Cussì di fonts risiervadis si è savût che simpri Terna e veve vût cûr di domandâ al premier Matteo Renzi un decret sanatorie, ma il president dal Consei nol è stât gran di cheste opinion. Cussì cumò Terna e sta lavorant par fâsi concedi une autorizazion “ex novo” dal ministeri pal svilup Economic. Une procedure di sigûr fint achì no trasparint (no si sa cualis che a son lis “integrazions” presentadis, dal moment che l’eletrodot al è bielzà costruît par une buine part e partant al reste ben pôc di ce integrâ) e che al lasse in bocje il savôr amâr di une “trabossigne romane” cun chei ambients ministeriâi che, secont la sentence dal Consei di Stât, si son za prestâts timp indaûr par “vualivâ” la no legjitime autorizazion ae costruzion dal eletrodot.
   A chest pont, daûr la resinte mosse dal ministeri dal Svilup economic, la bataie e torne a imboreçâsi, cemût che al jere facil proviodi. Podês fuarts che a vuelin colonizâ il Friûl pal propi interès cuintri abitants e comuns de Basse Furlanie che si batin cuintri une inacetabil devastazion ambientâl.
  Daûr de “buine gnove” rivade sù di Rome sul cont dal eletrodot Udin Ovest-Redipuie, al è vignût fûr un comunicât stampe de bande de Associazion dai industriâi de Provincie di Udin. “Il fat che la Comission europeane e vebi confermât tra i progjets prioritaris di interès comun l’eletrodot Würmlach-Somblât nol sorprent par vie che cheste opare e rientre tra i colegaments energjetics transfrontalîrs che la Ue e promôf par favorî la stabilizazion dal marcjât eletric. No sorprent nancje la posizion de Regjon di contrarietât ae soluzion des entimis par aiar”. Cheste in struc la note buride fûr dal president di Confindustrie Udin, Matteo Tonon. In sumis i industriâi no si rindin e a tornin a bati sul claut de realizazion di cheste opare. Pat fortune che de Austrie a àn bielzà dit e ripetût che chel eletrodot alì nol va fat, parcè che lôr al ambient e ae salût i tegnin.
   Batais di retrovuardie al disarà cualchidun, che a son cuintri il progrès, la incressite economiche e la creazion di gnûfs puescj di lavôr. Batais sacrisantis cuintri i “podês fuart”, che a operin dome par speculâ e insevâ i propis interès. Cun chestis ideis o stin devastant e distruzint la tiere, lassant in ereditât une clime di velens, di incuinament e di miserie pai nestris fîs e nevôt. Cundut achel, Bon An Gnûf 2016 a ducj Voaltris, soredut in pâs e in salût! (renzo balzan)




Ladins dal Friûl pag.3 – Zenâr 2016

CRONICHIS DI CHENTI
CoopCa: vendûts un biel pôcs di supermarcjâts
Ma al reste il probleme fondamentâl dai esubars

Damâr – Un passaç di fonde de vicende CoopCa, che e à cessât di esisti cui 31 di Dicembar, al jere chel de aste pe vendite dai supermarcjâts e des buteghis presints tra la nestre Regjon e il Venit, che a fasevin part dal patrimoni societari. Tra colps di sene e tratativis di aste al rialç, tal studi dal nodâr Lucia Peresson, di Udin, miercus 25 di Novembar a son stadis viertis lis bustis cu lis ufiertis rivadis par 22 negozis, par un rigjavât totâl di circje 13 milions di euros.
     Avonde sodisfats i licuidadôrs, Paolo Rizza, Giovanni Sgura e Roberto Pittoni, che a vevin cjapât in man lis brenis de aziende dopo che il cda al jere stât metût de bande, parcè che i numars a àn pandût che “e je lade miôr di ce che si pensave”. In fats, oltri ai zigants CoopNordEst, Alì, Centro Commerciale Discount e Despar, a dâ un sostegn impuartant al bant e je rivade, a sorprese, la Ortofrutticola Cervellin di Udin, che e à cjapât sù cinc supermarcjâts. Ma a son stâts ancje trê dipendents di CoopCa che no àn volût rindisi e si son metûts in zûc cu la volontât di tignî vierts dai ponts vendite che se no a jerin destinâts a restâ sierât. Daspò cheste prime fase a restavin di vendi inmò 14 ponts vendite, oltri naturalmentri al magazen e al centri servizis di Damâr.
     Dificil rivâ a induvinâ cetancj puescj di lavôr che a podaran jessi salvâts, parcè che par scuasit dutis lis cessions a restin inmò di definî i acuardis sindacâi, che naturalmentri a smirin ae massime tutele dal personâl. Da une valutazion di massime i licuidadôrs a stimin che si podarès tratâ di uns 300 lavoradôrs, su 639, che a viodaran confermât il lôr puest di lavôr. Mancul de mitât se dut al va ben. Par ducj chei altris, magari cussì no, la casse integrazion straordenarie e larà indenant fint al mês di Avrîl cu ven.
     Insiemit pe sodisfazion sul cemût che a son ladis lis robis, al reste dut câs l’amâr in bocje ai dipendents che si son butâts inte aventure de auto imprenditorialitât, une partide no sempliç di par se stesse, dulà che a son stâts lassâts dibot di bessôi. “La cuestion e je, - al displee Angelo Verde ex dipendent de buteghe di Cassola che al à cjapât sù il negozi di Villorba (chei altris doi negozis cjapâts sù dai dipendents a son chei di Cittadella e di Pontebe), cun vot dipendents e tante voie di lâ indenant, - no dome la naturâl pôre par un avignî inciert. Ma la scjarse poie e il disinterès dât di viodi par nô di cui che nus veve imprometût aiût e sostegn”. Chei di Confcooperativis, in fats, no àn mantignût ce che a vevin imprometût. A judâju, in fin, a son stât i stes licuidadôrs dal faliment di CoopCa. Ma dal sigûr chestis situazions no àn zovât al inviâsi di altris iniziativis di cheste sorte, che magari a varessin podût recuperâ altris negozis restâts cence compradôrs.
    Come che o vin sotliniât tal sot titul di chest articul, a chest pont al reste il probleme fondamentâl ai esubars, che a son tancj, almancul 346. Dutis lis acuisizions a puartaran cun se une riduzion dai dipendents dai sengui negozis, parcè che, àn palesât i imprenditôrs interessâts, “i ponts di vendite di CoopCa a vevin coscj di gjestion, massime par chel che al inten il personâl, masse pesants di sostignî”. A chest pont a scugnin intervignî sedi i sindacâts che la Regjon, parcè che une cualchi soluzion bisugne rivâ a tirâle fûr, pene une ricjadude pesante sul tiessût economic e sociâl dal teritori, che di par se stes al è bielzà in soference.
     In fin al reste simpri in pins il probleme dal prestit sociâl, di tornâ ai trê mil socis par une sume complessive di 26,5 milions di euros. Par cumò al è stât imprometût che a vignaran tornâts mieçs bêçs, che no son tancj ma al è simpri miôr di nuie. Ma la delusion e je stade grande e une fin cussì indade pe CoopCa nissun no le varès mai pensade. Cheste e je stade une sconfite pe Cjargne interie e pe sô gloriose cooperazion. (mateu di prun)

Weissenfels: il destin al reste plui che mai inciert

Tarvis – A son jentrâts in siopar ai 4 di Dicembar stât i 86 dipendents des Açaiariis Valcjanâl (ex Weissenfels di Fusinis). La decision e je stade cjapade come conseguence di un ordin de direzion, che e dipent de Pewagg, societât austriache che di doi agns in ca e gjestìs il stabiliment, di disvuedâ il magazen. Un proviodiment che i lavoradôrs a àn ritignût une vore grâf. Ae assemblee che si è davuelte inte stesse zornade, al è intervignût ancje il sindic di Tarvis, Carlantoni, (il comun al è proprietari dai mûrs de fabriche) par puartâ ai lavoradôrs la solidarietât de interie comunitât de Val Cjanâl.
     La decision de Pewagg no je plasude parcè che e je stade metude in vore pôcs dîs prime de scjadence dal contrat di afit. Il fat al è che il stabiliment al à di jessi tornât funzionant ad in plen, partant e mancje ogni clarece su ce che al podarà sucedi in a vignî. Intant, il camion che al veve di puartâ vie il materiâl in Austrie al è tornât a partî vueit.
    Amâr destin di cheste storiche fabriche che, fint ae fin dal ’900 e jere stade une leader mondiâl inte produzion di cjadenis pe nêf: po, par colpe dai smembraments, i passe tresinte ocupâts a son calâts a mancul di cent, limitant la produzion aes solis cjadenis tecnichis.
    Il stabiliment intant al è stât tornât a consegnâ ae curadore falimentâr nomenade dal Tribunâl, o sei la dotore Paola Cella, che è varà di bandî la aste par definî la cession de aziende. La normative, juste apont, e proviôt che cheste e vegni tornade ae curadore come che e jere stade consegnade, partant la iniziative dal siopar e veve la smire di preservâ il patrimoni aziendâl.
   Il bant de aste al varès di jessi publicât in curt, biel che la stesse e podarès davuelzisi za intai prins dîs dal 2016. Oltri ae stesse Pewagg, ancje il zigant japonês Kito al sarès interessât a cheste aziende. Dut câs viodarìn cemût che e larà a finîle, ma lis preocupazions sul a vignî di cheste fabriche storiche de Val Cjanâl dabon no mancjin. (mdp)




Ladins dal Friûl pag.4 – Zenâr 2016

DOCUMENTS
Pasolini in Friûl al fâs inmò pôre

    Pasolini al fâs inmò pôre, al reste un tabù, almancul pe Universitât di Udin che (robis di no crodi) no à intenzion di intitulai la sô Scuele Superiôr, o sei la super facoltât di ecelence. E semee une storie di altris timps, almancul di za fa vincj o trente agns cuant che bisugnave fâ i conts cul tant che il poete di Cjasarse nus veve lassât intes diviersis centis dulà che si jere esprimût, de leterature al cine, de sagjistiche al gjornalisim antagonist, che al segnà la fase conclusive de sô vite dulà che al jere deventât un testemoni dal scandul, cussience di un popul che nol viôt i propis mâi, puartant a livei cetant alts il grât de sfide e dal riscjio.
    Al coventave dal sigûr dal timp par fâ comprendi e assimilâ une materie cussì intrigose (ecessive in maniere volude, e pûr necessarie par disvelâ e demistificâ la evidence), oltri a une esistence mai ipocrite e rivade insom in maniere tragjiche. Il Friûl, inte sô complessitât, nol aparive sul imprin pront a dîsi ad in plen patrie di elezion di chel om copât su la splaze di Ostie. E a semeavin ancje justificabilis lis posizions cautelosis di cui che, di front al interogatîf sul cemût ricuardâ Pasolini, al sugjerive sieltis prudentis fint scuasit a une cidine censure.
     Il probleme si presentà tal 1997 cuant che finalmentri Udin al tornâ a vê un teatri come cu va. Zîrs di bolzare e discussions cence fin su la intitulazion che, a un ciert pont, no podeve trascurâ Pasolini, dal cuâl si jerin ricuardâts i vincj agns de muart intune clime che e scomençave a morestâsi intai confronts de sô memorie. Ma po, cence inviâ nissun scjas di sorte, la sielte si indreçà suntune trancuile soluzion, o sei su Zuan di Udin che, come che si sa, al fo un valent architet, oltri che pitôr, ma che cun ce che al sucêt dentri vie di un teatri nol centrave propite gran.
    Al vignì preferît lui forsit pal detai che chel non di art al puartave la origjine udinese, furnint une soluzion pratiche par indicâ une citât dulà che si davuelzin spetacui.
     Nuie Pasolini aduncje, al cuâl a spietarin la intitulazion di altris teatris dal teritori, cemût che al è sucedût a Cervignan, inte piçule Midun e naturalmentri inte sô Cjasarse. Ma alc tocjave pûr tirâ fûr parcè che la toponomastiche (o sei la art dai nons di dâ aes stradis e aes placis) no je materie banâl: e je anzit ativitât inte cuâl une citât e cîr di esprimi une anime, une storie, un afiet. Udin partant al pensà di rimedeâ dedicant a Pier Pauli Pasolini un viâl in costruzion, che par agns al jere restât sierât jessint il colegament in cors di opare tra il stadi Friûl e il centri, fint ae taronde cun vie Martignà. Su la tabele al è scrit “Viâl Pier Pauli Pasolini, poete furlan”.
      E podarès semeâ une sielte ridutive, ma che pûr simpri e va daûr al destin riservât in gjenar a tancj personaçs de culture furlane. Par esempli vait a cirî vie Pre Josef Marchet o vie Pre Checo Placerean o viâl Tizian Tessitori. Buine ricercje! Nissun sfuarç invezit par Renzo Valente o Aldo Rizzi, che inmò no son propi.
   Ma tornìn ae universitât, che cumò e po disponi dal bielissim Di Toppo Wassermann (che al cjape dentri palaç Garzolini), restaurât cun grande maestrie. Un pont di riferiment splendit par docents, students e ancje citadins, viodût che alì si davuelzin, graziis ae colaborazion cul ateneu, frecuentadis conferencis cemût che al sucêt in chestis setemanis cui incuintris dedicâts a Dante.
    Cumò bisugne cjatâ un non di lustri di dâ ae sede che al è il svant de Udin universitarie e, a rigôr di logjiche, no dovaressin jessi dubis su la sielte. E invezit no.
Ve tornâ a vignî fûr dal passât lis vieris fantasimis e i tabù. Pasolini? No graziis, e semee jessi la sconciertant rispueste.

     Inmò une volte, come che dispès al sucêt des nestris bandis, la cjosse plui sempliç e divente un osteôs afâr di Stât.
    Tra i nons in bal al è ancje chel di Tina Modotti, ae cuâl agns indaûr il Comun al veve titulade stranementri la cussì clamade galarie fotografiche, rigjavade dal Marcjât dal pes, ma no (come che al podeve jessi scontât) la cjase dulà che e je nassude in Borc di Preclûs.
     Pasolini al lassà scrit tal test che al è po deventât une sorte di testament: “Il mont al rive simpri a integrâ i eretics, par esempli cu lis beatificazions...”. Dedicantji la Scuele Superiôr, no si cor par nuie chest riscjio jessint invezit un inteligjent at di justizie viers il maiôr inteletuâl che, che al plasi o che nol plasi, al è passât des nestris bandis e che achì al à vivût a lunc lassant oparis fondamentâls, al centri di ricercje e studis academics. Une Universitât, che e rapresente la plui impuartante istituzion culturâl dal Friûl, e scugne savêlu ricognossi, se no e finìs par dâ reson e ce che il stes Pasolini al veve denunziât fint tal ultin: “O vin une culture di sedentaris, ducj compagns fra lôr, ducj integrâts. L’Italie dal pont di viste culturâl e je aromai une provincie”. (paolo medeossi – test tirât fûr dal “Messagero Veneto” dai 18 di Novemar 2015 e po voltât par cure de redazion)

Misteri : I ausi zirà in alt i vui / su lis piqis secis dai lens, / no jot il Signour, ma il so lun q’al brila simpri imens. / Di tantis robis q’i sai / i ’n sint tal cour doma una: / i soi zovin, e vif e ignorant / cu’ l cuarp q’al si cunsuma. / I stai un moment su l’erba / dal rivâl, tra i lens nus, / po’ i çamini, e i vai sot il nul / e i vif cu la me zoventût. (Pier Pauli Pasolini – poesie tirade fûr da “Il Stroligut” , vignût fûr tal 1945 de Stamparie Primon di San Vît)





Ladins dal Friûl pag.5 – Zenâr 2016

JOSEF MARCHET: I GRANCJ OMS DAL FRIÛL
Zuan Francesc di Tumieç: pitôr di grant talent
Intes sôs oparis la fuarce e la creativitât di un artistit unic

     Cemût che si à vût bielzà iniment l’orientament culturâl dal Friûl viers lis corints umanistichis, par efiet de dominazion veneziane, nol à incuintrât, ae fin, cui sa ce resistence. Distudade chê cualsisei svintade di gjermanesim che si jere fate sintî fint ae mitât dal Dusinte, tra il sucessîf dâsi di volte di patriarcjis talians e forescj e tra lis continuis lotis che a travaiarin la nestre tiere intai doi secui daspò, nol veve cjapât cuarp un altri model avonde individuât di culture locâl, che al ves podût contrastâ la gnove clime. Al semee invezit che une indurant resistence si sedi palesade tal cjamp plui propriementri artistic e che dome il sflandôr dal Rinassiment lu vebi stravuelt, in maniere definitive, dilunc il Cinccent.
     No si àn elements bastants par deliniâ cun precision i caratars de art furlane inte ultime dade di timp de ete patriarcjâl: de architeture e de sculture nus son restâts monuments cierts e significatîf daspò i domos di Glemone e di Vençon, oltri a fragments di pituris opare di anonims o, plui dispès, opare di mans forestis. Intes cjartis dal timp, par altri, si puedin tirâ fûr i nons di une numerose rieste di pitôrs paisans, che a àn operât tra il Tresinte e il Cuatricent, segn che in Friûl no mancjave la richieste de lôr opare.
     Un fat degn di note, ancje pal so frecuent ripetisi inte nestre Regjon, si scuvierç za intai prins riferiment di archivi rivuardants i pitôrs furlans: il prin fra di lôr, dal cuâl o cjatìn ripetût il non, al è un Nicolau di Marcuccio di Glemone (1327-1359), che al ve doi fîs pitôrs, Zuanut e Francesc; e Zuanut a sô volte al ve trê fîs che indi continuarin la profession. Di un Lenart pitôr a Glemone si cognossin inmò trê fîs parimentri pitôrs: Zuan, Antoni e Pieri, operants sul scomençâ dal Cuatricent. L’udinês Domeni clamât “lu Domine”, de cui ativitât e je restade cualchi testemoneance, al ve parimentri un fi pitôr di non Nato. Fi di un pitôr, Batiste Schiavone, al fo ancje Piligrin di S. Denêl. E inte istesse maniere il grup dai cussì clamâts Tumiezins al fo metût adun di pitôrs e artiscj in parintât tra di lôr.
    Tal grup dai Tumiezins si vûl meti dentri ancje Zuan Francesc del Zotto di Soclêf, che al amave firmâsi “Zuan Francesc di Tumieç”, ma che nol ve nuie in comun cun chei altris e che al emerzè come une potente personalitât a part: cence confront la plui indipendent, fuarte e interessant di chê ete. De ativitât artistiche di Zuan Francesc o vin cualchi informazion documentarie e cualchi date; de sô formazion e des sôs vicendis biografichis, invezit, no si sa dibot nuie di precîs. Nassût, si presum, viers la mitât dal Cuatricent da un Odorì-Danêl di Soclêf, lu cjatìn a operâ in Friûl e in Cjadovri dal 1482 al 1510.
     I siei critics, cun ustinazion, a àn cirût di scuvierzi intes sôs pituris elements che a permetessin di colegâlu aes corints talianis (padoanis e fintremai toscanis) dal timp: scuasit che a coventassin par justificâ une valutazion positive inte opare dal artist. Un sigjîl nazionâl in sumis! Di chê altre bande e sarès cjosse intrigose individuâ une scuele o un maestri di oltri lis monts. Al è une vore plui crodibil invezit che al vebi imparât ce che al jere di imparâ intune cualchi buteghe di paîs, dulà che a jerin presints, cu lis tradizions locâls, influencis todescjis e sugjestions talianis; e che il superament dal lôr comun livel e la afermazion de propie individualitât e sedi stade efiet soredut dal so caratar e dal so grant talent. Cence altri i fatôrs fondamentâi de art di Zuan Francesc a son nordics: decîs graficisim, tipologjie caraterizade in maniere marcade e vigôr espressîf des musis, monumentalitât des figuris, impostazion cromatiche sclete e plui leade ai valôrs locâi che ae orchestrazion gjenerâl de intonazion complessive. Se po o zontin ciertis particolaritâts tecnichis – come la ustinade fedeltât ae decorazion gotiche, l’ûs di contornâ in ros (cfr. Dürer), i cjavêi ondâts o riçots a striaduris paralelis (cfr. Pacher e i Tirolês), o pûr concetuâi come la rapresentazion dal demoni secont i modei todescs-flamants (cfr. Lochnere e Bouts) e ciertis composizions narativis vicinis a contemporanis Carintians (cfr. Thomas von Villach), si puedin capî lis perplessitâts dai critics nostrans usâts a considerâ i modei dal Rinassiment talian come universalmentri superiôrs in assolût.
  I prins lavôrs di Zuan Francesc, dai cuai si vebi notizie, a son dal 1482: si trate di cierts afrescs realizâts su la façade de glesie di Vivâr, che a son lâts pierdûts tal 1820 cuant che la glesie stesse e vignì ingrandide; e des decorazions tal coro di S. Nicolau dal Cumieli. Altri sôs pituris, realizadis tal 1484, a son ladis invezit pierdudis. Nus restin invezit, in part ritocjâts, i afrescs de glesie di San Antoni di Barbean (Spilimberc). Dal 1493 e je invezit la decorazion de plêf di S. Martin di Soclêf, che e da di viodi, tal artist, une energjie cromatiche inmò contignude, inte ricercje de unitât e de armonie cromatiche.
     La totâl manifestazion de vitalitât e de fantasie, de potence dramatiche e de plene autonomie artistiche di Zuan Francesc si cjatin intai afrescs di Provesan (1496), dulà che la grandiose Crocifission, che e ocupe dute la parêt di font, e je di un vigôr e di une espressivitât che ti cjol il respîr. Achì il pitôr si è ad in plen bandonât ae foghe de sô ispirazion, lant a sfidâ ancje la critiche dal timp cun coragjosis libertâts, che a palesin in lui un totâl possès dai propis mieçs.
     Oltri ai afrecs, Zuan Francesc, muart tal 1510, no nus à lassât che dôs temparis di secondarie impuartance; une piçule Madone che si po viodile inte Galarie de Academie di Vignesie e la pale di S. Martin inte za vude iniment plêf di Soclêf. Di une pale di altâr pe confraternite di S. Lenart di Glemone o cjatin testemoneance intun contrat dal 1510, ma nol risulte che la opare e sedi mai stade realizade. (Josef Marchet – da “Friuli: uomini e tempi” / test ridusût e voltât par furlan par cure de redazion)




Ladins dal Friûl pag.6 – Zenâr 2016

DAI FATS E DE CULTURE
DES TIERIS LADINIS

LADIN!” n.2 / 2015

Une riviste che e riscjie di vignî sierade pe mancjance di finanziaments
    Al è vignût di resint il numar 2/2015 de riviste “Ladin!”, buride fûr par cure dal Istitût Ladin de la Dolomites di Borca di Cjadovri. Numar che si vierç cuntune letare dal diretôr responsabil (oltri che diretôr dal Istitût Ladin) Ernesto Majoni Coleto, dulà che si denunzie la pussibil fin di cheste esperience. In fats Majoni al scrîf: “ Chel che o prossumavin, purtrop al è deventât realtât. Tal Progjet finanziari de Leç 482/99 dal 1/6/2015 al 31/5/2016, pe cuâl o stin operant, e nancje par doi progjets sucessîf, no son rivâts sostegns finanziaris ae nestre riviste. Chest numar di “Ladin!”, il vincjesim tierç de sô storie, al è stât partant realizât aurint ai ristrets “fonts propis” dal Istitût, ma dal 2016 lis risorsis esternis ai Progjets no bastaran plui, e si dovarà capî ce fâ di cheste publicazion. O crodìn che al sedi un pecjât parcè che, fint dal 2004, si è cirût di difondi – cun passe 1600 pagjinis – une autentiche “enciclopedie” dal savê de int di mont, di storie e culture ladine, zovantsi di circje 60 cualificâts contribûts sientifics e di ricercje, 90 “Fregores de cultura” sui plui diviers argoments, centenârs di tescj di poesie, prose e teatri intes varietâts dal teritori e ancje tantis recensions di libris e mostris consideradis di rilêf pe nestre int. Di cumò indenant dut chest al podarès jessi dome un ricuart”.
     O sin aes solitis: si va dilunc a taiâ i fonts pes minorancis, si sta disvuedant di ogni valence e di ogni significât la fondamentâl L.N. 482/99, che cence une dotazion finanziarie adeguade no vâl dibot nuie. Se po lis minorancis si cjatin in Regjons, come il Venit juste apont, che di chescj problemis no ur interesse nuie di nuie, la situazion e devente inmò plui intrigose. Di chescj aspiets achì e cjape la dade la nestre condurant oposizion al progjet de macro-regjon dal “Triveneto”, une entitât dulà che la atenzion pes minorancis e sarès nule, dulà che lis diviersitât etnichis e culturâls a vignaressin, come che a disin jù par Rome, “asfaltadis”. A son aspiets dulà che parsore bisugne resonâ, par podê organizâ une resistence culturâl che nus salvi dai “asfaltadôrs”. Sergio Cecotti, cemût che di resint o vin publicât sun chest sfuei, nus à metût in vuaite, e nus à visât che la bataie no sarà a fat sempliç.
   Passant a chest numar de riviste, inte prime sezion, chê dedicade ai articui sientifics, di particolâr interès nus semee il contribût di Gianpietro Ponti sul cont de metude in vore di progjets pe realizazion di une “Toponomastiche Ladine in Provincie di Belun cun segnâi stradâi bilengâi”. In fats a partî dai prins agns Doi mil, la Provincie di Belun, in colaborazion cul Istitût Culturâl Ladin de la Dolomites, si è impegnade intune rieste di progjets in teme di tutele e promozion de toponomastiche ladine, realizant par 35 comuns la segnaletiche stradâl verticâl bilengâl cun diviersis soluzions.
    Si è tratât di conservâ e mantignî vitâl une part dal patrimoni culturâl locâl, ma ancje di progredî rinovant. La novitât e je stade il fat in se di palesâ e valorizâ lis particolaritâts linguistichis dal teritori, come ancje la creazion di regulis di trascrizion unitariis. E inmò, un prin tentatîf di unificazion de imagjine dal slargjât teritori che al va dal Agordin al Cumieli. Dut chest aurint ai fonts de leç 482/99. Naturalmentri vuê che cheste leç e je simpri di plui disprivade di fonts, ancje i progjets par slargjâ la toponomastiche bilengâl a vegnin slaifâts. A ogni bon cont alc di impuartant fint cumò al è stât fat.
      Inte seconde sezion “Fregores de cultura” nus à incuriosît, pe sô someancis cu la realtât de Cjargne, il contribût di Francesco Pordon (de chi de la Zota) che al à par argoment il len (“Il legno è meraviglioso”). Al scrîf l’autôr: “ Il len al è maraveôs. Une considerazion si impon, osservant il caric imponent di nêf rezût dai cuvierts da vieris stai intai dîs che nus fasin sovignî lis grandis neveadis dai Unviers di une volte. La valence dai nestris carpentîrs tal creâ architeturis purtantis di tâl fate e jere dabon rafinade e e divignive di une esperience viere di etis, cressude dilunc tantis gjenerazions.

      Par solit il lavôr di un carpentîr al scomençave cul rigjavâ i trâfs des tais di arbul, cuntun strument adat e ric di sapience: la manarie. Achì di nô si clamave “la manèra de scuarà”. O ricuardi di frut la opare di un “scuarador” di Zoldo, une vore ricercjât pe cualitât dai trâfs che a jessevin de sô pesante manarie, manovrade cuntune tecniche dal dut particolâr. Il so cantîr al jere daprûf dal riul Boite, ret de siee e de filande. La plante adate e jere stade puartade fûr dal bosc inte stagjon juste e ancje intant de lune juste. E vignive stagjonade cence premure, cun pazienzie e sapience. Dopo che i garzons a vevin poiât sui cavalets la taie, chest om al studiave dulà fâ passâ il prin tai, chel che al varès po condizionade dute la vore”. In sumis al semee di sintî a contâ lis storiis dai nestris menaus dal Incjaroi o ben di Trep. Timps, mistîrs e personaçs deventât aromai dome un ricuart.
      Inte tierce sezion “Stories, poesies, teatre” o cjatìn plusôrs contribûts cun contis e poesiis intes diviers varietâts des localitâts de Ladinie Belumate. In fin inte sezion dedicade ae recesion di libris e merte segnalade la publicazion dal “Lunario Ladin” (Ampezzo - Oltrechiusa – Zoldo – Centro Cadore – Comelico - Agordino). Une vere e propie opare di 108 pagjinis cun vieris imagjinis in blanc e neri e a colôrs. Ogni mês dal almanac al rapresente un colôr de rieste colorade de culture materiâl e spirituâl des ints dolomitanis, vuê riscuvierte – se no cun nostalgjie – dal sigûr cun preseament e dispès cun amirazion se o considerin lis fadiis sopuartadis cun condurance, fede e inzegn des gjenerazion passadis, che a son stadi buinis di creâ lis premessis par un a vignî in miôr pai citadins de montagne. (edelweiß)
________________________________________________________________________________________________________________________
Patrie Ladine: Ladins Furlans, Ladins Dolomitans, Ladins Rumantsch




Ladins dal Friûl pag.7 - Zenâr 2016

INTAI PRÂTS DE CULTURE FURLANE
Mandi a Corrado Cecotto: neurochirurc e autonomist
Partigjan inte Osôf e tra i paris fondadôrs dal Moviment Friûl

Ai 25 Novembar stât nus à lassâts il professôr Corrado Cecotto, al veve 89 agns. Une vite, chê di Corrado Cecotto, spindude tra ambulatoris e salis operatoris, ma ancje tal studi e tal azornament (120 lavôrs sientifics publicâts). Di zovin lu cjatìn intes filis dai partigjans, cuant che al veve a pene disesiet agns, e po inte politiche, cul Moviment Friûl.
    Insiemit cul fradi Zuan di un an plui grant, Cecotto si zontà ai osovans a Pielunc, dulà che al cjatà il professôr Zuan Batiste Caron (Vico), che al deventarà deputât. Tal in prin al fasè il puarte ordins ma po, viers la fin de vuere, al à fat part de Brigade Rosselli, metude adun di osovans e garibaldins insiemit. Daspò la liberazion lu cjatìn a sfilâ cun chei altris partigjans in Zardin Grant a Udin e po ae cerimonie de consegne des armis. “O ai consegnât la mê pistole – al contave Cecotto – e mi soi metût daurman a studiâ”.
     Intai agns Sessante ai impegns dal ospedâl si zontarin ancje chei politics. Tal 1966 Cecotto al fo tra i fondadôrs dal Moviment Friûl, cul professôr Toso, l’avocat Franceschinis e pre Checo Placerean. Po a rivarin Fausto Schiavi, Gjno Di Cjaurià, Zuanfranc Ellero, Zuan Nazzi, Cornelie Puppini e pre Pieri Londar. Tal 1967 e rivà la innomenade “Mozion dai predis”, che e podeve fâ cont su 529 firmis e che e metè in agjitazion “chei dal Palaç”. Intant a stavin cjapant pît lis manifestazions dai students par otignî une Universitât autonome a Udin. In chê dade il professôr Cecotto al tignì une conference al Rotary a sostegn de istituzion di une sezion de facoltât di Midisine, distacade di chê dal ateneu triestin. Tal 1968 (al jere president dal Moviment Friûl Fausto Schiavi) il professôr Cecotti si candidà pal consei regjonâl, dulà che in fats al vignì elezût parie a Fausto Schiavi e a Gjno di Cjaurià. Un vêr sucès, che no si ripetarà plui par nissune liste autonomiste.
    Al veve dai siums Corrado Cecotto e ju à realizâts ducj. Lui, che al jere dal 1926, vuarfin di pari e cressût a Buie intune famee con pocjis pussibilitâts economichis, al decidè che al sarès deventât miedi cuant che al jere dome in cuinte elementâr. E in fats al fondà la Neurochirurgjie tal ospedâl di Udin tal 1961.

    Ultin di sîs fradis, Corrado Cecotto ae etât di dîs agns al viodè cui compagns di scuele un filmât intitulât “Viaç intor dal çurviel” dulà che si contave la storie di un malât salvât graziis a un dificil intervent chirurgjic. Chê esperience lu cjapà cetant e si tramudà in curt intun progjet di vite. Cun grancj sacrificis, ogni dì in biciclete di Buie al lave jù a Udin par frecuentâ il liceu Marinelli. Po e rivà la vuere e la esperience de vuere partigjane. Ae fin al rivà cuistâ la maturitât sientifiche di privatist e al podè cussì iscrivisi ae facoltât di Midisine di Padue, dulà che si laureà. Venti vie al frecuentà la Cliniche universitarie dal professôr Belloni e al lavorà come aiût dai professôrs Quarti e Frugoni.
  A Udin, prime di podê vierzi al Sante Marie de Misericordie la Division neurochirurgjiche, al scugnì lotâ no pôc, cuintri personis che a jerin convintis che chê Division alì no coventàs. “Nol fo facil – al contave il professôr – podê otignî une sale operatorie”, che e rivà in fin tal 1965. Po, tal 1976, la prime Tac e, daûr, la sezion di Nuerotraumatologjie e la Unitât spinâl. Daspò cuarante cinc agns di cariere, al le in pension a 70 agns.
    Il professôr Cecotto al amave la sô tiere, si è batût pe sô incressi e il so impegn autonomist lu testemonie, ancje in moments che al podeve costâ. Lis dificoltâts incuintradis tal puartâ indenant i siei progjets a son une testemoneance di dut chest. Al jere dut câs une persone legre e di compagnie che al è rivât a otignî tancj impuartants travuarts graziis ae sô ustinazion e a tancj sacrificis.
(von zercläre)


Glemone: îr vuê e doman”: e à tornât a vinci Alida Pevere

Glemone – Chei che a son cuintri il furlan a disin che la nestre lenghe si la impare e si la fevele in famee. Nuie di plui fals: il furlan si lu impare e si lu fevele a scuele, se no al è dibant sperâ che al puedi sorevivi inmò a lunc. Cun chest spirt za fa disenûf agns Tonin Costantin al à metût sù il premi leterari “Glemone: îr, vuê e doman”, dedicât al ilustri glemonàs pre Pieri Londar. Cun chestis intenzions in ducj chescj agns a son stât proponûts lavôrs pe scuele par furlan, pe sô didatiche, pe preparazion dai docents. In sumis une opare cetant meritorie.
    Lis premiazions de IXX edizion di chest an si son davueltis, secont la tradizion, tal sore sere dai vot di Dicembar alì dal palaç de Comune. Inte prime sezions, chê dedicade aes contis pai fruts, e à tornât a vinci Alida Pevere, in fats cheste autore e à za vinçût chest premi cualchi an indaûr. Il secont premi al è stât invezit assegnât ae racolte di contis di Roberto Meroi. Tierç premi, a pari, pe tumiezine Eugenia Monego Ceiner e pe Scuele Secondarie di San Zuan.
    Inte seconde sezion, chê riservade a lavôrs di didatiche pal insegnament dal furlan, il prin premi al è lât ae Scuele Secondarie Cantore, di Glemone. Il secont ae Scuele Primarie Mazzini, di Udin, il tierç ae Scuele de Infanzie di Dartigne. Inte tierce sezion, simpri dedicade a lavôrs pe scuele, il prin premi al è stât assegnât ae mestre Antonella Cucchiaro di Glemone, il secont ae Scuele Primarie di Çurçuvint, il tierç ae Scuele Primarie di Sudri.
   Cemût che al à sotliniât il president de zurie, Roberto Iacovissi, e je stade cheste une edizion siore di partecipants, ben 23, e di contignûts e dut chest al fâs sperâ in ben pal a vignî. (red.)




Ladins dal Friûl pag.8 - Zenâr 2016

SCRITÔRS E LIBRIS IN MARILENGHE
Gnovis Pagjinis Furlanis – XXXIII/2015
Un altri numar de riviste de Union Scritôrs Furlans

    Ae fin dal mês di Novembar stât, de stamparie Moro di Tumieç, al è vignût fûr l’ultin numar de riviste leterarie, a cadence anuâl, “Gnovis Pagjinis Furlanis – XXXIII/2015” buride fûr come simpri par cure de Union Scritôrs Furlans.
   Trentetrê agns di presince tal contest leterari e culturâl dal Friûl a son tancj. Cuant che si è inviade cheste trate, tal 1982, par mert di Agnul Pitane che le à volude e fondade, la nestre realtât e jere dal dut divierse, sedi sul plan culturâl che, soredut sociâl. Si viveve, in chê volte, inmò inte clime dal dopo taramot, si asedave inmò chê arie di rinovament che chel tragjic acjadiment al veve inviât. Ma e jere une clime positive, si veve denant dai vôi i paîs risurîts, il Friûl al veve vinçude la bataie di fonde dal otigniment di une propie universitât autonome. Ancje in cjamp leterari il vivôr al jere significant, cussì dongje dai autôr bielzà innomenâts nons gnûfs si son zontâts tal contest leterari di chenti. Mert ancje de istituzion di premis leteraris, come il San Simon di Codroip, juste par vê iniment il plui innomenât. In sumis si pensave e si lavorave in positîf. Po invezit, massime daspò il doi mil, tantis cjossis a son cambiadis, problemis gnûfs a son vignûts indenant, la presince dai migrants, tantis fabrichis e buteghis che a sieravin lassant cence lavôr cetancj di lôr, ancje chenti. Se o lin a scrusignâ dut chest inte gnove produzion leterarie furlane dut chest lu cjatìn, cun doi autôrs in prime file, ma che magari cussì no no son plui cun nô, Gianni Gregoricchio e Franco Marchetta. Il fat po che un arlêf di Marchetta, Stiefin Serafini, al vebi vinçût la ultime edizion dal za vût iniment Premi San Simon, al è un aspiet cence altri une vore positîf.
   Si à dite di Agnul Pitane, fondadôr de riviste, oltri ae Union Scritôrs Furlans, dal cuâl tal passât 2015 a colavin i dîs agns che al è vignût a mancjâ, e juste par cheste reson la jentrade di chest numar e je dedicade a chest personaç, promotôr culturâl, poete e scritôr di grant rilêf. O cjatìn cussì scrit tal articul di jentrade: “Insiemit cu la Union dai scritôrs, simpri Agnul, al veve volût fondâ ancje cheste riviste, o sei “Gnovis Pagjinis Furlanis”. La publicazion a cadence anuâl, oltri a jessi il spieli de ativitât puartade indenant de USF, e voleve ancje jentrâ tal dibatiment culturâl e sociâl dal Friûl. Di chê volte a son vignûts fûr trentedoi numars, e dut ce che di significant al è comparît sul cont de leterature e dai scritôrs furlans, par furlan, dal Friûl lu cjatìn testemoneât intes pagjinis di cheste riviste”.
    Daûr, simpri su chest personaç, al ven il contribût di Gotart Mitri “Il Friûl di Agnul”. Gotart, leât a Agnul di une lungje amicizie, al scrîf: “La poesie di Agnul e je poesie di amôr dulà che al pant la sô sensibilitât plui fine, intun coinvolziment totâl”. E plui indenant: “Cualchi volte e je un berli scuasit disperât, une preiere incorade che i ven dal font dal cûr par chê la sô pueme lu meti in stât di vivi. Se la poesie di Agnul si le pues calcolâ poesie idiliache par ciertis figurazions di paisaçs, e pant elements autobiografics e introspetîfs, sì cun malsigurecis sui destins dal mont, ma ancjetant cu lis sigurecis apaiants, sepûr dopo passadis conturbiis (Un Istât – Inovâl “...i ài vût cognizion dal amôr / daspò di vê sufiart”), intal sintiment cuintrigambiât par la “Joane pradine”. Cussì i doi lûcs, i siei santuaris, l’amade Joane e il Friûl, mediant de poesie e de lenghe, a deventin insom i lûcs catarchis, i lûcs de liberazion ultime di Agnul”.
  Di Agnul, in fin, inte riviste e je stade publicade la conte “Vivi a Codroip” e trê poesiis tiradis fûr de racolte “Lis paveis di Plasencis” (1992).
  Interessant ancje il contribût che par chest numar di “Gnovis Pagjinis” al propon Luzi Perès (che si è zovât par altri de colaborazion di Celestino Vezzi). Si trate di une ricercje sul repertori lessicâl che pre Antoni Beline al doprât tal so innomenât libri “Siôr Santul”. In efiets in chel libri, come che nus pant Perès, si cjate une vere e propie miniere lessicâl di mûts di dî, metaforis, espressions che a fasin riferiment a situazions e a compuartaments cjapâts de vite cuotidiane e di popul. Un furlan rampit, gjenuin, di savôr popolâr. Lant po a lei la tabele prontade di Celestino Vezzi si dacuarzisi che pre Antoni al jere verementri un soremestri come scritôr. Un model che al merte di tornâ a jessi let fûr par fûr, parcè che alì si impare simpri alc di gnûf, ma soredut a scrivi par furlan come cu va.
   Altris contribûts di chest numar a son opare di Roberto Iacovissi (“Domeni Zannier: persone, art e furlanetât” - Riflessions su la ultime opare “Cjavêi di lûs”), di Renzo Balzan (Plodn in Friaul / Sapade in Friûl) e il redazionâl (“I setante agns de “Academiuta di Lenga Furlana”). Di segnalâ ancje che inte part risiervade ae publicazion dai “Documents”, o cjatìn doi intervents, di Gianfranco D’aronco e di Sergio Cecotti, sul teme simpri momentôs de difese de nestre “autonomie speciâl”. Insom invezit si po cjatâ publicât il document prontât dal Comitât 482 ae ocasion de vignude chenti dal sot-segretari pes minorancis, Bubbico.
____________________________________________________________________________________________________________
La schede: PP.AA. Gnovis Pagjinis Furlanis - XXXIII / 2015 , Union Scritôrs Furlans, Tumieç 2015,
pp.55 .


Ladins dal Friûl” Diretôr responsabil : Renzo Balzan - Reg. Tribunâl di Tumieç n. 123 dai 09.03.98
Redazion : 33028 Tierç di Tumieç - V. Dandolo16 / tel. 0433/43696 / e-mail : ladinsdalfriul@gmail.com
F.I.P. (fotocopiât in propi) a Tierç di Tumieç (Ud) V. Dandolo 12 pes Edizions “Union Scritôrs Furlans”.
La publicazion e ven spedide es Bibliotechis dal Friûl, es Istituzions Culturâls Ladinis des provinciis di Bolsan, Trent e Belun, e a ducj chei che a mandin la lôr libare contribuzion doprant il C.C. bancjari nr.19162 dal “Banco di Brescia” (Filiâl di Tumieç) - codiç IBAN: IT50H 03500 64320 0000000 19162
Chest gjornâl inte sô version online si lu cjate tal sît : http://ladinsdalfriul.blogspot.it
Publicât cul sostegn de Provincie di Udin – L.R.24/2006 art.26