martedì 1 marzo 2016

Anade ( XIX ) n.3 Març 2016










Periodic-mensîl di informazion e culture sul cont de minorance celtiche
dai Ladins de Furlanie. Edizion par cure de associazion “Union Scritôrs Furlans”

Referendum par dividi la Regjon: si firme!

Mandi a Giulio Regeni, copât pe sô voie di justizie e di libertât

  O scugnìn vierzi chest editoriâl cuntun mandi a Giulio Regeni, il zovin ricercjadôr furlan di Flumisel copât ai prins di Fevrâr in Egjit. Vinars 12 di Fevrâr tal so paîs di nassince al è stât fat il funerâl, cu la partecipazion di tante int, ma cence sorestants, bandieris, coronis e televisions: cussì e à volût justementri la famee. Si vignaraial mai a savê la veretât su ce che pardabon al è sucedût? Probabilmentri no. A ’nd è di mieç masse interès, istituzionâi e economics. Ma la muart, anzit il martiri di Giulio, viodût cemût che lu àn copât, no po jessi stade par dibant. Giulio al jere un zovin brâf, cussient, che al bramave la justizie e la libertât, e par chest al à paiât viodût che in Egjit chestis aspirazions a puedin costâ inmò cjaris. A lui o sin agrâts pal esempli di coerence e di onestât inteletuâl che nus à dât. Mandi Giulio, par nô tu restarâs simpri un pont di riferiment fondamentâl.
   Passìn cumò a un altri argoment di atualitât che al sta interessant lis placis dal Friûl, dulà che e je stade inviade la racolte des firmis par podê rivâ a otignî il davuelziment di doi referendum: pe abolizion des UTI e pe istituzion di dôs provinciis autonomis inte cente de Regjon, sul model dal Trentin – Sud Tirôl.
    Doi i referendum proponûts, cemût che si à vût iniment trat: un abrogatîf dal atuâl sisteme des autonomiis locâls, fondât su disevot “piçulis-provinciis” o UTI (Unions Teritoriâls Intercomunâls), che a costaran tant cence vê in cambi cui sa ce grancj vantaçs, oltri che “antistorichis e antidemocratichis”, cemût che al à vût mût di definîlis pre Domeni Zannier, che di cheste iniziative al è un dai plui autorevui sostenidôr. Chel altri “propositîf” di un model istituzionâl diviers, fondât su dôs provinciis autonomis dal Friûl e di Triest, come che si è fat (e cun sucès) in Trentin – Sud Tirôl. Un model che al à bielzà dât di viodi di funzionâ concretementri ben, di costâ di mancul e di jessi in grât di determinâ il svilup economic dal teritori dulà che al è stât metût in vore, un teritori, chel dal Trentin – Sud Tirôl, che al presente des avualitâts cu la nestre regjon, come la presince di minorancis tuteladis di leçs regjonâls e nazionâls. Baste vê iniment sun chest cont la “cuestion ladine” che e interesse chescj teritoris e che, magari cussì no, no ven mai cjapade inte juste considerazion. Achil Tellini al semee propite che al vebi semenât par dibant e che il so sium di “Patrie Ladine”, dal Grison svuizar a Gurize passant pe Ladinie dolomitane, al sedi destinât a restâ dome une grande utopie, ma sperìn di no.
 Tra i ponts plui cualificants de propueste la valorizazion de vocazion mitteleuropeane di Triest e de nature strategjiche e policentriche dal Friûl, che al podarà vê plui cjâfs lûcs di provincie (Udin, Gurize, Pordenon, Tumieç), la valorizazion des minorancis linguistichis (ladine-furlane, slovene e todescje) e la destinazion ai comuns di funzions fondamentâls inte gjestion dal teritori. E po la sacrisante norme anticaste contignude al “pont 15”: un tet massim resonevul al vê di vê sedi dai aministradôr, sedi dai dipendents de regjon che di chei altris ents locâi e des societâts cun partecipazion publiche.
    La racolte des firmis e je partide ai prins di Fevrâr di Rivignan, dulà che tante int e je rivade dongje, des monts al mâr, par firmâ i referendum. Par oris une lungje file di int e à spietât cun pazienzie la sô volte, juste cemût che citadins cussients a vuelin jessi i protagoniscj dal propi destin. Cuant che un popul al vûl cun determinazion otignî che ce che i spiete par dirit democratic, nissun lu po fermâ. Cheste in fats e je stade la impression di cui che al à assistût ae presince de fulugne di int che e spietave di podê firmâ.
  Daspò chest prin apontament di Rivignan, al à fat savê il sindic di chel comun Anzil, la racolte des sotscrizions – indi siervin 500 daurman par presentâ i doi cuesîts referendaris al Ufici di Presidence dal Consei regjonâl che indi valutarà la amissibilitât -, e larà indenant in dutis lis placis de Furlanie. Sun chest cont si è daûr a meti jù un lis datis e i lûcs comun par comun.
  Il test dai doi cuesîts referendaris al è il risultât di un lavôr al cuâl a àn cjapât part aministradôrs locâi e tecnics, juriscj e professôrs universitaris, vuidâts dal sindic di Rivignan Mario Anzil (che di mistîr al fâs l’avocat), aurint inmò a part dai studis di Tizian Tessitori, il pari de nestre regjon e de sô specialitât. Ducj chei che a intindin dâ une man par sostignî cheste iniziative a puedin fâ riferiment al “Comitât referendari pe Regjon Friûl e Triest e pe abolizion des Unions Teritoriâls Intercomunâls”, Str. Leopardi 9 – 33061 Rivignan – Teôr (UD) – tuttiperilfriuli@gmail.com .
    Sperìn verementri che e vadi drete, movìnsi parcè che il popul furlan si disvei dal intruniment dulà che lu àn parât, co e je forsit une des ultimis ocasions di riscat pal Friûl prime di riscjâ di vignî glotût dal centralisim triestin e de macro regjon dal “Triveneto”. Inalore “Ducj pal Friûl”, e ducj a sotscrivi i referendum! (tarvos)




Ladins dal Friûl pag.2 - Març 2016                                                                               

DAL TIMÂF A LA LIVENCE
Economie: il Friûl al prove a tornâ a partî
Ma a nd è inmò des situazions di dificoltât


     Economie: il Friûl al prove a tornâ a partî ma e je inmò lontane la vere riprese dal so sisteme economic. Dopo un bieni 2013-2014 verementri “neri” il 2015 al à concedût i prins segnâi di tregue. A tentin di tornâ a alçâ, pûr tra mil dificoltâts, la fiducie e la ocupazion dal setôr industriâl. Il terziari (cumierç, turisim, servizis) al continue invezit a jessi in dificoltât, ancje se lis prospetivis a semein jessi in miôr. In assolût, tal sôl 2015 il Friûl-V.J. al à pierdût mil e 38 impresis: belanç evidentementri no lusorôs, ma dut câs miorât rispiet ai dâts cetant negatîfs dai agns denant.
   Scomencìn dai aspiet positîf. Scomencìn di une des fabrichis plui impuartantis dal nestri sisteme industriâl, la Electrolux di Purcie. Il viaç viers la Polonie di produzions realizadis a Purcie, al jere scomençât intai prins agns ’90. In Polonie Electrolux e à creât un distret dal “blanc” cuntune fabriche “zimule” di chê di Purcie che cul passâ dai agns e jere deventade simpri plui grande, simpri plui competitive. Cumò par altri alc al semee che al stedi cambiant. A mancjin inmò i dâts, i numars, la valutazion sui efiets. Ma la notizie che juste de Polonie a staressin par rivâ volums di realizâ a Purcie e je une di chês che a fasin tirâ un suspîr di solêf.
     A determinâ la pussibilitât di une “delocalizazion al contrari” e sarès la saturazion dal stabiliment polac, no plui in grât di rivâ a fâ front ai ordins intai timps curts pratindûts dal marcjât. Inmò di definî lis cuantitâts, o ben cetantis laveblancjarie in rientri e par cetant timp, ma chest al reste dut câs un segnâl une vore impuartant. Bisugne par chest ricuardâ che chê di Porcie e je stade, tra lis fabrichis di Electrolux presints in Italie, chê plui penalizade de ultime ristruturazion decidude de multinazionâl svedese, tant che a un ciert pont si jere di fevelât fintremai di une sô pussibil sierade.
    Altre situazion che si sta risolvint in maniere positive e je che de Weissenfels di Fusinis di Tarvis. La fabriche e je stade cuistade in fats de japonese Kito. La aste dal tribunâl e à dât juste apont chest risultât. Cheste darest e je stade la uniche ufierte rivade su la scrivanie dal curadôr dal faliment, Paola Cella. Uniche ma par nuie trascurabil. Par Weissenfels, Kito e à ufiert 5 milions di euros, plui 1 milion par sigurâ l’esercizi provisori e 250 mil euros par intervents sui machinaris. Totâl: 6,25 milions. Oltri al impegn di tornâ a cjoli sù a vore ducj i 65 dipendents. In sumis lis prospetivis a semein buinis. E ducj, dai lavoradôrs passant pal sindic di Tarvis aes parts sociâls, a sperin che e sedi finalmentri la volte buine, dopo i tancj cambis di gjestion. Dal 2000, cuant che la famee Melzi e à vendût la aziende ae Pewag, chel di Kito al è il cuint passaç di man. Al merte ancje memoreât che la aministrazion comunâl di Tarvis, par sostignî la fabriche e i siei lavoradôrs e à metût dal so comprant i mûrs dal stabiliment cuntun mutui. “O vin fate la nestre part cun cussience – al à dite il sindic Carlantoni – cumò sperìn che Weissenfels e i siei lavoradôrs a puedin vê un pôc di respîr. Sperìn che la aziende e puedin tornâ a riprendisi in curt. Dismentein chescj ultins agns, cetant travaiâts e cun masse problemis”.
   Bens lis robis a stan lant ancje alì de fabriche di ocjâi Safilo di Martignà, dopo agns di crisi e di dificoltâts. Cussì a son rivâts gnûfs machinaris e la fin de solidarietât. E inmò cuntune idee in plui: ingrandî il sît produtîf aes puartis di Udin. In fats in Friûl, oltri al confezionament finâl dai ocjâi, al rive il cicli complet dal acetât, lavorazion che si integre cul stabiliment di Santa Maria di Sala, in provincie di Vignesie.
   I gnûfs machinaris – uns vincj – a son bielzà a Martignà e a son in funzion. Partant il cicli complet dal acetât al è aromai une realtât, in linie juste apont cul plan di svilup presentât a so timp de aziende. E chest graziis al un procès di “rientri a cjase” almancul di part de produzion che diviers grups, e no dome Safilo, a vevin puartât tal forest ae ricercje di vantaçs competitîf determinâts, par esempli, dal bas cost dal lavôr presint in diviers Paîs dal Est European.
      E je tornade a partî ad in plen la produzion ancje ae distilarie Domenis di Cividât. A dî la veretât lis premessis no jerin, gran, buinis. La conferme in Cassazion de condane de aziende a paiâ 12 milions di euros di multe ae Agjenzie des doganis, il faliment e il conseguent vignî mancul di un dai ponts di riferiment dal compart agrialimentâr furlan. Il destin aduncje al semeave dibot segnât, e invezit ae fin dut al è lât pal miei. Dopo vot mês di esercizi provisori, gjestît dal curadôr falimentâr, Roberto De Luca, il tribunâl di Udin al à in fats assegnât la storiche distilarie Domenis a Alain Roubeli, imprenditôr svuizar inamorât, lu à dite lui, di cheste aziende model. Metude sù la “Newco Domenis 1898 srl”, Roubeli al à cjapat part ae gare vincint la aste cuntune ufierte di 3 milions di euros. La distilarie e à cussì podût tornâ a inviâ la sô avititât, proponintsi di cjaminâ tal segn de continuitât, zontantle dut câs cu la inovazion.
    Mancul buinis a son invezit lis notiziis che a rivuardin la Stratex spa, storiche aziende cun uficis e stabiliments a Palaçûl e Sudri in Cjargne, partecipade al 28,57 par cent de finanziarie regjonâl Friulia. Ae fin dal mês di Zenâr stât il tribunâl di Udin indi à declarât il faliment, decretant in cheste maniere la fin di une ativitât imprenditoriâl cressude intai agns, fint al pont di rivâ a imponisi sul marcjât mondiâl dal setôr dal len e, in particolâr, de bioedilizie e de produzion di struturis in len lamelâr, e di cuistâ impuartants apalts, oltri che in dut il marimont, ancje al Expo 2015 di Milan.
     Il belanç dal 2014 de Stratex si jere sierât cun rigjâfs di passe 30 milions e l’implei di 150 lavoradôrs su trê turnis. Ben al semeave che al fos lât ancje chel dal 2015, soredut dopo che a jerin stâts cjapâts i apalts dal Expo. A meti in dificoltât la Stratex no je stade, aduncje, la mancjance di ordins, ma il probleme dai credits. O sei il ritart infinît par rivâ a incassâ paiaments par milions di euros. Un efiet de crisi, in sumis, che, zontât ae esposizion par ciertis gruessis comessis in cors, e à finît par meti in zenoglon la struture produtive. Pe Cjargne naturalmentri al è stât ancje chest un dûr colp.
     Il Friûl al prove a tornâ a fâ partî la sô economie, ma la strade e reste inmò di rive sù. Sperìn in alc di miei dilunc chest 2016. (renzo balzan)




Ladins dal Friûl pag.3 – Març 2016

CRONICHIS DI CHENTI
La viertidure dal gnûf An Academic de nestre Universitât
Intant di Rome e je rivade la autorizazion a formâ
docents pal insegnament dal furlan

Udin – Universitât di Udin: viertidure dal gnûf An Academic, il trentesim-otâf . “O vin cjapade la direzion juste, o stin rinfuarçant lis aleancis istituzionâls e teritoriâls che a coventin, o stin investint intes infrastruturis di ricercje e di didatiche, l’ambient dentri vie al è dai miôr e la atenzion aes risorsis umanis e je la massime che o podìn meti in vore”. Plui che une relazion chê lete lunis stât, 25 di Zenâr, inte aule magne di plaçâl Kolbe dal magnific retôr, Alberto Felice De Toni, e je stade une sorte di lezion di otimisim. In sedis pagjinis, De Toni al à segnât la trate in a vignî dal ateneu dal Friûl che nol po trascurâ, gran, la sô storie, ilustrant lis aleancis pussibilis fasint jeve sul dialic cul teritori. Chest par podê mantignî la fisionomie di un ateneu flessibil, bon di interpretâ i mudaments e di rispuindi cun azions validis ai sogjets istituzionâi e teritoriâi. Intant une sfide e je bielzà stade vinçude: il ministeri, il passât 22 di Zenâr, al à finalmentri autorizât l’ateneu a istituî il cors di formazion dai docents pal insegnament de lenghe furlane intes scuelis dal oblic.
  Cussì par cierts aspiet o podìn dî che e je stade une viertidure di An Academic fûr dai schemis. De Toni invezit di fermâsi a contâ des cronichis dificoltâts dal sisteme universitari, al à vût miei resonâ su lis aleancis pussibilis cul teritori: “Lis universitâts a puedin deventâ partner struturâi di ricercje des piçulis e mediis impresis”, al à displeât il retôr memoreant che i neu laureâts e i neu dotorâts coinvolzûts in chescj progjets di ricercje a rapresentin la jone fondamentâl dal procès. Une sielte condividude ad in plen ancje dal president de Piçule industrie, Alberto Baban, e dal president di Almalaurea, Ivano Dionigi, intervignûts intant de cerimonie.
     In sumis il retôr al ponte su la ricercje e sui trasferiments tecnologjics parcè che al sa che, chescj risultâts, insiemit ae cualitât de didatiche, a vegnin valutâts dal ministeri pe assegnazion de cuote premiâl dal Font di finanziament ordenari (Ffo) graciis al cuâl la universitât di Udin e à podût tornâ a ripiâsi. E po e à inmò podût fâlu ancje graciis al impuartant contribût che ogni àn no fâs mancjâ la Fondazion Crup (Casse di Sparagn), ai tais des spesis e ai fonts europeans. Tornant ae ricercje, De Toni al à vude iniment une altre strade di bati che e je chê de creazion dai cussì clamâts spin-in cui grancj grups industriâi, che par evitâ lis resistencis internis ae inovazion, a crein aziendis parelis coinvolzint i talents des universitâts.
    Par vinci cheste sfide, il nestri ateneu si è indotât dai plans strategjics invidant i dipartiments, passâts da 14 a 9, “a individuâ lis tratis inovativis sientifichis e didatichis dulà che a intindin impegnâsi”. Par realizâlis a ricevaran 10 milions di euros in trê agns. “A saran doprâts – al à sotliniât De Toni – in infrastruturis pe ricercje e la didatiche cul fin di miorâ lis ativitâts sientifichis e educativis. Un sfuarç dabon significatîf – al à inmò ripetût De Toni – che al da di viodi un ateneu che al vûl tignî il pas cu lis miôr universitâts talianis. Un sfuarç che al permetarà a Udin di infuartî il so jessi universitât gjeneraliste cun 2.868 gnûfs laureâts vignûts fûr tal ultin an. Ma ancje par restâ inte classifiche de Agjenzie nazionâl di valutazion de ricercje (Anvur), “sore la medie nazionâl in nûf areis sientifichis su lis sedis scrutinadis. In chestis nûf areis al opare – a son simpri peraulis dal retôr – passe l’85 par cent dai nestris docents”. Impuartante e reste la partecipazion ai bants publics: “Tal 2015 i ricercjadôrs a àn presentât 107 progjets di ricercje dai cuâi 102 internazionâi, tra chescj cinc pe cooperazion internazionâl. I tas di sucès storic – al è rivât insom De Toni – a son comprendûts tra il 15 e il 20 par cent e nus fasin ben sperâ”.
   Sul front de didatiche il vêr risultât di rilêf che si è rivâts a otignî al è chel de autorizazion a formâ insegnants di furlan. In efiets l’insegnament de marilenghe a scuele al à vût dai problemis juste apont pe mancjance di un numar bastant di docents cualificâts e azornâts. Bati cheste strade al è fondamentâl, come che e da viodi la esperience dal insegnament de lenghe ladine inte Ladinie dolomitane, cu la creazion di une “Soreintendence Scolastiche Ladine”, pe redazion dai tescj di doprâ a scuele, pal azornament costant dai docents, pe verifiche puntuâl dal lavôr davuelt. In conclusion o podìn dî chest gnûf An Academic al promet ben, sperìn dome che ce che al è stât imprometût al vegni mantignût.
   In fin no si po no vê iniment che la prolusion uficiâl pe viertidure dal gnûf An academic e je stade davuelte al professôr Andrea Risaliti, ordenari di Chirurgjie gjenerâl, e diretôr dal Centri di traplants de Aziende ospedalire-universitarie Sante Marie de Misericordie, che al à vût mût di fâ la storie di chest Centri, innomenât e preseât a nivel nazionâl, ma ancje par ricuardâ che i traplants a àn bisugne dal supuart fondamentâl dai donadôrs di orghins.
    La peraule la àn naturalmentri cjapade, secont la tradizion, ancje il president dal Consei dai students, Laurinç Ganna, la rapresentant dal personâl tecnic, Carle Rigon, e l’assessôr regjonâl ae Ricercje e universitât, Loredana Panariti, che è à vût mût di visâ che chest an, daûr des sieltis de leç di stabilitât al sarà destinât de Regjon scuasit un milion in plui al sisteme universitari regjonâl. Al è sarès naturalmentri interessant savê trops bêçs che a son stâts destinâts a Udin e trops par Triest? (mateu di prun)
________________________________________________________________________________________________________________________________________________
Dirit al studi: in otante a son restâts cence lozament

Udin – Chenti a son stâts otante i students che tal 2015 a son restats escludûts dal alozament sovenzionât. Lu à ricuardât Laurinç Ganna, president dal Consei dai students, indreçantsi al assessôr regjonâl Loredana Panariti e ai maiorents presints ae scree dal trentesim-otâf An Academic de nestre Universitât: “Si ben che sul plan dal dirit al studi il Friûl al rapresenti inmò une isule fortunade tal dramatic panorame nazionâl – al à sclarît – al è impuartant che la figure dal student e torni a ocupâ une posizion di rispiet e di centralitât”.
    Sul teme dal dirit al studi al è tornat ancje il president di Almalaurea; Ivano Dionigi, riproponint la sô propueste di za timp. Vint iniment la Costituzion, Dionigi al à ricuardât che “i students che a mertin, ancje se cence mieçs, a àn dirit di rivâ fint ai grâts plui alts dai studis. Il confront cun chei altris Paîs europeans al è impietôs: no pain lis stassis, a imparin lis lenghis e a cjatin un lavôr”.
    E inmò: “Us semeial just che un student al lei inte bacheche che al à dirit ae borse di studi e tal stes timp lu visin che la sô domande no po sei acetade pe mancjance di fonts?”. Al è evident che cun chestis logjichis no si va di nissune bande. Altri che la “Buona Scuola!”. (mdp)




Ladins dal Friûl pag.4 – Març 2016    

DOCUMENTS
Sergjo Cecotti: lis fasis de “Cuestion Furlane”
Resonant inte dade dal inovâl di fondazion dal “Moviment Friûl”



 Cuant che, in a vignî, cualchidun al scrivarà une storie resonade dal furlanisim politic, la dividarà in fasis distintis, disseparadis in maniere nete in dadis di timp dulà che la “Cuestion Furlane” e disparìs dai radar de politiche par (al scrîf Pasolini) “jevâsi sù dal Friûl sul cîl che al sta parsore il Friûl”. Ogni fase “di tiere” dal autonomisim e à saborât une sô “gnove” Cuestion Furlane, definide de realtât sociâl, economiche e culturâl dal Friûl dal so timp e da specifichis contradizions tra aspirazions furlanis e imposizions dal podê. Ogni volte che la evoluzion storiche e à superât (cence rivâ a cjatâ la fate dal probleme) chestis contradizions, la particolâr version “di tiere” de Cuestion Furlane e à esaurît la sô utilitât storiche: une fase si è sierade e i moviments politics e lis personalitats che indi jerin stâts protagoniscj a àn lassât la politiche tiere-tiere pal cîl des ideis. La discontinuitât tal timp dal furlanisim politic e po semeâ (e, par cualchi aspiet, efetivementri e je) une sô debolece struturâl. Invezit e je cjosse buine. Partîts e moviments a nassin come rispueste a contradizions de realtât storiche; la maiôr part dut câs e continue a operâ ancje cetant timp daspò che il svilup storic al à superât lis cuestions che a jerin la lôr cussì clamade “raison d’être”. E chest parcè che chescj partîts si trasformin in maniere inviade in scletis machinis di podê, vêrs autobus par oportuniscj; partîts di cheste sorte no molin, gran, il vues dulà che a raspin pal sempliç fat che la lôr storie e je finide. Par chest, ogni futûr storic dal autonomisim al scugnarà ricognossi che la discontinuitât al è segn de onestât storiche dal furlanisim, che mai si è stramudât intune coriere par oportuniscj e mai al à “tirât a campâ” a Andreotti vie. Al è risurît, simpri gnûf, ogni volte che indi è stade une ogjetive necessitât storiche, e mai al à acetât di stramudâsi in caste pûr di sorevivi ae sô stesse necessitât. In chescj dîs a vegnin celebrâts i 50 agns di fondazion dal Moviment Friûl. Il MF e i siei esponents a son stâts i protagoniscj de seconde fase autonomiste che e va de fondazion de Regjon Autonome Friûl-Vignesie Julie al ribalton de prime Republiche, circje un cuart di secul. Il MF al à incjarnât la “gnove” Cuestion Furlane dai agns Sessante, cuant che la nassince de Regjon Autonome e à mudât il sens e i orizonts de politiche autonomiste. Il teme strategjic di chê fase e jere la nature stesse dal gnûf istitût regjonâl, il so jessi pardabon autonom e promotôr di svilup, un teme non disseparât dal probleme dai rapuarts di fuarce tra teritoris dentri vie de Regjon. La liste des rivendicazions e cjapave dentri: il ricognossiment uficiâl dal Friûl come Comunitât dotade di une lenghe propie, cui dirits conseguents; il recupar dal ritart di svilup economic e culturâl, cu la istituzion di une Universitât a Udin e la metude in vore di politichis ativis pal infuarciment de struture produtive; la fin dal ûs militâr dal teritori, o almancul une adeguade compensazion in vê di vê.
     Intai agns daspò il Moviment Friûl al sclarì miôr il propi cuadri ideâl, cjapant part al disveament des “Patriis improibidis” in dute la Europe, e rivant a une coerente impostazion nazionalitarie che, graziis in particolâr a Adrian Cescje, di chê volte e svuale alte tal cîl sore vie dal Friûl. Il nestri storic futûr al volarà fâ un belanç di cheste seconde fase dal furlanisim. Provìn a induvinâ cualis che a podaressin jessi lis sôs conclusion. In tiermins di strete aritmetiche eletorâl no si podarà dî che il Moviment Friûl al vebi mudât i ecuilibris gjenerâi. In ciertis ocasions il MF al à vût risultâts eletorâi dut altri che di dispreseâ, ma il podê in Regjon al è restât in maniere salde intes mans dai partîts espression dal guvier centrâl. Il judizi storic al è dut câs cjosse divierse de aritmetiche eletorâl: vinci lis votazions nol vûl dî jessi utii in tiermins storics. Par un belanç resonât, o scugnìn invezit partî dai ponts programatics e viodi in ce misure che a son stâts realizâts. Su chest plan e “su la cjarte” il Moviment Friûl al podarès declarâ il propi trionf: i furlans a son stâts ricognossûts par leç come Comunitât linguistiche storiche, la Universitât a Udin e je stade istituide, il nestri redit pro capite al è intes parts altis des classifichis, l’ûs militâr dal teritori al è ridot a pocje cjosse. O dîs “su la cjarte” parcè che ciertis contradizions, come chê linguistiche, a son stadis superadis in tiermins formâi, ma no di sostance, mentri il nestri benstâ economic al è daûr a palesâsi clopadiç.
     Passant a un altri plan, il storic futûr al disarà se il no vê formât il personâl politic de tierce fase al è un merit dal Moviment Friûl o pûr une sô pesante responsabilitât. Come part di chê tierce storie, mi asten dal rispuindi. Al reste il fat che la tierce fase, pûr esprimint une “gnove” “Cuestion Furlane” une vore divierse par temis, rivendicazions, e forme de azion politiche, e fos fie de culture politiche che il MF al veve semenât tal cîl di Pasolini che nus sta parsore a ducj. Personalmentri o crôt che il belanç al vadi valutât suntun plan inmò diviers, chel “de intimidazion strategjiche”. O intint dî la capacitât di obleâ chei che a rezin il podê “ a stâ drets in rie”, metint in cjamp une alternative ae lôr paronance buine di stramudâsi intune grande lavine eletorâl se il podê al rive a folpeâ i interès dal teritori oltri ce che al è pussibil tolerâ. Inte ocasion dal taramot, il Stât al metè in vore in Friûl proviodiments e trasferiments di podê che no si son viodûts in nissun altri disastri, ni prime e ni daspò. Vuê o savìn che chest al è sucedût parcè che il podê al sintì fuarte e clare la menace di une ribelion politiche slargjade dai furlans. Une menace che e veve il cuarp dal Moviment Friûl e la anime di Glesie Furlane che si jere metude cun grande restivece a difindi il popul taramotât. La ricostruzion dal daspò taramot e je stade il moment plui alt de storie furlane dal ’900: il vê davuelt cun condurance la funzion di “scatûr dal podê” in chê circostance, e je reson bastant par declarâ une vore positîf il belanç de esperience storiche dal Moviment Friûl. E je ancje une storie educative: intun moment (come chel di cumò) che il podê al è cence vergogne, al sarès ben che al ves almancul pôre.
(Sergjo Cecotti – test tirât fûr dal Messaggero Veneto dai 9 di Zenâr 2016 e voltât par cure de redazion)




Ladins dal Friûl pag.5 – Març 2016

JOSEF MARCHET: I GRANCJ OMS DAL FRIÛL
Zuan Martini: intaiadôr e pitôr di grande valence
La sô trate artistiche e je passade de tradizion a une origjinâl inovazion

    Cressût fra sgoibis e pinei, fi, nevôt e fradi di pitôrs intaiadôrs, Zuan Batiste di Martin Mioni al è un tra i plui preseâts rapresentants de plui innomenade cjasade di artiscj furlans: chê dai Tumiezins. Se chest maiôr revoc al rispuindi pardabon a un maiôr livel artistic, massime intai rivuarts dal barbe Domeni e di Zuanfrancesc, al è un altri discors: al dipent dal gust gjenerâl di une ete e di chel personâl di cui che al valute.
    Chê dal intaiadôr e je une ocupazion comun intai paîs dal len e dal frêt. In Cjargne, come in dutis lis regjons alpinis di ca e di là des Alps, i Inviers luncs a slaifin ogni ativitât. Cussì i oms a cjapin in man un tronc o une bree di len dolç e a realizin dai lavôrs di intai, plui o mancul rifinîts. In cheste maniere si forme e al vîf un artesanât domestic minôr. Dut câs di cheste ativitât minôr e po divignî une art dal intai che a voltis e cuiste – come che al sucedè intes daprûf regjons di là des monts – une vere ecelence: glesiis e museus, soredut in Austrie e in Svuizare, a son plens di sculturis di len tratadis cun grande maestrie.
    Intai nestris paîs di mont, un pôc di mancul, ancje parcè che la opare dai nestris intaiadôrs e veve miei dedicâsi ae decorazion e realizazion di ogjets che si dopravin ogni dì. Innomenade par chest cont la Val Celine. Cundut achel bogns lavôrs di intai no nus mancjavin, a partî dal Tresinte, mentri a son cetant plui numerôs chei realizâts inte seconde mitât dal Cuatricent e inte prime mitât dal Cinccent. Darest al jere chest il timp dulà a jerin ativis inmò lis buteghis di intai de Pusterie e de Carintie, dulà che Michêl Pacher al veve puartade chê art a une ecelence mai plui superade. E i tirolês-carintian a verin ancje une clientele inte nestre diocesi di Aquilee, dulà che di Pontebe a Vîc di Cjadovri si puedin viodi inmò dai esempli di “Flügelaltäre” (altâr a sportei).
    Inte buteghe di Domeni Mioni, dulà che a lavorave ancje Martin, so fradi, al varà imparade la art e fatis lis primis provis il fi dal stes Martin, Zuan Batiste, che i plaseve fâsi clamâ Zuan Martini. Se il Joppi al à let ben, dal 1478 al 1480 il Martini al fo un associât dal Consei citadin di Udin: e inalore bisugne pensâ che al fos nassût a Tumieç, pôc prime de mitât dal secul e vignût jù a Udin inmò di zovin. Ma inte buteghe dal pari e dal barbe, il so lavôr al devi jessi restât anonim e confondût cun chel di chei altris maestris e garzons, tra i cuai par cualchi timp al fo ancje Piligrin di San Denêl.
    In chei luncs agns di lavôr cidin, al semee che e sedi madressude in Zuan une ribelion spirituâl che lu saborà, cuant che al veve forsit bielzà cuarante agns, a lassâ chel ambient masse “artesanâl” e a cirì par cont so – sul esempli di Piligrin di San Denêl – une strade divierse e plui prometint. Par chest al le a Vignesie e si metè ae scuele di Alvise Viviani; al lassà forsit dal dut la art dal intai par dedicâsi dome ae piture. Viers la fin dal secul al tornà a Udin dulà che al vierzè une buteghe par cont so, cun proposits ben determinâts. Al scomençà a firmâsi “Zuan Batiste di Udin” o pûr “Zuan Martini Udinês”; e intune des sôs primis taulis (1498), che cumò si cjate al Louvre, al zontà, cun svant, la cualifiche di “dissepul di Alvise Viviani”. Sot il prudêl di tant non e innomine di modernitât, nol tardà dal sigûr a cuistâ un ciert preseament. Chest al è testemoneât dal fat che, a scomençâ dal 1501, il materiâl di archivi relatîf ae so ativitât al devente cetant abondant. Si trate di comissions, acuardis, transizions, richiestis di paiament par une desene di pituris, par passe cuarante lavôrs di intai (pal plui anconis di altâr cun diviersis statuis) e par une vintine di palis.
     Di chescj documents al semee di capî che, daspò lis primis oparis di piture logadis a Udin o in cualchi centri impuartant de Regjon, il Martini a vebi di jessisi rindût cont che dome di chê art nol varès podût vivi, parcè che i clients plui numerôs – chei des glesiis di paîs – a restavin fedêi al gust tradizionâl dal intai. Tant e tant si cjatà obleât al tornâ al so vieri mistîr, sevi pûr zovantsi in cualchi misure des sôs esperiencis venezianis. Intant al jere muart il barbe Domeni e lui indi eredità la clientele.
    E cul lavôr i vignì ancje une cierte siorie, che i permetè di furnî di une dote di gale siet fiis. Si jere stabilît ancje lui, cun cjase e buteghe, in Borc di S. Cristoful e si jere maridât dôs voltis. Al semee che i siei paisans cjargnei, intune cierte maniere, a vebin ricambiât la sô albasie intai lôr rivuarts. In fats, biel che intes vals plui lontanis al lavorave Zuanfrancesc cui siei dissepui e si realizavin inmò i intais gotics pusterês di Nicolau di Brunic, di Michêl Barth, e di altris maestris todescs, il Martini al rivà a postâ venti sù dome trê anconis tal Incjaroi (Rualp, S. Vît e Gjeri), une a S. Pieri di Zui e une a Paluce. Zuan al murì a otante agns tal 1533 e al fo soterât a Udin inte glesie di S. Pieri Martar. Al lassà cuatri fîs pitôrs-intaiadôrs, che a seguirin lis sôs olmis: Vicenç, Zuan, Jacum e Pauli: Vicenç e Jacum, i plui atîfs inte art a verin a lôr volte fîs e nevôts che a continuarin la ativitât, cun risultâts dutcâs di modest valôr.
    Al è verementri strani che de sô produzion cussì abondant e sparniçade ator par dut il Friûl, chel che nus reste al sedi ben pôc: une dozene in dut, tra pituris e oparis di intai, part inte sede di destinazion, part logadis in diviers museus. Di chescj lavôrs il plui antîc al semearès l’altâr in len de glesie parochiâl di Paluce, realizât forsit inmò inte buteghe dal barbe Domeni: al è in fats l’unic che al conservi la tradizionâl architeture gotiche, mentri lis statuis a presentin in maniere clare i caratars plastics dal Martini. Il plui maestôs, invezit, dai altârs intaiâts di lui, al è dal sigûr chel di Mortean, realizât tal 1526. Si trate di une struture architetoniche a cuatri plans, cun passe cincuante statuis di divierse misure, isoladis o in grups. La curnîs decorative, fate di motîfs rinassimentâi, e je complesse. In sumis une vere opare maestre di origjinâl inovazion par chei timps. (Josef Marchet – tirât fûr da “Il Friuli: uomini e tempi” - test ridusût e voltât par furlan par cure de redazion)




Ladins dal Friûl pag.6 – Març 2016

DAI FATS E DE CULTURE
DES TIERIS LADINIS

IL “Museum Ladin” al à cuindis agns

Interviste a Stefan Planker, diretôr di cheste fondamentâl istituzion culturâl

San Martin de Tor / St. Martin in Thurn (Bz) – Za fa cuindis agns, tal 2001, al vignive screât a San Martin de Tor , in Val Badie, il “Museumladin” (Museu Ladin), logât suntun çuc parsore il paîs intun vieri cjistiel (il Ciastel de Tor) ristruturât e adatât par acolzi la gnove istituzion culturâl. Si è tratât di une iniziative volude de comunitât ladine dolomitane, e sapontade de Zonte de Provincie autonome di Bolzan/Bozen par concori a difindi, valorizâ e infuartî la cussience etniche-culturâl de plui piçule comunitât di minorance dal Sud Tirôl, dulà che e convîf juste apont cu la comunitât todescje (maioritarie) e taliane. Al merte a chest rivuart memoreât che a San Martin de Tor al è logât ancje l’Istitût Ladin “Micurà de Rü”, altre fondamentâl istituzion culturâl a sostegn de cause ladine intes valadis di Badie e Gardene.
    Diretôr, de fondazion in ca dal “Museumladin” al è il dr. Stefan Planker, che a so timp si è laureât inte nestre Universitât di Udin in conservazion dai ben culturâi, che cussì al cognòs une vore ben sedi il Friûl che i furlans. Par ricuardâ chest inovâl de fondazion, e par fâ un belanç dal lavôr davuelt, e di chel che si intin puartâ indenant in a vignî, Planker al è stât intervistât dal sfuei “La Usc di Ladins”. De interviste, realizade di Plabo Palfrader, o vin racuelt i passaçs plui significants, voltantle naturalmentri par ladin furlan.



D. Diretôr, di mieç an in ca e je presint tal Museum di San Martin la mostre su la prime vuere grande. Ce riscuintri aie vût e cetant int ise passade a visitâle?
R. E à vût cence altri un bon riscuintri. A son passadis a visitâle cetantis scuelis, oltri naturalmentri ae int, rivade ancje di lontan. O sin rivâts a passe cinc mil visitadôrs, dut câs la mostre e larà indenant a restâ vierte fintremai ai 26 di Jugn cu ven.
D. L’Europeada, il campionât di balon des minorancis, si davuelzarà in Sud Tirôl e ancje in Val Badie. Il moment culturâl di cheste impuartante iniziative si varà ai 22 di Jugn cu ven, propite tal Museum di San Martin. Ce isal in program sun chest cont?
R. O sin daûr a inmaneâ la manifestazion parie cul Istitût Ladin “Micurà de Rü” e l’Assessorât Ladin. Daspò la presentazion de manifestazion sedi i zuiadôrs, che cui che ju compagne, a saran compagnâts a visitâ il Museum. Si varà la pussibilitât di stâ insiemit e imparâ a cognossi altris realtâts di minorance. Oltri a chest o stin studiant altris iniziativis par slargjâ la ufierte culturâl.
D. Si saial bielzà cui che a saran i relatôrs de manifestazion?
R. Al vierzarà i lavôrs Hans Martin Hinz, che al è il president dal ICOM, la organizazion mondiâl dai museus. Al tignarà il referât principâl sul cont de etiche museâl. Altris relatôrs a rapresentaran la minorance slovene dal Friûl, la minorance danese de Gjermanie, la minorance todescje in Danimarcje, e inmò altris minorancis de Europe che o sin daûr a definî.
D. Ce oportunitâts si podarano vê pal Museum Ladin di chest confront internazionâl di minorancis?
R. Buinis oportunitâts, pe dimostrazion di organizazion che o podìn dâ di viodi, e fâsi naturalmentri cognossi inmò miei. Darest par une minorance al è naturâl vê un museu. A ’nd è plui formis di organizazion museâl, ancje se chê etnografie e je la plui presint e cognossude. Nô oltri a cheste impostazion, clamìnle cussì tradizionâl, o vin zontât ancje altris aspiets, come la storie de le lenghe e la proposizion di events di promozion artistiche dal teritori, des arts visivis ae leterature, aes mostris tematichis.
D. In cheste suaze che al à vût iniment e jentre naturalmentri ancje la “Trienala Ladina”, curade dal
artist Richard Agreiter?
R. Naturalmentri sì, ancje se Agreiter nus lasse par une cuestion gjestionâl. Ma il progjet pe valorizazion dai artiscj ladins al larà indenant. O sin daûr a resonâ parsore par cjatâ fûr lis sieltis plui justis.
D. Ma il Museum Ladin al à burît, e al sta burint fûr ancje des publicazions tematichis. O ricuardìn par esempli chê dedicade di resint ae “Stube”. Dut câs si sa ancje che al è daûr al à dibot in stampe un altri libri, dedicât ae eroesse ladine Catarina Lanz e curât dal dr. Lois Craffonara. A ce pont ise cheste ultime iniziative editoriâl?
R. In efiets in lavôr dal dr. Craffonara al è bielzà in stamparie e o stin organizant la sô presentazion, che si davuelzarà a Al Plan de Mareo. A dî la veretât bielzà tal 2004 il Museum al veve dedicade une piçule sezion sul cont di Catarina Lanz. Il dr. Craffonara al veve inviadis par chest des ricercjis di documents di archivi. Chest lavôr al è stât po slargjât e al è deventât in fin il libri che o sin daûr a stampâ.
D. Al è stât dite che pe Val Gardene e je in prevision une publicazion di Franz Josef Noflaner?
R. Tal 2012 al è vignût fûr un album suntune mostre dedicade al Noflaner, che al è stât un artist, e un leterât, dismenteât. O stin preparant juste apont une publicazion sul so cont, in colaborazion cul Istitût Ladin. La vore e sarà dispartide in doi volums: une part artistiche e une part leterarie. O pensìn di rivâ a presentâle dentri il mês di Novembar cu ven.
D. Il Museum al è daûr a taiâ il travuart dai cuindis agns de sô presince. Cuâi son i svilups plui impuartants che o vês in program?
R. A livel struturâl o vin fat diviers pas impuartants. Soredut o vin inricjît e svilupât il Musem cu la sezion distacade di San Cassian, dedicade al “Ursus ladinicus”, che e à cognossût un grant preseament, soredut par chel che al inten la ufierte didatiche e de informazion, formazion, ambientalistiche. O stin lavorant a San Martin par miorâ la ativitât di racuelte e colezion di gnûfs materiâi, che nus daran la pussibilitât di programâ des mostris tematichis. I unics problemis che o vin a rivuardin i tananais burocratics, che dispès nus imberdein la ativitât, ma cheste e je aromai une realtât comun che tocje frontâ. Pal rest o podìn dî che il nestri Museum al sta gjoldin di une buine salût e pal avignî o pensìn naturalmentri in positîf. (edelweiß)




Ladins dal Friûl pag.7 - Març 2016  

INTAI PRÂTS DE CULTURE FURLANE
Renzo Valente: la pene che e à contât Udin
Ricuardât ae Biblioteche Joppi tal inovâl dai cent agns de sô nassince

Udin – Ai 14 di Zenâr al colave l’inovâl dai cent agns de nassince di Renzo Valente, gjornalist e scritôr che par cetancj agns al à “contât Udin”. Nassût a Sampierdarena (Gjenue) tal 1916 di gjenitôrs furlans, dal 1939 al è stât redatôr dal cuotidian “Il popolo del Friuli”, dulà che al à lavorât, salve la parentesi de vuere, fint al 1945. Daspò de vuere al à colaborât a “Avanti cul brun” e “Iulia gens”. Dal 1964 al 1979 al è stât diretôr de “Il Friuli”, imprest di stampe dal Ent provinciâl pal turisim di Udin. Dal 1979 al 1983 lu cjatìn inte redazion dal periodic “Il Punto”. Tal 1962 al à publicât la racolte di memoriis autobiografichis, “Udine 16 millimetri” che e à vût un slargjât preseament al pont di tornâ a jessi stampade plui voltis (la ultime tal 1992). Tal 1972 al à curade la publicazion di une “Guida pratica della montagna friulana”, stampade in trê mil copiis. Al à vût il Premi Pifanie di Tarcint 1968.
     Ai 14 di Zenâr, juste apont, il “cjantôr di Udin” Renzo Valente, al varès finît cent agns e la sô citât nol lu à gran dismenteât. Par cheste dade la Civiche Biblioteche Joppi – dulà che Francesca Tamburlini di agns in ca e custodìs lis sôs cjartis – e à organizât un incuintri inte sale Corgnali. A jerin presints i stes personaçs che tal 1996 a palaç Belgrât i faserin fieste pal inovâl dai siei otante agns: il za sindic Pieri Zanfagnini, il diretôr dal Messaggero di chê volte, Sergio Gervasutti, il gjornalist Mario Blasoni e, naturalmentri, la Tamburlini, responsabil de sezion Manoscrits de Joppi. A son purpûr intervignûts il docent dal ateneu furlan Marco Rossitti, autôr di un videu su Plance Sant Jacum e Paolo Patui, che al à let un pôcs dai elzevîrs di Valente.
    “Rensuti” (cussì lu clamavin i amîs e chei di cjase) Valente al à simpri fat, cul so stîl garbât e origjinâl, il cronist dal cjâf lûc dal Friûl. Tal in prin inte redazion da “Il popolo del Friuli”, po ae direzion de riviste “Il Friuli”, in fin, cuntune propie rubriche sul cuindisinâl “Il Punto” di Pieri Fortuna. Ma il “bestseller” de sô cariere di scritôr si clame, cemût che denant trat si à vût iniment, “Udine sedici millimetri”, fortunade racolte di contis e elzevîrs su Udin, i siei personaçs, lis sôs atmosferis. I de un titul “cinematografic” che al rint ad in plen il so lavôr: ricostruî cun esatece fotografiche la vite de citât a traviers moments a pas ridot, viodût che si tratave di piçui, se pûr significatîfs acjadiments.
     Lis sôs “cronichis di Udin” al scomençà a publicâlis tal 1955, sul Messaggero dal lunis, dulà che si creà une tierce pagjine di culture locâl. La prime edizion e vignì fûr de stamparie tal 1962, indi vignirin po daûr une dozene di altris edizions. Volums insiorâts di prefazions impuartantis come chês di Dino Menichini, Tizian Tessitori e Turo Manzano. E inmò dai disens di artiscj tant che Pittino, Caucigh, Merlo e Mitri e, naturalmentri, des fotografiis-document di Tino di Udin.
     “Valente al à la rare, vuê meraculose capacitât – al scriveve il poete Menichini – di savê fâ muse di ridi di se stes prime che di chei altris”. Fintremai di chei di famee, come il famosis trê agnis di strade Manin che lu puartavin ae tombule de Madone di Avost in Zardin Grant (“Ogni an a lavin par un come che al jere stât par dute la vite cui oms: plui di une volte a forin li li par cjapâ sù un , ma no rivarin mai ...”. E al riduçave di Udin dai agns trente che al definive “une citât bonate, credulone, indulint, indulgjent, conciliant”. Cui siei personaçs carateristics, come il maestri Garzoni “in cane, code di sisile e patachis sul pet; il vuardian dal cjamp Moretti, che al lassave passâ i fruts di scuindon parcè che a lassin a viodi partide dal Udinês; la maestre Lavarini, il zardinîr Gjosuè, custodi dai zardins Ricasoli, il poete Emili Giradini aromai vuarp, che Renzo al compagnave a spas pe citât.
    Fint a pôc timp prime di colâ in cjase, cun conseguencis par lui cence plui rimiedi, Valente al continuà a “vigjilâ” su la sô citat, pront a dî la sô denant a sieltis brutis e soluzions urbanistichis di fâ riviel. Cualchi volte al semeave che al volès come molâ: “O soi stuf di ripeti simpri lis stessis cjossis”, al diseve. Ma po intes passizadis al cjatave chel o chel altri amì che i fasevin i compliments: “Tu âs scrit benon. Butâ jù il cine Eden e je stade une opare di vandai”. O pûr: “Eh, il Fornaretto, chel si che al jere un locâl... denant che a rivassin i cinês”. Cussì al tornave a cjapâ cûr e voie di scrivi. Sigûr, i argoments a jerin simpri chei (lis bielis rois aromai scuasit dal dut taponadis, il trafic des machinis fûr dal vade, il degrât dal Zardin Grant, e, par ultin, il cussì clamât “arredo urbano” par Marcjâtvieri, che lu indisponeve cetant). Naturalmentri al jere contrari al parc des machinis che a son daûr a realizât sot vie dal Zardin Grant, che al considerave une profanazion.
    Il plui resint incuintri dedicât a “Rensuti” al è stât chel in sale Aiace dai 2 di Març dal 2012, pal decenâl de sô muart: in chê volte al è stât presentât il libri: “Niente drammi umidi – lettere alla madre dalla Libia”, racolte des sôs testemoneancis su la vuere inte ex colonie. Magari su la Libie parade a fruçons di vuê, se al fos inmò vîf, Valente al varès vût dal sigûr alc ce dî. In sumis un personaç impuartant e che al mancje tant. Darest par contâ la Udin di cumò, cussì caotiche, intrigade, miscliçade e incasinade e coventarès verementri une pene speciâl, ma pal moment no si indi viôt la olme.
     Renzo Valente - che al polse tal simitieri di San Vît, justementri tal famedi dai citadins ilustris –, cuant che al è vignût a mancjâ tal 2002 al veve otante sîs agns finîts di pôc. Intai ultins timps al scriveve simpri di mancul e al viveve ritirât, ancje se al mantignive un biel cercli di amîs simpri pronts a lâ a cjatâlu e a sta cun lui in companie a contâsi lis ultimis gnovis sucedudis sot vie dal cjistiel. (von zercläre).

________________________________________________________________________________________________________________________________________________
Rudinaçs e primulis” ricuardant linovâl dal taramot

Glemone – Chest an a Glemone, pal inovâl dai cuarante agns dal taramot, e je in program dute une rieste manifestazions pal ricuart di chel tragjic acjadiment, ma ancje par rindi mert a une ricostruzion che ducj a laudin. Si è scomençât cussì cu la associazion dai Colonos di Vilecjaze di Listize, che e à intitulât, in maniere significative, la sô rassegne di chest an “Paîs di rudinaçs e primulis”. In chest contest stralozât a Glemone i students dal istitût Isis Marchet a à presentât, in forme seniche, une ricercje storiche sui taramots dal 1511 e dal 1976, che par tancj aspiets e àn vût conseguencis parelis. Biel che Laura Nicoloso e à fevelât de sô esperience di chei dîs a Buie, cuant che lis feminis a àn fat cercli par organizâ un coordenament de int taramotade.



Ladins dal Friûl pag.8 – Març 2016  

SCRITÔRS E LIBRIS IN MARILENGHE
Soreli su la nêf”: poesiis dedicadis ae Cjargne
Un maç di lirichis publicadis come suplement dal nestri sfuei

     Cjargne e leterature. Ancje lis peraulis ilustris, come “leterature” a puedin deventâ lûcs comuns, o sei suns convezionâi ripetûts cence une riflession denant trat sui concets che a esprimin.
A voltis, par podê disberdeâ il dubi, al baste un agjetîf: leterature “cjargnele”, o un complement di lûc: leterature “in Cjargne”. Inalore, si domandìn, isal plui adat l’agjetîf etnic o il complement par ilustrâ une realtât dal sigûr cussì particolâr?
    La leterature, intindude come sucession di oparis scritis, leadis fra di lôr de esistence di maestris, scuelis, modei, oltri che, benintindût, de presince di editôrs, critics e letôrs, al è un fenomen soci-culturâl soredut urban fint dai timps dal Umanesim. De proposizion di chest teoreme no diven istès la ciertece che, baste creâ une citât par fâ nassi e vivi a lunc une leterature: o podìn dome verificâ, ae lûs de storie, che la citât e je une condizion impuartante par fa sì che, in determinadis circostancis, al cjapi vite e forme chel fenomen che nô o definìn “leterature”. Cussì se Udin, tal Sîscent, no fos stade une citât, Pauli Fistulari nol sarès stât il caposcuele di un grup di dodis udinês che a scrivevin, a voltis in colaborazion tra di lôr, otavis, cjançons e madrigâi par furlan, o miei in chê varietât che po si sarès inviade a deventâ la coinè de nestre leterature. E inmò, simpri se Udin no fos stade une citât, no sarès nassude la impuartante scuele dai poetis neorealiscj di lenghe taliane, fra la mitât dai agns Cuarante e i prins agns Sessante, dal secul passât.
   Vuê, si po osservâ, lis citâts no son plui chês dal Rinassiment, e no dutis a produsin leterature ancje se tal passât, come che si à vût iniment, a àn favorît la nassite e il svilup di corints leteraris. In conclusion, o podìn osservâ, che une “scuele” leterarie e po nassi e svilupâsi ancje fra scritôrs che a loghin in lûcs lontans, se a rivin a tignî contants frecuents fra di lôr graziis ae facilitât e ae curience des comunicazions che a diferenziin il nestri timp di cumò.
    Tornant al pont di partence, chest discors al coinvolç naturalmentri la Cjargne, une regjon une vore slargjade, oltri che ben identificade dal pont di viste fisic e etnic, ma par resons che si puedi intuî pôc popolade, che no à mai vudis citâts e che no dispon di propis modei culturâi urbans. Cundut achel cheste tiere e po istès vantâ la presince di leterâts di valôr, soredut inte cente de leterature popolâr par furlan. Par altri si trate di leterâts che a operin ognidun par propi cont tal contest di filons leteraris che a àn radrîs lontanis. Si trate, vadì, di poetis e scritôrs (Siro Angeli, Leonardo Zanier, Luigi Candoni, Gina Marpillero, Giorgio Ferigo) che a àn produsût lis lôr oparis a contant cun realtâts urbanis di fûr regjon, intes cuâl a àn ancje cjatât il mût di publicâ, e di slargjâ la cognossince, dai lôr lavôrs. In sumis la leterature in Cjargne no je, gran, restade indaûr, se po o zontìn, a chei za vûts iniment, ancje i nons “plui resints” di Raffaella Cargnelli, Gigi Maieron, Ermes Dorigo e Devis Bonanni.
     A dâ seont a chescj resonament sul cont de “leterature in Cjargne”, al è vignût fûr cumò di resint, a Tumieç par cure dal editôr Dree Moro, un libri dabon preseôs dal titul “Soreli su la nêf”: une racolte di vincjecuatri poesiis di Renzo Balzan. Lirichis dulà che la Cjargne e je cjantade e contade intes sôs milante musis. Intai siei plusôrs aspiets, sintiments, aspirazions e vibrazions.
   Balzan nol è cjargnel di nassince (al è nassût a Felet) ma dal sigûr al è un cjargnel di anime e sintiments, se no altris pe rieste di libri dedicâts a cheste tiere che al à publicât. Oltri a jessi l’ispiradôr e l’animadôr dal progjet dai “Cuaders di Culture Cjargnele”, che di cuindis agns in ca a vegnin fûr par cure de Universitât de Tierce Etât de Cjargne, dulà che juste Balzan al ten sù il cors di lenghe e leterature ladine furlane. In sumis un impegn totâl pe incressite culturâl dal teritori de mont furlane, che intes sô poesiis o cjatìn in fats testemoneât.
    O podìn dî che la poesie di Balzan si davuelzi inte liende poetiche di un lunc viaç a traviers i lûcs gjeografics e lis imagjinis di personis, trasformantsi po a pôc a pôc intun viaç interiôr dai aspiets simpri plui intens: “Dulà ise la tô anime / viere Cjargne? / Achì, ret la casere / o respiri cul vint / il nulôr dai tiei prats di mont / e di gnot eternis e simpri resintis. / Ma jo o cîr inalgò / la tô anime, la cîr / tra i borcs dai cuvierts di planele / tra i sotpuartis / disegnâts dai arcs di tof / che a polsin cidins / vuaitis di secui”.
  Inte scriture di cheste autôr, dal inizi de sô produzion ai ultins libris che al à publicât, si vualme un pont di viste dal dut mudât, che al va dal particolâr al universâl, dal so ciul di dolôr tant che om a une ricercje di pâs come smire plui o mancul scuindude di cjatâ il fin ultin de esistence. In chest lunc viaç dal om poete a àn une divierse funzion la nature, la int, la identitât: “O cognòs il colôr de gnot / che si vierç sui cuvierts slusints di planele / in rieste di stelis / il fresc grisôr de albe / sospindude sui rais dal soreli / i nets profîi dal amont. / O cognòs il disveâsi dai prâts / l’asedâ di cristal dal Unvier / e dut ce che al è umil o grant / il nevâl une rose un nemâl / o dome ancje / il clap intun riul / l’amôr de lûs / che e impie la zornade / tal so colôr”.
   O podìn inalore concludi disint che chê di Balzan e je une poesie ricje par temis tratâts e pes esperiencis puartadis su la cjarte. Intune peraule e je une poesie autentiche, no dal sigûr costruide a taulin: une poesie che si interoghe continuementri fint a dâsi des rispuestis e a permeti la comunicazion cu la cjadince juste, cu lis pausis, cul viers lambri e colorît e, cuant che al covente, cun viemencis e nostalgjiis vivudis in maniere sclete.
    Si scugne in fin dî che il libri al è insiorât di vot disens realizâts de artiste di Nonte di Soclêf, Barbara Picottti. Dopo jessisi diplomade ae Academie des Bielis Arts di Vignesie Barbara e à viert, tal borc antîc di Note, un laboratori di piture e calcografie. Dal 2007 e je a Tumieç alì dal Ent Mostre Permanent de Cjargne, un impuartant pont di riferiment pal artesanât artistic locâl. Dilunc i agns, a son stâts diviers i ricognossiments che e à cuistâts, sedi inte cente publiche che privade. Dut câs il plui significant al è stât dal sigûr chel de realizazion di une preseose cartele di stampis calcografichis, comissionade de Arcidiocesi di Udin, par ofrîle in don al pape Benedet XVI, ae ocasion de sô visite a Aquilee, il mês di Mai dal 2011.
________________________________________________________________________________________________________________________________________________________________
La schede: R. Balzan (edelweiß), “Soreli su la nêf – Poesiis in lenghe ladine furlane”, Ed. Dree Moro Tumieç 2015, pagjinis 39.

Ladins dal Friûl” Diretôr responsabil : Renzo Balzan - Reg. Tribunâl di Tumieç n. 123 dai 09.03.98
Redazion : 33028 Tierç di Tumieç - V. Dandolo16 / tel. 0433/43696 / e-mail : ladinsdalfriul@gmail.com
F.I.P. (fotocopiât in propi) a Tierç di Tumieç (Ud) V. Dandolo 12 pes Edizions “Union Scritôrs Furlans”.
La publicazion e ven spedide es Bibliotechis dal Friûl, es Istituzions Culturâls Ladinis des provinciis di Bolsan, Trent e Belun, e a ducj chei che a mandin la lôr libare contribuzion doprant il C.C. bancjari nr.19162 dal “Banco di Brescia” (Filiâl di Tumieç) - codiç IBAN: IT50H 03500 64320 0000000 19162
Chest gjornâl inte sô version online si lu cjate tal sît : http://ladinsdalfriul.blogspot.it
Publicât cul sostegn de Provincie di Udin – L.R.24/2006 art.26