venerdì 1 luglio 2016

Anade ( XIX ) n.7 Lui 2016
Periodic-mensîl di informazion e culture sul cont de minorance celtiche
dai Ladins de Furlanie. Edizion par cure de associazion “Union Scritôrs Furlans”

No stin a dismenteâsi di Achil Telin

Al è stât il profete dal risuriment dal Friûl e de Patrie Ladine

     Tal numar passât dal mês di Jugn o vin ricuardât che al colavin i cent e cincuante agns de “invasion”, o sei il passaç dal Friûl de sotanance de Austrie a chê de Italie. Ma in chel 1866 tant burascjôs pai destins de nestre tiere al sucedeve ancje alc altri che al merte di jessi memoreât. Ai 25 di Fevrâr in fats al nasseve a Udin Achil Telin, un non che magari vuê in Friûl scuasit nissun cognòs, e juste par chel o crodìn just di memoreâlu tal inovâl dai cent e cincuante agns de sô nassince. Ma cui jerial chest om? Nus jude a capî alc sun chest cont une lapide, che il prin di Otubar dal 1988 inte dade che a colavin i cincuante agns che al jere muart, la Union Scritôrs Furlans e à fat meti su la façade di une cjase di Udin (inte centrâl strade Canciani) e dulà che parsore vie al è stât scrit: “In chest lûc al è nassût Achil Telin. Sienziât, campion di furlanetât, profete dal risuriment dal Friûl e de Patrie Ladine”.
     Achil Telin, cemût che si à mutivât, al nassè ai 25 di Fevrâr dal 1866 di Tite e Vitorie Pasini-Vianello. Student brilant, a vincjedoi agns al cjapà, a plens vôts, la lauree in siencis naturâls inte Universitât di Turin.
    La prime incarghe la ve ae Universitât di Rome, dulà che al le a fâ l’assistent ae catedre di gjeologjie dal professôr Portis. Plui indenant, par chel che al inten la ativitât tal cjamp specific de sô lauree, al fasè ricercjis e studis in Piemont, in Ligurie, tal Apenin centrâl, tal Gargan e intes isulis Tremiti. Al studià purpûr, e al metè jù, une cjarte gjeologjiche dai contors di Rome.
    Leât cetant ae sô tiere di divignince, Telin nol dismenteà il Friûl, tant che i dedicà ricercjis sui aspiets gjeologjics e gjeografics dal so teritori.
    La impuartance dai siei studis e il valôr des tantis publicazions che al de adun, a destinavin Achil Telin ae catedre universitarie, ma lui al sielzè di tornâ chenti dulà che al cjapà la incarghe de catedre di Siencis Naturâls tal Istitût Tecnic di Udin.
    E scomençà cussì une dade di timp di grant impegn sul plan sientific che lu puartà a studiâ i problemis plui svariâts sicu lis aghis che a scorevin sot vie, i taramots, i crets, i landris e la faune de nestre regjon. I risultâts di chescj studis si traduserin in articui che a vignirin fûr inte riviste de Societât Alpine Furlane, tal Boletin de Associazion Agrarie Furlane e intai Ats de Academie di Udin.
  Tal 1904 al interompè la ativitât che i veve zovât tantis sodisfazions e tancj ricognossiments e al lassà l’insegnament, dant in donazion la sô ricje biblioteche sientifiche ae republiche di San Marino.
    Si sierave cussì la prime part de vite di Achil Telin, come sienziât e naturalist, e e scomençave la seconde: chê dedicade ae filologjie e ae leterature ladine, sostignût dal so amôr pal Friûl e de gnove passion pal studi des lenghis, in particolâr di chê lenghe universâl che e vignive clamade “esperant”.
    Di cheste lenghe al fo un ferbint sostenidôr, tant di acetâ l’incaric di rapresentant de Associazion esperantiste universâl di Bologne. Al realizà un studi comparatîf tra il lessic esperant e il furlan e, tal 1935, al publicà une gramatiche e un vocabolari cun esercizis di esperant pai ladins dal Friûl.

    Deventât un passionât glotolic, al dedicà dut il so timp e dut il so inzegn a aprofondî lis cognossincis de lenghe furlane e de storie de Patrie. Al le dilunc par scuasit dutis lis valadis de Cjargne, pal Cjanâl dal Fier e par chês dal Friûl di là de aghe. Al fevelave cu la int comun e al cjapave sù cussì preseôs documents di culture e di leterature popolâr di ogni sorte, sicu rimis, contis, flabis, zûcs, usancis, vilotis, recipis, induvinei e proverbis.
    Dut câs la identitât ladine e fo la gruesse spine tal cûr di Telin. Viodi ricognossude la dignitât di lenghe al furlan, meti in vore la bandiere ladine (cui colôrs celest, blanc e vert), restaurâ il Patriarcjât di Aquilee come model par un Friûl indipendent, al sarà il so grant sium.
    Al auspicà la fondazion di une universitât pai Ladins (dai Grisons, des Dolomitis e dal Friûl) che e ves sede a Udin. Al batè cence poste su la dibisugne di racuei ogni document de nestre culture, e in particolâr de leterature popolâr furlane. Al Sotlinià l’oblic morâl di mantignî vive la lenghe ladine, slargjant, a traviers lis publicazions, la cognossince dal patrimoni leterari. Al marcà che par conservâ la lenghe mari no si podeve rinunziâ al so ûs inte publiche aministrazion e inte informazion a ducj i nivei (concet che vuê al vâl pai mass media), massime intai gjornâi.
    Tra lis oparis di Achil Telin che a rivuardin i studis su la lenghe furlane, o nomenin: “Archivi de leterature furlane antighe e moderne”, “La Patrie Ladine”, “Tesaur de lenghe furlane”, “Sintiments e afiets inte poesie popolâr furlane”. Al è muart a Udin, il prin di Otubar dal 1938, e di lui al è just no dismenteâsi. Furlan di fats che al merte il nestri rispiet e il nestri agrât. (tarvos)




Ladins dal Friûl pag.2 - Lui 2016 

DAL TIMÂF A LA LIVENCE
Barak Obama: o vin di vê un mont cence armis atomichis
ma intant a Davian a stan rivant lis gnovis bombis B61-12
    Une visite storiche daspò 71 agns, un discors imbomp di impromissions suntun “mont cence plui armis atomichis”, ma nuie scusis de bande di Barak Obama, il prin president dai Stâts Unîts in cjarie a lâ in visite a Hiroshima, teatri de prime catastrofe nucleâr inviade dal om in chê maladete buinore dai 6 di Avost dal 1945. “O vin di fâ il pussibil par distruzi lis armis nucleârs, par evitâ di paidî une altre e volte”, al è stât l’apel burît dal president american. “O vin di modificâ il nestri stes mût di pensâ ae vuere e contâ ai nestri fîs une storie divierse. O sin achì e o cirìn di imagjinâ il moment dulà che cheste bombe e je colade, pensin a ce che a àn paidît i fruts... e ae vôs dai muarts che nus fevelin”.
  Obama al à insistût sul “risvei morâl des cussiencis” sotliniant la “necessitât di une rivoluzion morâl dongje dal progrès tecnologjic”. Il president Nobel pe pâs al à fevelât de brutalitât de vuere, ma cence dâ la colpe dai siei efiets criminâi a nissune des parts: la reson de resinte visite a Hiroshima e jere chê di tornâ a scrivi la storie cence tornâ a vierzi vieris feridis, anzit cirint pussibilmentri di sierâlis, infuartint la colaborazion tra Usa e Japon, i doi paîs che a forin nimîs e che cumò a son deventâts bogns aleâts.
    Chel dì “la muart e rivà dal cîl e il mont al cambià”: lis peraulis di Barak Obama pronunciadis inte storiche visite al Memoriâl de Pâs di Hiroshima a vierzin une viere feride inte storie de umanitât che il 6 di Avost dal 1945 e scuvierzè di possedi “i mieçs par auto distruzisi”. Pôcs agns daspò il Secont conflit mondiâl, inte Vuere de Coree, il president Harry Truman nol cedè aes pressions dal gjenerâl Douglas McArthur e al evità un secont olocaust, ma a 71 agns des bombis moladis su Hiroshima e Nagasaki e al inviament de ete nucleâr, la minace di distruzion totâl al è il riscjio principâl che inmò al pent su la sorevivence de interie umanitât.
  La Vuere Frede e la corse ai armaments a derin il sburt decisîf e i guviers cu la arme di distruzion totâl par ecelence a son cussì incressûts fint a nûf: Russie, Cine tal ex bloc comunist, Usa, Angletiere e France in chel Ocidentâl, e po i “contendents” Indie e Pakistan, Israêl, e par ultin la Coree dal Nord vuidade di Kim Joog-un. Si è rivâts cussì a un caric totâl di 15.350 testadis e il mont, naturalmentri, al reste une pericolose polveriere. Baste dî che su la fonde des ultimis stimis de Federation of American Scientists, Washington e Moscje a van dilunc a mantegni scuasit 1800 unitâts in seguitîf stât di alerte, prontis par jessi dopradis in cualsisei moment.
    Sun chest cont i Usa a son chei che a spindin plui di ducj che altris paîs metûts insiemit intun modernament seguitîf, e a àn scuasit 7.000 testadis cuintri lis 7.300 de Russie, dut câs impegnade a ridusi e a modernâ i armaments za sovietics. Tra lis 200 e 300 unitâts a son in dotazion di France, Chine e Ingletiere, tra lis 120-130 unitâts di Indie e Pakistan, 80 di Israêl e une desene par Pyong-yang. Il faliment des potencis nucleârs dai sfuarçs di disarmi, su ducj il tratât di no proliferazion, al à incressût il riscjio di difusion de atomiche: “o vin di vê cûr di vignî fûr de logjiche de pôre e cirî di realizâ un mont cence armis nucleârs”, al à dite inmò Obam, rimarcant i aspiets e i contignûts dal famôs discors che i zovà il premi Nobel pe Pâs. Inte ocasion al fevelà di un mont cence nucleâr, sedi pûr indicantlu cun realisim come “obietîf une vore dificil di realizâ” tal arc di une gjenerazion.
     Des peraulis ai fats la gnove bombe al idrogjen B61-12, destinade a sostituî secont i esperts lis testadis nucleârs presints intes base furlane di Davian e a Chedi, e je stade provade za fa cualchi mês tal disiert dal Nevada, almancul cemût che al à anticipât cuntun so servizi il setemanâl l’Espresso.
    No si è tratât di un vêr e propi test nucleâr parcè dal 1992 i Usa a àn dade la lôr adesion ae muratorie sui test atomics. E je stade, plui tost, doprade, secont la ricostruzion, une bombe cence cariche nucleâr parcè che l’obietîf al jere chel di testâ la sô capacitât di intervent sot tiere. Une svolte tal cjamp dai ordegns nucleârs: fint a vuê, in fats, no jere domandade la precision a ordegns di cheste sorte, aduncje costruîts par disterminâ interiis popolazions e teritoris cemût che al jere sucedût juste apont a Hiroshima e Nagasaki ai fin de seconde Vuere grande.
     Ma lis vueris dai ultins agns a àn cambiât lis prospetivis e il Pentagono american al è ae ricercje di ordegns bogns di distruzi i bunkers sot tiere, dulà che normalmentri si cjatin logadis lis struturis militârs plui impuartantis e strategjichis.
    La gnove bombe e larà a sostituî lis vieris B61 che secont i esperts, in Italie e in Friûl a son presints intai magazens tal aereopuart di Pagliano a Gori, a Ghedi e a Davian. Lis gnovis armis a podaran lâ in dotazion ai F35. Declarazions uficiâls non son stadis inmò fatis ma al è palês che il plan al è chel di mandâ lis B61-12 intai stes puescj dulà che vuê a son conservadis lis vieris B61.
La presince di ordegns nucleârs a Pagliaro, Gori e Davian no je mai stade confermade ni de bande americane ni di chê taliane, cun dut che a son son stadis fatis intai agns centenârs di interogazions parlamentârs par vê clarece sun chest cont. Indi è convint, dut câs, Hans Kristensen de Fas (Federazion dai sienziâts americans) considerât un dai maiôrs esperts su la presince nucleâr in Europe. La ultime conferme su la presince e va indaûr a za fa cualchi mês e e sarès dimostrade des imagjinis rilevadis dai satelits fatis viodi dal stes Kristensen. Fotografiis che a mostrin che i Stâts Unîts a àn procedût a meti insigurece i magazens dai ordegns nucleârs ancje a Davian, il che al à fat pensâ che fint a vuê, in cualchi mût, no sedin stâts custodîts in assolude sigurece. Secont i esperts tal 2000 la base furlane e veve 18 caveau dulà che a jerin custodîts 50 ordegns. I lavôrs realizâts a àn creât une gnove cente che e conten, par altri, 12 cjamaris di sigurece sot tiere.
    In sumis o podìn ben dî che il Friûl al è une potence nucleâr e simpri in vuaite di alc... destin indât! (renzo balzan)





Ladins dal Friûl pag.3 - Lui 2016

CRONICHIS DI CHENTI
La cooperazion in Cjargne e je inmò vive e presint
Dopo il disastri de CoopCa un esempli positîf nus ven de CIC

Tumieç – Dopo ce che al è sucedût cu la vicende de CoopCa, la cooperative che e podeve vantâ plui di cent agns di ativitât e po falide cun dutis lis conseguencis che sun chest gjornâl us vin simpri contât, si jere persuadût che la cooperazion, il spirt cooperativistic, a fossin aromai dome dai biei ricuarts pe Cjargne, pont di riferiment tal secul passât sun chest cont. Invezit, par fortune, no je propite cussì. La notizie in rivuart nus rive di Tumieç dulà che la CIC (Cooperative Indot Cjargne) e à decidût di cjapâ sù la buteghe (si cjate inte centrâl vie Del Din in plen centri storic) che par tancj agns la veve tignude vierte la famee Nadali, e che di resint e jere stade juste apont sierade. Oltri a chest, dal 2 di Jugn stât la Cooperative e à cjapât sù la gjestion dal ristorant zontât ae Polse di Cougnes, a Zui, e intai ultins mês e à cjapât sù a vore uns vincj personis inte sô fabriche di Vile Santine. In sumis une cooperative vive e ative.
     La CIC, fondade tal 1987, e davuelç la sô ativitât principâl a Vile Santine, dulà che e à une fabriche che e prodûs coletôrs par scambitôrs di calôr e componentistiche par machinis. Tal 2000 e à scomençât a cjapâ sù la buteghe di alimentârs di Enemonç che e jere stade sierade, tal Zenâr dal 2015 la buteghe di alimentârs di Lauc, e simpri tal stes àn ancje lis buteghis di Liariis di Davâr e di Cjavaç. Cussì oltri a furnî un servizi fondamentâl pai piçui paîs e à dât lavôr a cetancj di lôr, che a son lâts a zontâsi ai trente che bielzà a lavorin inte fabriche di Vile.
  Tal mês di Setembar stât une grande multinazionâl de componentistiche par machinis e à afidât ae cooperative une impuartante comesse, che e à permetût di cjoli sù a vore altris vincj personis, par cumò a timp determinât. Dut câs se lis prospetivis di marcjât a saran positivis al è di crodi che chei puescj a podaran jessi confermâts e deventâ definitîfs.
   Cumò, cemût che o vin displeât denant trat, la CIC e à cjapât sù la buteghe ex Nadali, che jessint in centri e continuarà a dâ un servizi ae personis anzianis che no puedin cori a fâ la spese intai supermarcjâts de perifarie. Oltri a chest e vignarà ancje proponude une rieste di prodots locâi che a son une vore preseâts ancje dai turiscj e de int di passaç pal cjâf lûc de Cjargne. Dut chest al sta fasint in mût che diviersis buteghis presintis intai piçui paîs de Cjargne a sedin interessadis a contatâ la CIC par podê dâ une continuitât ae lôr ativitât, e un servizi fondamentâl pe int.
    Chescj acjadiments nus puartin a dî che la cooperazion in Cjargne e reste simpri plui vive e ative che mai, a dispiet dal disastri de CoopCa. In conclusion il spirt dai cjargnei al reste simpri chel di no molâ, nonostant la politiche e i politics che ju aministrin. (mateu di prun)

Finalmentri la disocupazion e scomence a calâ

Udin – E cale la disocupazion, che tal prin trimestri dal 2016 si è sestade al 7,1 par cent daspò jessi rivade al 9,5 par cent tal 2014. Chest al è un segnâl che la economie e torne, biel planc, a partî. Daspò agns di crisi pesante e sta tornant a partî la edilizie. E cres, si ben di pôc la produzion industriâl (+ 2%). In aument ancje lis espuartazions (+ 1,3%). Al miore il turisim (+ 4,1%), interessante ancje la riprese dai consums (+ 1,6% lis venditis al detai). E peiore invezit la cualitât dal credit, par colpe des “soferencis” ingrumadis des bancjis, che a son incressudis dal 3,5% al 4,5%.
   A son chescj i numars di fonde de Relazion Economiche dal Friûl-V.J. pal 2015, ilustrats di resint inte sede de Bancje d’Italie a Triest dal diretôr Giuseppe Manitta, e dai economiscj Achille Puggioni e Tiziano Sodano. Il 2015 al à segnât un pont di discontinuitât daspò trê agns flession costant. Al à permetût al tiessût economic di tirâ flât, ancje se i standard di prin de crisi a restin nome un ricuart, e un paradigme di riferiment inmò improibît.

  Si è consolidade la lizere riprese de domande indreçade ae industrie regjonâl: daspò cuatri agns passâts in soference, ancje la component interne si tornade a meti in marce, mentri lis espuartazions a àn continuât a cressi, ancje se cun cadencis mancul sostignudis, confermant une dinamiche mancul vivarose rispiet al rest dal Nord Est. Pes impresis cjapadis in considerazion dal scandai de Bancje d’Italie al è tornât positîf il salt tra chês che a àn aumentât la spese par investiments e chês che invezit le àn ridote.
    Inte edilizie si è fermât il slungjât câl de ativitât produtive. Sul marcjât imobiliâr a stan aumentant i scambis (+ 10,2%), pûr restant a nivei une vore inferiôrs a chei dai agns denant de crisi. Lis cuotazions des cjasis si son stabilizadis daspò uns trê agns di câl marcât dai presits.
    Tal terziari il cumierç si è zovât de incressite (par cumò debule) dai consums des fameis. Notis positivis ancje pal turisim dulà che a son miorâts i dâts di ducj i setôrs (intes localitâts di mâr, di montagne e ancje culturâl intes citâts), cuntun salt positîf di oltri il 4%. Tal 2015 il numar dai ocupâts al è restât invariât, graziis al miorament de seconde part dal an: la disocupazion daspò agns di numars alts (dibot a dôs cifaris) e je calade in maniere sensibil tal prin trimestri dal 2016. Cundut achel al reste il dât preocupant di une inmò masse alte disocupazion zovanîl. (mdp)




Ladins dal Friûl pag.4 – Lui 2016 

CRONICHIS AUTONOMISTIS
Friûl e Triest: l’iter pai referendum al va indenant
Il Comitât “Ducj pal Friûl” al clame i furlans ae mobilitazion

Rivignan - “Cheste iniziative e je il sâl de democrazie e e va inte direzion dal recupar di chê minimâl cuantitât di sapienzie popolâr che e covente, cumò plui che mai, ae Republiche”. Peraulis pandudis dal professôr Mario Bertolissi presint a Rivignan, sabide 4 di Jugn, ae cunvigne sul cont des autonomiis, daspò il dipuesit dai doi cuesîts referendaris par butâ jù lis Uti e pe istituzion, inte nestre Regjon, di dôs provinciis autonomis dal Friûl e di Triest. L’ordinari, titolâr de catidre di dirit costituzionâl ae Universitât di Padue, al è stât juste apont ospit dal Comitât “Ducj pal Friûl”, che al sta puartant indenant la iniziative referendarie.
    Cuale che e je la sô opinion sul cont de iniziative che e à puartât di resint al dipuesit dai doi cuesîts referendaris lu à sotliniât plui voltis. Promovintle cence scuasit la necessitât di jentrâ tal merit. “Si trate di une iniziative – al à dite – che e à ce fâ cul pinsîr e cun saldis justificazions, che si insede intun timp il cui manifest di base al à chest titul: no stait a pensâ. No stait a smaraveâsi aduncje – al è lât dilunc il docent indreçantsi al numerôs public presint – se di front ae vuestre propueste cualchidun al disarà ‛e je la solite mignestre tornade a scjaldâ’. A son lis rispuestis di cui che, ogni dì, al contribuìs a meti sui paradôrs la democrazie za clopadice di chest Paîs”.
    Peraulis, e resonaments, che a àn scjaldât il cûr di cui che intai ultins mês al à lavorât par rindi pussibii i referendum e la zontade racolte di firmis. “Indi coventavin 500 – al à ricuardât Mario Anzil, sindic di Rivignan-Teôr e principâl animadôr dal Comitât ‘Ducj pal Friûl’ - o sin rivâts a cjapantti sù 2 mil, pronts cussì a fâ front ae fase doi”. Inmò Anzil: “A pene che l’ufici di presidence de Regjon si sarà esprimût su la amission dai cuesîts, pont dulà che no esistin dubis di sorte, o scomençarin la racolte des 15 mil firmis che a coventin. Un lavôr grandon che al domande il jutori di ducj chei che a àn a cûr l’avignî de nestre tiere. I timps a son bielzà cjadençâts. L’ufici rezût di Franco Iacop al varà di esprimisi dentri un mês, po dopo il Comitât indi varà a disposizion cinc par racuei lis firmis. “Se o volìn lâ a votâ inte Vierte cu ven o scugnìn fâ dut dentri il 31 di Dicembar”. Da Rivignan partant e je partide une clamade fuarte pal popul furlan. “E je forsit la ultime ocasion di riscat che nus reste – al à concludût Anzil – o si fâs il Friûl o pûr il Friûl al mûr”. (red.)

Dopo cent e cincuate agns Cosean al torne a dî di no

Cosean - Une cunvigne di cheste sorte dulà podevie jessi fate: naturalmentri a Cosean. Anzit a “Cosean dal no!”. O fevelin juste apont dal incuintri che i autonomiscj furlans, cul sostegn de associazion culturâl “La grame”, a àn inmaneât vinars 10 di Jugn par resonâ sul cont dal referendum costituzionâl che si davuelzarà il mês di Otubar cu ven.
    Ricuardant che juste za fa cent e cincuante agns il paîs dal Friûl di Mieç al jere stât l’unic a votâ “no” tal referendum che al varès confermât il passaç dal Friûl sot de Italie, vinars 10 di Jugn e je scomençade la resistence a chel che il resint Comitât pal “No” al considere un gnûf plebissît: il referendum costituzionâl dal mês di Otubar cu ven. Dôs lis obiezions di fonde che a puartin a dî di no: il riscjio grant de pierdite de specialitât de nestre Regjon, e po la discriminazion intai rivuarts des minorancis. In fats secont il Comitât la ridefinizion de composizion e des competencis dal Senât e met in vore une discriminazion che no po sei acetade des minorancis linguistichis di cheste Regjon (furlans, slovens e todescs n.d.r.), rispiet a altris situazions “fuartis”, come chês dal Sud Tirôl e de Val D’Aoste.

    Inmò, inte riforme nol è clâr il destin des Regjons a statût speciâl. La pôre sun chest cont e je che l’adeguament di chescj Statûts si tradusi intune tratative cence fin des sengulis Regjons cuntun no inmò sclarît livel dal Stât centrâl, svilint cussì la valorizazion dal decentrament e dal regjonalisim. Al è in prionte avonde probabil che par definî lis modalitâts de interie procedure, e scugni jessi fate buine une altre leç di modifiche costituzionâl cun contignûts che no si cognossin e intes mans dal Parlament, acentrant e degradant inmò di plui lis funzions de nestre Regjon.
    Regjon che, tal câs dal Friûl-V.J., intai ultins agns e à pierdût 1,3 miliarts di euros ad an. Pierdint cussì podê intai confronts dal Stât centrâl. Cu la pierdite de Specialitât, il Friûl-V.J. al viodarès a ridusisi lis jentradis e al esist ancje il riscjio di une pierdite significative dal Pil regjonâl - stant aes previsions dal Comitât -, cun chel che un tant al podarès compuartâ sul plan ocupazionâl e dai investiments in Sanitât e tal public. Ancje lis capacitâts decisionâls a saressin ridotis di cetant fasint de nestre Regjon une realtât simpri plui periferiche e par nuie determinant.
    A fasin part dal Comitât, Sergio Cecotti, za sindic di Udin e president de Regjon, Roberto Visentin, autonomist elezût in Parlament pe Leghe Nort, Zorç Cavallo storic autonomist de çampe furlane, Fraceschin Barazzutti, za conseîr regjonâl e pont di riferiment des associazions ambientalistis de Cjargne, Eros Cisilin, conseîr provinciâl, Elia Vezzi, sindic di Paluce e altris inmò. (red.)


Friûl: un popul, une tiere, une lenghe!




Ladins dal Friûl pag.5 – Lui 2016 

JOSEF MARCHET: I GRANCJ OMS DAL FRIÛL
Giulio Camillo Delminio: scritôr e alchimist

    La dople personalitât di Giulio Camillo, clamât Delminio, e pararès in ogni sens avonde interessante parcè che e vali la fature o la curiositât di une revision e di un studi de bande di cualchi cultôr des nestris memoriis. Il Liruti si è prestât cun pazienzie a ricostruî lis sôs vicendis torzeonis, aurint i elements cronologjics scuasit dome des indicazions racoltis intes letaris dal Camillo stes; e al à regjistrât cun scrupul i judizis esprimûts sul so cont dai contemporanis e de posteritât, fint ae mitât dal Sietcent. A son judizis contrastants che a van de amirazion iluminade ae discualificazion plui totâl. Om di culture portentôs, di une sutilece cence parêi, ment scuasit divine lu diserin cierts; volgâr çarlatan, torzeon scaltri, imbroion, o pûr balort lu definirin altris. I plui resints, in massime, a àn miei ignorâlu. A mieze strade fra chestis esagjerazions, al è forsit il câs di osservâ che inte storie des letaris e dal pinsîr de etât moderne, a ’nd è ancje une schirie di personalitâts istès discutudis e discutibilis, dulà che tal mieç Camillo, nol dovarès disfigurâ.
    Nassût, secont i conts fats dal Liruti, tal 1479 a Puart, di une famee che si pense origjinarie de Dalmazie: di achì e divignarès juste apont la reson dal sorenon Delminio, il Camillo non nus à lassât nissune indicazion sul cont de sô formazion culturâl, che par altri e risulte di un gjenar che no si po pensâ che e sedi stade acuiside frecuentant lis scuelis comuns. Tant a dî lis lenghis orientâls, come la indiane e la caldaiche, che al diseve di possedi, e l’egjizian e l’ebraic e la cabale babilonese e altris dutrinis esoterichis e l’alchimie, che si professave di praticâ, no jerin ciert ogjet di insegnament intes scuelis di chenti. E intes stessis letaris greghis e latinis nus disvele un bagai di cognossincis limitade scuasit al sôl Cicerone di une bande o a Demostene, di chê altre. Chest so ordin di interès e di curiositâts, insiemit cu lis sôs simpatiis astrologjichis, pitagorichis e ocultistichis, cui siei intermitents misticisims, no disseparâts di une morâl cence brenis di sorte, a son di par se indiç palês di un temperament, si fâs par mût di dî, stravagant, di une inclinazion particolâr viers ce che al è di mancul razionâl o di mancul positîf inte cente de cognossince umane.
    Ancje tant scûrs a son i inizis de sô cariere di maestri. Viers il 1519, cuant che al veve bielzà cuarante agns, al insegnave logjiche e altri a San Vît al Taiament: nol è clâr se intes scuele publiche o ben intune sorte di academie privade davierte di lui stes; e dutun in chel al concepive un prin progjet di chel misteriôs e mai finît “Teatri” di ogni dutrine, che al fo l’ogjet des sôs fadiis par dut il rest de vite, e su la cui nature nus restin dome discuardantis indicazions. Cuntun plan di cheste opare, o forsit, cun cualchi saç des singulis parts e cuntune letare di presentazion dal ambassadôr di France a Vignesie, al partì, tal 1519, dal Friûl viers Parìs, par domandâ il sostegn finanziari che i coventave al re Francesc I. Il lavôr grandon che al veve imbastît al domandave dut il so impegn e partant une indipendence economiche, che lu mantignìs libars dal impegn dal insegnament. Il re di France lu scoltà, i fasè dâ 500 scûts di aur e lu tornâ a mandâ in Italie. Al vignì a stabilîsi a Vignesie cui colaboradôrs che za al veve cjolt sù a S. Vît, e in curt al spindè ducj i bêçs che i jerin stâts dâts. Inalore (1521) al scugnì acetâ une catidre di latin e grêc alì dal Studi di Bologne.

    Tal 1525 al tornà a inviâ la rieste dai siei viaçs in France. Dut câs cheste volte al le cun Jeroni Muzio, che al è chel che nus à furnît la maiôr part dai elements biografics dal Camillo; al tornà, simpri cul stes Muzio, tal 1530, daspò vê assistût ae dople incoronazion di Carli V e, in cheste ocasion, al fo ancje a San Jan de Luz, sot i Pirenei, a spietâ, poetant cul Muzio, la gnove nuvice di Francesc I, Lionore, sûr dal imperadôr, e a chel corteu si zontà fint a Parìs. Po al è dificil tignî il cont di chei altris viaçs dal Camillo: al risulte che sul scomençâ dal 1533 al jere a Vignesie e tal mês Avost al scriveve di Parìs; tal 1535 al mandave une letare plene di oracui a une cierte Lucrezie, sô amie, di Rouen; tal mês di Otubar dal 1536 si cjatave inmò a Parìs cul Varchi e cul Molza. La finalitât di chescj viaçs e jere chê di tignî informât il re di France sui progrès dal so lavôr e aurî di lui cualchi altri sussidi: al semee che indi vedi cjapâts avonde. Il re, si ben incuriosît dai straneôs progjets e esperiments che il Camillo i proponeve, a un ciert pont al devi jessisi stufât: al sta di fat che intai ultins agns de sô vite, il Delmanio si atacà al marchês Alonso d’Avalos, duche di Milan e comandant des trupis spagnolis cuintri i Francês, e si fasè acolzi ae sô cort. In chê citât o savìn che al scomençà a frecuentâ il palaç de famee Sauli; al semee anzit che in chê famee alì a là a stâ in plante stabil, in cualitât di precetôr dal zovin Alessandri, che al fo po l’innomenât barnabît deventât sant. Sigûr al è impen che in cjase Sauli a Milan, ai 13 di Mai dal 1544, Giulio Camillo al cessà di vivi ae improvise par colpe di atac di asme che i capità intant che al spiegave il test di Virgilio ai doi fîs di Domenico Sauli: chest indi curà la sepulture inte glesie des Graziis.
   Ancje i plui setics tra i contemporanis a ricognosserin tal Camillo un inzegn straordenari e une slargjade culture. Di ce gjenar che e fos cheste culture si po dedusilu dal sempliç elenc dai siei scrits, che a vevin di jessi tancj: ma po ce che al fo publicât dal Camillo si ridûs a un volum che al cjape dentri sîs o siet opuscui, che in edizions sucessivis a forin incressûts cu la zonte di altris tratâts, inedits, di letaris e altris rimis, o pûr tornâts a stampâ cul titul modificât. In sumis un personaç dabon stravagant e fûr dal vade. (Josef Marchet – test tirât fûr da “Il Friuli: uomini e tempi”, ridusût e voltât par furlan par cure de redazion)




Ladins dal Friûl pag.6 - Lui 2016

DAI FATS E DE CULTURE
DES TIERIS LADINI
Convenzion gnove pe RAI Ladinia
Radio e television par ladin pe minorance presint in Sud Tirôl

Bolzan/Bozen – La RAI e à rinovât par trê agns la Convenzion pes trasmissions ladinis e todescjis in Sud Tirôl. Chest al è stât pussibil daspò une rieste di incuintris tra la RAI di Rome, chê di Bolzan e la rapresentance istituzionâl de Provincie dal Sud Tirôl. La ultime Convezion e je stade fate buine, juste apont, ai 23 di Dicembar dal 2015 e sotscrite de Presidence dal Consei dai Ministris, dal Sorestant de Provincie di Bolzan e de RAI Com. La Convenzion e vâl par trê agns, po e podarà jessi inmò rinovade. Lis trasmissions pe radio ladine a proviodin almancul 352 oris ad an di metude in onde, mentri pe television ladine a son proviodudis 100 oris di trasmission ad an.
    La Convenzion e proviôt la presince di une Comission paritetiche di control che e je stade nomenade ae fin dal mês di Zenâr stât. Cheste e à il compit di informâ il guvier di Rome e il Dipartiment de Informazion sul coret funzionament de Convenzion. De Comission paritetiche a fasin part siet personis de Provincie di Bolzan, un diretôr de ripartizion provinciâl de RAI, un gjornalist dal ufici stampe provinciâl, un president de RAS, un funzionari ladin nomenât dal sorestant provinciâl, doi funzionaris sielzûts de zonte provinciâl.
    Lis siet personis dal grup RAI, il diretôr de RAI di Bolzan, il diretôr de “Testade Gjornalistiche Regjonâl”, il coordenadôr responsabil de programazion todescje, e il coordenadôr responsabil de programazion ladine, l’aministradôr delegât de RAI Com, il diretôr dal staff de Direzion Gjenerâl de RAI di Rome a varan di esaminâ lis eventuâls propuestis di mudament des oris di trasmission, resonâ sul numar di oris di utilizâ e su la cualitât dai programs di meti in onde cul fin di garantî trasmissions di bon livel.
    A chest pont al è di sperâ che i doi ladins presints inte Comission paritetiche – Cecilia Miribung e Leo Senoner – si fasin sintî e che a puartin indenant la propueste par un aument des oris di trasmission pe radio ladine di almancul altris cinc oris in dì, e de television ladine di altris dôs oris in dì. Tal Grison svuizar, par esempli, lis trasmissions par ladin rumanç, sedi pe radio che par television, si fasin 24 oris su 24, sedi par rumanç standard sedi intes varietâts de sengulis valadis.
Si osserve ancje che la trasmission di informazion gjornalistiche “Trail” e je masse curte, cussì che lis notiziis no puedis sei dadis in maniere complete. Si domande par chest di vê a disposizion almancul 15 minûts.
    Altri probleme al è chel di podê vê dai corispondents intes valadis, di mût di vê a disposizion plui notiziis e plui aprofondiments, sedi par chel che al inten il servizi gjornalistic sedi lis trasmission di caratar culturâl. Se la politiche si môf e e fâs in mût che la RAI e aceti chestis propuestis, indi vignarès un grant vantaç pe comunitât ladine des Dolomitis. Si trate in fats di un servizi fondamentâl, sedi pe sô utilitât pratiche, sedi par infuartî la funzion de lenghe ladine inte comunicazion di ogni dì.
    Chest in Sud Tirôl. In Friûl invezit pe nestre lenghe ladine o sin simpri plui tal limbo. No esistin progjets e programs de bande de RAI, si fâs ogni tant alc cence costrut e cence nissun control su la cualitât di ce che al ven metût in onde cun gjornaliscj che no son stâts preparâts par cheste sorte di lavôr. Ma ae politiche di chenti i va ben cussì e e tâs. Par fortune che e esist Radio Onde Furlane, che e furnìs un servizi gjornalist pe radio, par furlan, verementri puntuâl e professionâl. Ma nol è cussì che al funzione un servizi public, co nus oblein a paiâ l’abonament cence rispietâ i nestris dirits. La minorance ladine dal Friûl e je discriminade in maniere palês de RAI. Ma se nissun nol proteste lôr no si scomponin. (edelweiß)
___________________________________________________________________________________________________________
Il ladin a scuele a Cortina dAmpezzo

Ampezo (Bl) – Sabide 4 di Jugn pai arlêfs de 1A e de 4C des scuelis di Cortina d’Ampezzo (par ladin Ampezo) al è rivât insom il prin an dal progjet “Ladin a Scola”. Chest al è stât pussibil graziis a une convenzion sotscrite a Col (Cuel S. Luzie) tal mês di Otubar dal 2015 cul Istitût ladin di Col e cu la Intendence Ladine. La ativitât e jere po partide tal mês di Fevrâr in dôs classis che a fasevin scuele ancje di sabide. A chest progjet e à dât la sô poie la professoresse Giuliana Bellodis par chel che al inten il lengaç, la storie e la culture ampeçane. Cu la professoresse Bellodis a àn colaborât dôs maestris in mût di imbastî e puartâ indenant la ativitât didatiche cun risultâts plui che positîfs, tant di rivâ a coinvolzi sedi i arlêfs che lis fameis.
    Tal incuintri che al à sierât cheste impuartante iniziative, la president de Union di Ladins de Ampezo, Elsa Zardini, e il diretôr dal Istitût Ladin di Col “Cesa de Jan”, Moreno Kerer, a àn displeât ai arlêfs la fortune che a àn vude di podê imparâ il lengaç ampeçan a scuele. “Une volte, cuant che o levi a scuele jo – e à dite la Zardini – a fevelâ par ladin a scuele si riscjave di cjapâ une scufiot de bande de maestre. La nestre lenghe mari e veve di sei dismenteade, metude de bande, nol jere fin e di mode doprâ l’ampeçan. Vuê naturalmentri i timps a son cambiâts co si à la pussibilitât di recuperâ a scuele un patrimoni di lenghe, storie, culture e tradizions che al sarès dabon un grant dam se al ves di lâ pierdût”. (red.)




Ladins dal Friûl pag.7 - Lui 2016

INTAI PRÂTS DE CULTURE FURLANE
A Dieç inmò une mostre di valôr european
Cheste volte dedicade a ciridôrs, int che e scjampe e piligrins

Dieç – Ai 22 di Mai stât e je stade screade a Dieç di Tumieç la XII esposizion internazionâl di art, organizade come simpri dal Comitât di San Florean e curade, pe part artistiche, di pre Alessio Geretti. Il titul di cheste edizion: “Oltri: in viaç cun ciridôrs, int che e scjampe e piligrins”, al è plui che mai di atualitât, viodût ce che al è daûr a sucedi sui confins meridionâi de Europe, cun miârs di personis che a scjampin dai lôr paîs par colpe des vueris, des violencis, de fan, inte sperance di podê cjatâ un mût di vivi plui uman. Cun di fat ae cerimonie di viertidure doi rifugjâts, un zovin afghan e un pachistan, a àn compagnât i presints ae prime visite de mostre.
   In fats cui miei di doi dispatriâts podevial ilustrâ il sens dal viaç, sot i plui diviers aspiets. Lis motivazions origjinariis, chês che si son modificadis di tape in tape, la sperance, lis spietis, la pôre, la sorevivence, la integrazion, il presint e l’avignî. I doi profugos a son ospits di dôs realtâts di acet de Cjargne. Bons. Zanello, pal Comitât, e il coordenadôr de mostre, pre Alessio Geretti, ju àn incuintrâts ducj chescj zovins che a àn vût cûr di bandonâ la lôr tiere par cirî chenti protezion e une sperance di vite miôr. Ur àn fat une propueste, come protagoniscj dal Viaç, ma ancje come ocasion di une integrazion plui puntuâl tal tiessût sociâl de Cjargne. Doi, juste apont, a àn acetât e a son lâts a frecuentâ i cors di formazion par preparâsi al servizi di vuide de mostre, insiemit cui lôr compagns di etât cjargnei. Verementri un esempli concret di pussibil integrazion.
   Par altri il Comitât di San Florean no si è contentât di chestis dôs figuris. Indi à inseride inmò une altre: chê di un zovin pazient dal Centri di salût mentâl, che si sta preparant ae lauree e che al à domandât di condividi la esperience di chel “Oltri” che a Dieç al vignarà ricercjât in ducj i siei aspiets. Se si vûl o sin di ducj un pôc profugos, cui che al scjampe de fan e de vuere, di ogni forme di violence, e al à il dirit di jessi acolt di chei altris fradis. Ma al è profugo ancje cui che al scjampe des propiis responsabilitâts e che al refude di dispartî il so pan.
   Chestis lis motivazions “sociâls” de rassegne di Dieç di chest an, ma naturalmentri a ’nd è ancje une propueste artistiche culturâl, cu la esposizion di oparis di valôr grandon. Une trate sugjestive e rafinade pe raritât de iconografie e pe profonditât e atualitât dai temis tratâts a traviers cuarante cinc oparis pitorichis, dividudis in cinc sezions tematichis e divignints da trente colezions privadis e publichis, italianis e europeanis. Une ocasion straordenarie par amirâ lis oparis maestris di Lorenzo Monaco, Botticelli, (“Adorazion dai Trê rês” rivade dai Uffizi di Florence), Guarino, Pinturicchio, Jordaens e Stomer.
   “Il cûr de mostre di Dieç – al à displeât il curadôr pre Alessio Geretti - al è soredut intai cjâfs d’opare che a rifletin lis diviersis esperiencis umanis. Un al è firmât dal grant flamant Jacob Jordaens. La sô “Sacre famee che e scjampe” datade 1652 (e je la imagjine vuide de mostre) al è un acjadiment ecezionâl. In chel cuadri alì al è dut, fede e art, oms disperâts e gaiarins, passât e presint. Rifletin insiemit graziis ae art, la storie sacre dal viazâ uman. Ducj i viaçs nus cambiin. La mobilitât interiôr e cambie la vite spirituâl e crodi al vûl dî metisi in viaç. Une piture al è un viaç. E môf lis cjossis, fermantti. Cuant che tu stâs fer lis oparis ti disvein intuizions spirituâls e tu deventis cussì vulnerabil aes domandis.
   Viazâ come simbul che nol po sei soprimût dal desideri dal om di cjatâ il sens de esistence, di superâ se stes, di vivi ad in plen imboreçant il cûr a traviers l’art.
   Lis oparis sielzudis intun arc di timp di Cinccent agns, e dividudis in cinc sezions tematichis a metin l’acent su ce che al sucêt dentri l’om in viaç, parcè che alì e sta la clâf de culture ocidentâl antighe e cristiane. In chest timp di grandis migrazions e di Jubileu straordenari, di Dieç, piçul borc di mont de straordenarie vitalitât, al rive ae Europe un messaç spirituâl positîf a traviers l’art.
   La mostre, cemût che si à vût iniment denant trat, e restarà vierte fintremai ai 9 di Otubar cu ven, dal martars ae sabide: 10.00 / 19.00. La domenie invezit des 9.30 aes 19.30. (von zercläre)

Screât il ristaur de "Madone dal Sanc" di Noiarêt

Tualiis di Comelians - Il cuadri de “Madone dal Sanc” di Noiarêt, di resint restaurât graziis a un contribût de Provincie di Udin, al è stât presentât ai fedêi sabide stade, 11 di Jugn inte glesie di San Vicenç di Tualiis. La tele, viere dal 1688, al è un dai tancj ogjets di art realizât intes tieris dal todesc (probabilmentri de Boemie) e po purtâts chenti dai nestris cramârs. Secont une liende, la origjine di cheste venerazion e va indaûr ai 29 di Avrîl dal 1494, cuant che un ciert Zuan Zuccono, jessût de ostarie dal paîs di Vigezzino (Verbanie), alterât par vê pierdût al zûc, al rivà sot sere denant il puartin de glesie di San Maurizi; alì sot vie e jere piturade une imagjine de Madone cul Bambin. Cjapât de fote al ve cûr di tirâ un clap sul çarneli de Virgjine Marie e de feride al scomençà a vignî fûr sanc. Chest meracul al le dilunc fint ai 18 di Mai.
    L’incuintri pe scree, oltri a presentâ i risultâts de vore di restaur, al à ofrît un motîf par cognossi e comprendi la presince dal cult e la sô difusion inte aree centri-europeane. La piture e mostre, dentri un gloriet di stîl tart rinassimentâl, la Madone cul Bambin. In origjin la piture si cjatave dentri vie de glesie di Noiarêt - sdrumade intai agns ’60 - che e dipendeve de parochie di Tualiis, cussì la opare, in considerazion dal so particolâr valôr, e je stade metude dentri intune esposizion metude sù alì dal museu Gortani di Tumieç. (red.)


                                          

Ladins dal Friûl pag.8 - Lui 2016

SCRITÔRS E LIBRIS IN MARILENGHE
Ferruccio Tassin: “Robononis numar tre”
Al è vignût fûr un gnûf mac di contis dal Friûl di Jevât

    E je vignude fûr za fa cualchi mês une racolte di contis scritis di Ferruccio Tassin, e cjapadis dentri tal titul “Robononis numar tre”. In efiets cheste e je la tierce racolte di cheste sorte publicade di Tassin, e chest al da di viodi che i doi libris di prime a àn cognossût un slargjât preseament, si ben che nissun ent public nol à mai sostignût il lavôr dal nestri autôr. Tant a dî che ancje inte concession dai contribûts a sostegn des iniziativis che a promovin la lenghe furlane a ’nd è fîs e fiastris. In chest câs di laudâ e je la editrice “Braitan”, di Hans Kitzmüller, che e à permetût al jessude di cheste preseose racolte di prosis.
    Juste apont, intes notis sul daûr de cuviertine Kitzmüller nus pan: “Chest ‘numar 3’ di Robononis al risierve al letôr atent e ben disponût gnovis e plasints sorpresis su chel ‘piçul mont d’antan’ di Ferruccio Tassin che intai prins doi numars al à bielzà fat tornâ a scuvierzi e rivivi cuntun insperât e straordenari sucès, umanitât e umorisim di une furlanetât storichementri e linguistichementri cetant particolâr, o sei chê dal Friûl austriac e dal sonziac, il furlan cu la “a”. Ve inalore aduncje inmò senetis, batudis, personaçs matarans di paîs piçui e grancj, plevans, contadins, ostîrs, feminis sbilfis, fruts, fantacins e zagos di un teritori che pal autôr al à biografichementri il so centri a Rude, dulà che in chest volum e je in fats dedicade la interie part centrâl.
    “Robononis numar 3” nol ofrìs dut câs dome i consuets simpatics episodis di ‘celebritâts paisanis’ cun vivarose e coinvolzint ironie ma ancje dai vêrs e propis saçs di prose spontanie, rievocative di cierts aspiets e di cierts ambients des ostariis o dal balon o des parochiis e di personalitâts come chê di barba Rafael artist dai dîs di vora.
    Il fat che in chestis prosis no sedi stade doprade la grafie uficiâl nol à culì nuie di polemic ma e je inviulade dome de volontât di une adeguade rapresentazion di une fevelade dialetâl uniche de memorie imagjinative come che e sarès stade tal timp dai fats contâts di cui che al varès volût meti par scrit tal secul passât il contâ di cjossis popolârs in realtât apartignintti dome a une tradizion orâl, ricostruzion aduncje di une grafie popolâr storiche.

    La prime des cuatri sezions che a metin adun che volumut (pp.89), e je dedicade ae mai dismenteade Austrie, la seconde al Visc di confin, la tierce ae Rude dai Tassin apont e, in fin, la cuarte a Romans dal Lusinç e a un torzeonâ pal plui slargjât teritori de Basse. Ancje su chest ‘numar 3’ nol po no sei sotliniât cemût che Ferruccio Tassin al vedi inmò di plui aprofondît e insiorât chel monument ae Basse e ae sô identitât storiche, tirât sù intai doi libris denant, cuntun rinovât at no dome afetuôs e nostalgjic, ma ancje leterari e poetic”.
    Pensant a Ferruccio Tassin e ae sô ativitât di storic, ricercjadôr, scritôr e animadôr culturâl nus ven iniment la Mitteleurope, chê realtât indefinide, co no je une nazion cun confins e dut l’aparât che lu saponte, ma ben invezit un sium, un ideâl. Il sium che suntun teritori a puedin convivi popui diviers tal rispiet des propiis identitâts. L’imperi asburgjic al veve cirût di podê realizâ chest “progjet”, ma lis dinamichis dai nazionalisim dai sengui stâts, massime daspò la balfuerie des vueris napoleonichis, al mandà dut a mont. La vuere grande pierdude po e à puartât il colp mortâl al telâr dulà che al jere intiessût il vieri imperi.
    Ma chê idee no je muarte, anzit plui di cualchidun al à dite che la Europe di vuê, che si cjate intun moment intrigôs di rapuarts tra i stâts associâts, e dovarès fâ riferiment al model mitteleuropean. Ferruccio Tassin al è un di chei che al à simpri crodût in chest, ma soredut che al sta lavorant par chest. Tal so piçul, cui mieçs limitâts che al à. Darest ancje chest so ultin libri al zove se no altri a salvâ la memorie, a recuperâ esemplis, a semenâ convinzions.
    Dal pont di viste leterari, Ferruccio al è un che si fâs lei simpri cun grant plasê, pe sô prose lizere, sclete, cence piniis e cence retoriche. Lis contis po a son une plui sauride di chê altre. In sumis verementri un biel lavôr. Al va purpûr zontât che Tassin, daspò che a son vignûts a mancjâ personaçs come Celso Macor e Ane Bombig, al è restât un dai pôcs che a sta cirint di salvâ la varietât dal furlan e la leterature dal Friûl di Jevât. Un mert in plui par lui che a ’nd à bielzà cetancj.

___________________________________________________________________________________________________________
La schede: F. Tassin, Robononis numar tre, Ed. Braitan, Cormons 2015, pp.89 .
Ladins dal Friûl” Diretôr responsabil : Renzo Balzan - Reg. Tribunâl di Tumieç n. 123 dai 09.03.98
Redazion : 33028 Tierç di Tumieç - V. Dandolo16 / tel. 0433/43696 / e-mail : ladinsdalfriul@gmail.com
F.I.P. (fotocopiât in propi) a Tierç di Tumieç (Ud) V. Dandolo 12 pes Edizions “Union Scritôrs Furlans”.
La publicazion e ven spedide es Bibliotechis dal Friûl, es Istituzions Culturâls Ladinis des provinciis di Bolsan, Trent e Belun, e a ducj chei che a mandin la lôr libare contribuzion doprant il C.C. bancjari nr.19162 dal “Banco di Brescia” (Filiâl di Tumieç) - codiç IBAN: IT50H 03500 64320 0000000 19162
Chest gjornâl inte sô version online si lu cjate tal sît : http://ladinsdalfriul.blogspot.it
Publicât cul sostegn de Provincie di Udin – L.R.24/2006 art.26





Nessun commento:

Posta un commento