venerdì 1 aprile 2016

Anade ( XIX ) n.4 Avrîl 2016
Periodic-mensîl di informazion e culture sul cont de minorance celtiche
dai Ladins de Furlanie. Edizion par cure de associazion “Union Scritôrs Furlans”

3 di Avrîl 2016: la Patrie Furlane e à 939 agns

Un inovâl fondamentâl par podê difindi la nestre identitât

     La valorizazion di une identitât e puarte ae creazion di mîts, che a vegnin vivûts tal presint come se si cuistàs cussience che a sedin stâts simpri cussì, slargjant tal passât fenomens e esperiencis atuâls. Cussì al è, in Friûl, pe “Fieste de Patrie” dai 3 di Avrîl, che a partî dal 1977 (an de sô prime celebrazion par mert di pre Checo Placerean e dai predis di Glesie Furlane) e à cognossût un cressint di valôrs e di significâts, fint a jessi stade “uficializade” come date di nassince dal Stât furlan indipendent. O sei de identitât etniche e linguistiche dal popul furlan, tal contest dal mont european.
   Naturalmentri ducj a son libars di pensâle cemût che a crodin e di proponi ae popolazion vieris e gnûfs modei e ideâi, cundut achel la realtât storiche e à di jessi in ogni câs difindude. Di sigûr il 3 di Avrîl al fo (e vuê al reste inmò un fondamentâl valôr simbolic) impuartant, ma plui pe sô essence istituzionâl che pal rest. Par esempli il Friûl nol vignì al mont in chê ocasion, parcè che al esisteve bielzà: si indi fevelave a partî de fin de ete langobarde (secul VIII) come di une realtât ben specifiche cuntun propi non, che e cjapave dentri il spazi comprendût tra la Livence, la cjadene des Alps, la marine adriatiche e il Timau cul Cjars sore vie. Ancje la lenghe tal 1077 e jere dibot formade e inviade a diferenziâsi in maniere nete rispiet ai lengaçs neu latins confinants. Par altri za in chê volte il teritori al jere ben lontan dal jessi caraterizât da une uniche culture e presince etniche: o savìn che a jerin presintis comunitâts di slâfs avonde consistentis, tant di dâ une olme a interiis valadis, oltri a lassâ testemoneancis ancje in cetancj sîts di planure, a partî de toponomastiche. Ni e mancjave la comunitât todescje, che tra i secui XII e XIII si sarès inmò di plui rinfuarçade.
    Epûr il Patriarcjât di Aquilee al fo fint tal in prin multietnic e multiculturâl. Tâls a forin la diocesi e la provincie eclesiastiche che a puartavin il non di Aquilee, e tâl e fo la istituzion dal podê temporâl che in maniere graduâl si formà a partî dai secui IX e X: il passaç dai podês fat dal imperadôr Indrì IV al patriarcje Sigjieart ai 3 di Avrîl dal 1077 e rivuardave no dome il Friûl, ma purpûr part des regjons dacîs, tra la atuâl Carintie, la Slovenie e la Cravuazie. Dal sigûr cheste istituzion no fo mai un “Stât democratic”, come che lu intindìn de ete de rivoluzion americane e francese a vuê. Dal scomençâ dal secul XII, si ve par altri un Parlament de Patrie dal Friûl, ma i siei membris a vignivin sielzûts tra i rapresentants di fameis cjistielanis, di comunitâts sometudis al patriarcje, di ents eclesiastics maiôrs, di dutis lis comunitâts che a garantivin di podê furnî soldâts al esercit patriarcjin in câs di vuere.
    La classe sorestante, po, e jere nome in part furlane, par vie che e fo intun prin moment rapresentade da une consistent presince todescje, cun sucessive fuarte penetrazion di elements toscans, venits, lombarts e emilians. La maiôr part dai Furlans (contadins, artesans, terenârs, comerciants, bas cleri) e jere escludude di ogni partecipazion al podê, se mai, e gjestive i bens comunâi e lis facendis di paîs a traviers la istituzion de Vicinie; a cjâf de vile, dal rest, an ’nd jere simpri un delegât dal patriarcje, dal vescul, dal cjistielan o di altris sioriis. In conclusion, no vin di cirî resons impropris tal inovâl dai 3 di Avrîl, che al à di jessi motîf di riflession su la nestre storie, su la sô ereditât tal presint, sui problemis di vuê viodûts a traviers un respîr slargjât che al comprendi lis struturis che il passât nus à lassât, tignint ben a ments che il Friûl dai 3 di Avrîl dal 1077 al jere cetant diviers dal Friûl dai 3 di Avrîl dal 2016.
    Juste apont in chest Friûl dal 2016 a ’nd è plui di une reson di jessi preocupâts: pe situazion economiche che e stente a ripiâsi produsin gnove emigrazion, soredut inteletuâl, di zovins furlans laureâts e diplomâts. Pal fenomen de imigrazion che nus viôt simpri plui coinvolts. Pe creazion des disevot cussì clamadis UTI (Unions Teritoriâls Intercomunâls) che a cjaparan il puest des storichis Provinciis di Udin, Gurize e Pordenon, parant pratichementri a fruçons il Friûl Storic e lassantlu cence une propie istituzion rapresentative di riferiment. Pal pericul, simpri presint, de creazion de macro-regjon dal “Triveneto”, une buse nere dulà che il Friûl al è destinât a jessi glotût e a disparî par simpri. In sumis a son moments intrigôs, se no fintremai dal ostie, ma al è di just resisti fint che nus reste la fuarce e la sgrimie. Naturalmentri, bon 3 di Avrîl a ducj... e anìn a bevi un bon tai di pinot grîs, prime che nus partin vie ancje chel come che a àn za fat cul tocai! (tarvos)

3 di Avrîl 1077 / 3 di Avrîl 2016
la nestre Patrie e reste simpri il Friûl!


_____________________________________________________________________________________________


Ladins dal Friûl pag.2 - Avrîl 2016

DAL TIMÂF A LA LIVENCE
Memoreant Michêl Gortani: apuestul de sô tiere
Ma a cincuante agns de sô muart in Cjargne nissun si impense dibot di lui

Tumieç – La Cjargne e sta traviersant un dai moments plui intrigôs de sô storie. La vicende amare de CoopCa e à pesât in maniere cetant negative par tancj aspiets: dopo 110 agns di storie e je stade butade jù une istituzion che e jere stade il svant e l’orgoi de nestre int. Butade jù in maniere malacuarte, cun passaçs e berdeis che a àn avilît ducj. E po il Tribunâl lassât sierâ cence che dibot nissun al protestàs, la pueste che e furnìs un servizi che al fâs dûl, lis scuelis a riscjio un an daûr chel altri, lis casermis sieradis une daûr che altre, biel che si mantegnin e si imponin lis servitût dai poligons di sbâr, par no fevelâ de inacetabil situazion dal sfrutament des aghis de bande di societât forestis, cun grancj vuadagns economics par lôr e grancj dams ambientâi par nô. E si fermìn culì par caritât di patrie. E nissun proteste. Nissun nol olse a alçâ la vôs, biel che i politics (sorestants) a son dome bogns di meti in vore ordins e ordenancis che a rivin di Rome e di Triest. In cheste clime, sureâl, o sin rivâts al pont che al è stât lassât passâ tal cidinôr l’inovâl dai cincuante agns de muart di un dai personaçs plui impuartants de Cjargne dal secul passât: Michêl Gortani. Une cjosse che no po sei perdonade. Une Cjargne cussì e merte di plui e di piês. Par dîle cu la sapience dal mai dismenteât Riedo Pup: i tocjàs “Magari ancje!”.
     La storie di Michêl Gortani e je la storie emblematiche de int cjargnele di une volte. Bontât, semplicitât, gjenerositât a jerin lis dotis di chest om. La stesse sô nassince e risint dal fenomen specific dai cjargnei: al nassè, in fats, ai 16 di Zenâr dal 1883 a Lugo, in Spagne, dulà che so pari, inzegnîr, al jere emigrât par resons di lavôr.
     Michêl Gortani al veve frecuentât i cors universitaris a Bologne, laureantsi a plens vôts in siencis naturâls a dome 20 agns. Mai lauree e fo plui congjeniâl al laureât, il studi de nature e fo la sô grande passion. Dotât di une grande memorie, animât di un zovanîl vivôr che lu sostignì par dute la sô esistence, al abraçà cun passion dut chel che la nature e ofrive. Assistent universitari a Perugie, Bologne, Torin e Pise, a dome 24 agns al otignì la libare docence in gjeologjie, deventant professôr incaricât tal 1913 alì de facoltât di siencis de Universitât di Pise.
      In chê volte al invià ancje une campagne di escursions pal rilevament gjeologjic de Alps Cjargnelis, dulà che al ve come compagn un altri furlan innomenât, Ardito Desio, che lu ricuardave come om sclet e concret. Cundut achel Gortani al è stât un dai cjaminadôrs plui resistents che si sedin cognossûts: il plui dispès solitari par une dibisugne dai infinîts cidinôrs, ereditât spirituâl des cimis che a van cuintri il cîl, di dulà che i orizonts si slungjin inte contemplazion dal imens dal creât.
    Il sclopà de prime vuere mondiâl lu cjate za di cualchi timp inserît inte politiche come deputât dal Colegjo di Tumieç e pôc dopo come volontari inte arme ai alpins, partecip di diviersis azions di vuere insiemit a tancj altris cjargnei e furlans. Nol dismentee par altri che la sô vieste di deputât i impon di impegnâsi pal ben sta dai citadins; e i soldats a son simpri citadins. Si bat inalore, parcè che ai combatents des trinceis ur vegni sigurât dut il necessari e al denuncie ancje lis tantis cjossis che a no van ben, paiant di persone il cûr de sô scletece.
     Finît il conflit, tal 1922 al vinç il concors pe catidre di gjeologjie inte Universitât di Cagliari, par ocupâ subite dopo chê di Pavie, no cence vê lassât tal cjâf lûc de Sardegne une istituzion ben funzionant sul plan sientific e didatic. Tal 1924 al va in fin a ocupâ la catidre di gjeologjie de scuele di Bologne, di dulà che a jessaran professioniscj preparâts, po presints un pôc dapardut ator pal mont, inricjîs di sience e di virtûts morâls e civichis, che lui al savè simpri insedâ a ducj chei che a verin la fortune di jessi siei dissepui.
    A Bologne al reste fint al 1953, an che al le in pension, ma al continuà istès a insegnâ par altris cinc agns come professôr fûr di “ruolo” e in fin inmò come professôr emerit. Si trate, come che si viôt, di uns setante agns di ativitât sientifiche e didatiche. In Gortani in fats l’atacament al lavôr al fo superât dome de salût fisiche, che i permetè di continuâ a studiâ e a insegnâ fint ai ultins agns de sô vite.
 Naturalmentri a forin cetancj i ricognossiments divignûts de sô ativitât di sienziât: academic dai Lincei, des Siencis di Bologne de cuâl al fo president, di chê di Siencis Forestâls; soci corispondent de Academie des Siencis di Torin, dal Istitût Venit di Siencis e Letaris, de Academie di Verone e de mostre di Udin; membri onorari de Geological Society of London, de Societè Geologique de France, de Deutsche Akademie des Naturforscher di Halles, de Geologische Vereingug di Bonn. Al fo president dal Comitât Gjeologjic de Italie, de Societât Gjelogjiche Taliane, Vicepresident dal Consei superiôr des Minieris e dal Istitût talian di Paleontologjie Umane.
   Tal timp de ultime vuere al fo simpri in prime linie par difindi la Cjargne e la sô int, massime tal moment che e rivà la ocupazion todescje e cosache, cuant che robariis, macilis e devastazions a jerin al ordin dal dì e pôcs, come lui juste apont, a vevin il cûr di contrastâ chestis situazions di violence e di injustizie. Une odissee amare cheste che lui al contà intun librut che ducj a varessin di cognossi e di lei: “Il martirio della Carnia” (Stab. Grafic, Tumieç, 1966).
    Finide la vuere lui, che al veve sospendude la ativitât politiche tal timp dal fassisim, al vignì elezût tal 1946 deputât ae Assemblee Costituent pal Colegjo di Udin e Belun e tal 1953 senatôr pal Colegjo di Tumieç. In cheste ultime vieste al cjapà part a une intense ativitât legjislative, soredut cul incaric dal studi e de legjislazion relative ai problemis mineraris, agri-forestâi e dai teritoris plui emargjinâts de mont.
    Al è stât ancje president de Societât filologjiche furlane e, soredut, si è impegnât inte istituzion e fondazion dal Museu Cjargnel des Arts e des Tradizions Popolârs, une Fondazion che inmò vuê, inte sede di Palaç Cjampeis, e conserve lis testemoneancis plui preseosis de civiltât de int de Cjargne, cuntune racolte etnografiche che e je tra lis ricjis e preseadis de Europe, pecjât dome che e sedi masse pôc valorizade cemût che pardabon e mertarès, magari sul esempli di ce che a son daûr a fâ i museus etnografics ladins de Val Badie e de Val di Fasse.
     Ai 26 di Zenâr dal 1966, za fa cincuante agns, dute la Cjargne e jere a Tumieç al so funerâl, testemoneance di agrât e di atacament a un om unic, che al veve spindude dute la sô vite pe sience e pal ben de sô tiere. Dal sigûr il plui grant dal secul passât. Ma vuê dut chest al semee dismenteât. Vuê che plui che mai si à bisugne dal so esempli e dai siei insegnaments dut al reste cidin: juste apont “La Carnia tace”, e Spinotti pal so film-documentari titul plui just nol podeve induvinâ. La Cjargne e tâs e e glot... dismenteant il so om e il so apuestul plui impuartant, Michêl Gortani, che un tratament di cheste sorte no lu varès dabon mertât! (renzo balzan)


_____________________________________________________________________________________________


Ladins dal Friûl pag.3 – Avrîl 2016

CRONICHIS DI CHENTI
Sanitât: sul pont nassite Latisane tradide
Ma la proteste e je tornade a imboreçâsi ancje a Glemone

Latisane – Sanitât: ae fin Latisane e je stade tradide. Ae fin zire e volte il pont nassite dal so ospedâl al è stât sierât e in cheste vicende la figure fate de president de Regjon Serracchiani, e dal assessôr ae Sanitât, Telesca, no je stade par nuie biele. Anzit!
    Simbolic il fat che ai 8 di Març, zornade dedicade ae fieste des feminis, lis feminis di Latisane, parie cui lôr fruts, si sedi presentadis denant dal ospedâl par dî a cui che al comande “tignîsi lis vuestris mimosis”. Une proteste, juste apont, cuintri il decret di sospension de ativitât che al è deventât operatîf ai 11 di Març. Une manifestazion metude in pîts in pocjis oris, dal “Comitât nassi a Latisane”, cul passe peraule, da Facebook e Whatsapp, ae cuâl a àn rispuindût in tancj. Al jere presint ancje il Comitât “I fiocchi sopra le gru”, metût sù di resint a Puart.
   Tra chestis personis e jere tension. Rabie. Preocupazion. Soredut cheste ultime, parcè che nissun al conte ce che al sucedarà intes prossimis setemanis, a feminis che a stan par parturî e a mamis cun fruts di pôcs mês. Intai reparts il personâl al è inderedât, nol sa ce che al à di rispuindi, parcè che i prins a no savê ce che al sucedarà pardabon dopo la firme dal decret di sospension de ativitât dal dipartiment materni infantîl dal ospedâl di Latisane, a son i operadôrs stes.
     Intant si cîr di organizâsi par predisponi une resistence adeguade a chest at, co, a son peraulis dal assessôr Telesca: “La decision politiche definitive no je stade inmò cjapade”. Ma cui si fidial. Cussì si pense di presentâ un ricors al Tar. A esistin ducj i estrems par otignî un pronunciament dal Tribunâl aministratîf regjonâl sul decret di sospension dal pont nassite. Lu sosten il sindic Salvadôr Benigno che al fevele dal decret de direzion gjenerâl come di un “document inderedant” deliberât, ma pense un pôc ce fantasie “par resons di sigurece”. Naturalmentri al sarès interessant savê cuâi che a son stâts i criteris par sospendi la funzionalitât di Latisane e no che di altris struturis. Tra l’altri i parts a Latisane a son stâts in cressite e la ativitât di assistence e cure pediatriche e je simpri superiôr a chê di Palme, dulà che si vûl stralozâ dut. In sumis al è evident che al è alc che nol cuadre.
    O sin ae assurditât plui totâl. A ’nd è dôs feminis in sinte che no san ce fâ e che no san a cui indreçâsi: a Palme o a Latisane? Achì no stin fevelant di une buteghe di scarpis, o stin fevelant di un pont nassite, de tutele e garanzie pes feminis e pai fruts che a àn ducj i dirits di nassi in sigurece. Conclusion: al è di restâ cetant malapaiâts, ancje parcè chest al è daûr a sucedi dome in Friûl, a Triest invezit nissun nol taie mai nuie. A Triest, parametris o no parametris dut al va indenant come simpri. Vadì che, jessi capitâl, cence se e cence ma, al puarte simpri a dai vantaçs, dissal Russo, chel che al bat pîts e mans par meti sù fintremai la “Citât Metropolitane”.
    Malcontent pe politiche sanitarie de Regjon jù pe Basse, ma malcontent ancje inte Furlanie di ’Sore, soredut par chel che al inten l’ospedâl di Glemone. La manifestazion achì si è davuelte domenie, 13 di Març, e par fâ capî che no intindin molâ, gran, si son incjadeâts devant dal ospedâl par protestâ, cu la massime ferbince, cuintri une riforme sanitarie che e penalize une struture sanitarie considerade il miôr che si po cjatâ sot chest aspiet. “Parcè che la Regjon e sta penalizant ducj i piçui centris a disvantaç dai granc – al à vosât fuart il sindic di Glemone, Pauli Urbani. - Parcè a Spilimberc restial ativîf, e operatîf, il pront socors e a Glemone lu sierin?”.
     Incjadenâts insiemit cun Urbani a jerin ancje il president de Provincie di Udin, Pieri Fontanin, il sindic di Latisane Salvadôr Benigni, i conseîrs regjonâi di oposizion Novelli, Zilli Revelant Sergo. E inmò, i sindics di Torean di Cividât, Sabbadini, di Resie, Chinese e Sandruvi di Montenârs.
    E nancje chei di Glemone no intindin molâ. A jerin in sîs cent denant dal ospedâl par protestâ cuintri une riforme sanitarie regjonâl considerade inicue. Inmò une volte, ancje domenie 13, a ’nd è stade grande partecipazion ae manifestazion organizade dal coordinament dai comitâts. In rie, daûr dai trissions di proteste, e jere la int dai comitâts de Alte, ma po ancje chei rivâs dongje di Latisane e di Cividât. La riforme Serracchiani-Telesca e je stade fate buine e si sta procedint a metile in vore, ma lôr a resistin e a continuin a no volêle gloti. I prossims “preocupants” apuntaments: ai 31 di Març il pront socors al è deventât un pont di prin intervent. Il mês di Jugn cu ven si proviôt si la sospension de ativitât dal repart di midisine al San Michêl di Glemone.
    In fin sul palc, il sindic di Glemone, Pauli Urbani, al à vosat: “No pues crodi a chei che a disin che aromai o vin pierdude la bataie: po ben o continuarìn la vuere. Cheste no je une lote cuintri dut e cuintri ducj, parcè che a son ancje des riformis che a puedin lâ ben, ma o disìn cun fuarce no ae sierade dai reparts e dai servizis che a funzionin e che a siervin al teritori. Soredut a un teritori di mont, cui ducj i problemis che chest aspiet, no margjinâl, al compuarte”.
     Ancje il president de Provincie, Fontanin, al è tornât a vê iniment il “câs” di Triest: “A Triest – al à dite – al è plen di ambulancis e di vuardiis medichis: achì, in Friûl, invezit si taie e vonde”. Rivant insom di chestis cronichis su lis batais par une buine salût si po dome dî, cence mandâlis a dî, e sarà in fin la int a decidi cui che al varà pardabon di vergognâsi. (mateu di prun)





Ladins dal Friûl pag.4 – Avrîl 2016

DOCUMENTS
La “Grande Regione del Triveneto”: Uber Alles!
Pe autonomie dal Friûl la situazion e sta deventant simpri plui ingtrigôse

     Cemût che al sarès biel se i politics si metessin a discuti di macroregjon cence tirâ sù bandieris ideologjichis. Ducj, dai leghiscj ai democratics. Ator di une taule no par difindi renditis di posizion e privileçs. Semplicementri, par provâ a rispuindi aes sfidis de modernitât, capî cuâl che al è l’interès vêr dal teritori e dai citadins, individuâ une gnove direzion.
  Un sium proibît? Probabil. Ma la propueste puartade indenant dal jurist Ivone Cacciavillani, dal economist Ferruccio Bresolin e dal sociolic Ulderico Bernardi di inviâ l’iter viers la union di Venit, Trentin-Sûd Tirôl e Friûl- Vignesie Julie come minim al à muessis lis aghis. A coventavin trê fantats dai agns Trente par lançâ une idee che e cjalàs al a vignî.
    La macroregjon dal “Triveneto” e larès ben oltri l’obietîf autonomist cjaval di bataie dal governadôr Luca Zaia e tal stes timp e sarès cualchi cjosse di une vore concret rispiet al disen tant ambiziôs ma dabon astrat de macroregjon alpine. Une autentiche rivoluzion no dome politiche-aministrative, ma soredut culturâl, tal Nordest sclâf di spaltadis, confins e cjampanîi. Par scomençâ, a coventaressin dozenis di deliberazions favorevulis ae union de bande di comuns che a rapresentin un tierç de popolazion interessade, vâl a dî doi milions e 400 mil personis. A chel pont e podarès partî la machine legjislative-burocratiche, fint aes implicazions costituzionâls.
    Il pont al è che la propueste, al di là des complessitâts par rivâ in puart, e larès cjapade une vore sul seri. Se no altri parcè che anticipadorie di une riforme dai assets regjonâi (comprendût il ripensament sui statûts speciâi) che aromai no po sei plui rimandade e complementâr rispiet al insiemit des riformis istituzionâls. Nol è cussì un câs che Toscane, Umbrie e Marchis, trê regjons vuidadis dal centri-çampe, a vebin decidût di movisi esatementri in cheste direzion, individuant ben 78 areis su lis cuâl lavorâ cul fin di verificâ i pro e cuintri de eventuâl
unificazion.
   Ve inalore che, sul cont de macroregjon dal “Triveneto” al varès di valê il stes discors: bisugnarès analizâ e meti su la belance il rapuart coscj-beneficis, in maniere cetant concrete, e in maniere esclusive dal pont di viste dai citadins. Probabilmentri si scuvierzarès che a vuadagnâ, soredut sui timps luncs, no saressin dome i venits, ma ancje cui che al vîf a Trent e Bolzan, a Udin e Triest.
  Resonâ intune otiche di macroregjon al vûl dî pontâ a une mobilitât integrade e sostignibil, scometi suntun sisteme universitari no sminuçât, svilupâ politichis pe inovazion di fuart impat. E mil altris cjossis inmò, sul teren dal lavôr, de sanitât, de difese ambientâl. La union e fâs la fuarce. Ancje sul plan istituzionâl. La competizion internazionâl e sta deventant simpri plui competizion fra areis gjeografichis e economichis: par politics, aministradôrs, classe dirigjente in gjenerâl, alçâ il valôr in zonte, la eficience, la atrative dal propi teritori nol po che jessi il prin obietîf. Si spietin aduncje i prossims pas.
    Luca Zaia e Toni Da Re, gnûf segretari de Liga Veneta, volarano almancul par un atim, almancul par un atim, meti de bande i proclamis autonomiscj e i continuis scuintris cul guvier par lâ a font su la macroregjon, ipotesi che in sostance e ripie l’antîc sium di un pari fondadôr come Gianfranco Miglio? E su la spuinde dal centri-çampe, la furlane Debora Serracchiani e il trentin Ugo Rossi larano daûr de strade vierte dal Enrico Rossi president de Toscane, o pûr continuarano a difindi a spade tindude la specialitât (in concret i privileçs) des lôr provinciis e regjons? Forsit e sarès ore di smetile cu la vuere dai confins e dai bêçs. Il Nordest al à di pensâ in grant. (sandro mangiaterra – test tirât fûr dal “Corriere della Sera” (insert “Corriere del Veneto”) dai 9 di Fevrâr dal 2016, e voltât par cure de redazion).
________________________________________________________________________________________________________________________________________________
Lis baronadis di Renzo Tondo su la macroregjon dal Nordest

   Declarazions e resonaments di cheste sorte no sai saressin mai spietâts. Al è evident che o sin in presince veris e propis baronadis. Achì aromai no si rive plui a vualmâ il dret e il ledrôs. Si capìs dome che pal Friûl i timps si stan fasint simpri plui dûrs. Che la sô autonomie e la sô identitât a stan deventant simpri plui balarinis.
    Provait, par crodi, a lei il toc che o publichin culì sot vie. E je une note publicade sul “Messaggero Veneto” dai 13 di Març stât, che la nestre redazion e à voltât par furlan.

   “Sì ae costituzion de macroregjon trivenite, ma bisugne fâ cetante atenzion ae governace dal pussibil gnûf ent se no si riscjie di brusâ la iniziative”. Lu à dite il cjâf grup di Autonomie responsabil in Regjon – e ex governadôr dal Friûl-Vignesie Julie -, Renzo Tondo, rispuindint a un invît in chest sens proponût dal responsabil Alef (Associazion Libars e Fuarts) dal Venit, Ettore Bonalberti, intervignint a un incuintri organizât da “Trieste al centro d’Europa”. Un percors in chest sens, al è stât displeât dilunc l’incuintri, al è bielzà stât delineât intai detais: votâ no al referendum su la riforme costituzionâl, cuintri lis indicazions dal guvier, e po inviâ une consultazion tra almancul il 30 par cent dai conseis comunâi interessâts, par proponi un referendum popolâr su la costituzion de macroregjon stesse a Nordest.
    In chest sens Tondo al à indicât che al coventarà coinvolzi il teritori. Tondo al à ancje sotliniât la “difese de specialitât e de autonomie” des regjons a statût speciâl e, in particolâr, dal Friûl-Vignesie Julie. Bonalberti al à dadis sigurecis sun chest cont precisant che “l’intenzion no je chê di gjavâ specialitât aes Regjons, ma al contrari, di fâ sì che dutis lis Regjons coinvolzudis inte iniziative a vebin la stesse specialitât”.
    La macroregjon dal Triveneto e sarès creade metint insiemit Friûl-Vignesie Julie, Trentint-Sud Tirôl e Venit, realizant une gnove realtât istituzionâl metude adun di 7,5 milions di personis che e sarès in podê di produsi complessivementri, stant ai ultins numars a disposizion, une ricjece nazionâl pari a 12,5 par cent dal intîr Prodot interni lort talian.





Ladins dal Friûl pag.5 – Avrîl 2016

JOSEF MARCHET: I GRANCJ OMS DAL FRIÛL
Il cont Jacum di Purcie: umanist fûr dai prejudizis dal so timp
Intai siei libris o cjatìn dai pas significants su la storie dal Friûl
    Tra i umaniscj furlans che a verin une cierte innomine inte “Patrie” e fûr, a cjaval di doi secui, al merte di jessi ricuardât ancje il cont Jacum di Purcie. Verementri la sô figure si presente, a traviers i pôcs dâts biografics e a traviers i siei scrits, singolarmentri diviers par intonazion e argoments, un pôc fuscade e incierte. In ogni mût par une particolaritât almancul al riclame il nestri interès: par vie che al è stât il prin, tra i cjistielans dal Friûl, di antighe e libare nobiltât, che, insoferent ae inerzie dulà che, lis mudadis condizions politichis de Furlanie di une bande e di chê altre i prejudizis di caste, al vebi cirût tal studi e inte culture une reson par un vivi in maniere divierse.
    Chê dai conts di Purcie (e siôrs di Brugnere cun jurisdizion sun uns trente vilis dai contors) e jere une tra lis plui antighis e potentis fameis feudâls dal Friûl, di origjine no ministeriâl, presint tal Parlament de Patrie dal Friûl, dulà che e veve la prime vôs tal ordin dai Cjistielans. Cui siôrs di Prate (cui cuâi a jerin in parintât), e cun chei di Spilimberc e di Pulcinì, i conts di Purcie a jerin stâts fedêi ae part ghibeline e po a vevin resistût in maniere dure cuintri la invasion dal Friûl de bande di Vignesie: un ram de lôr famee si fasè laudâ, pe sô potence e pe ardince, inte daprûf Carintie, dulà che verin un impuartant ricognossiment nobiliâr: e la citadele di Spittal su la Drave e va inmò braurose par un lôr magnific palaç.
    Jacum, prin fi dal cont Artic e de nobil femine Francescje Padovani di Colorêt, al nassè tal cjistiel di Purcie tal an 1462. Cuarante agns daspò, circje, di cuant che il so von, di non Artic ancje lui, al scugnì rindisi, daspò vê resistût in maniere acanide, ai mercenaris di Vignesie. Destinât ae aministrazion e al guvier dai feuts, e forsit ancje un pôc baron par nature, al cressè dedicantsi ai zûcs, ae cjace, ai esercizis des sfidis tra i cavalîrs. Dome plui tart si pleà o si lassà cjapâ dal amôr pai studis e al frecuentà, a Pordenon, par doi agns lis lezions di Francesco da Motta: po a Vignesie al imparà gramatiche e retoriche ae scuele di Benedetto da Legnano. A disenûf agns – secont il Liruti, che al tire fûr chescj dâts di une letare dal stes Jacum – al pierdè il pari e si cjatà a cjapâ in man la direzion de cjase; une incombence che dut câs nol puartà indenant a dilunc e che al ve miei lassâ intes mans di sô mari. Tal 1486 al maridà la cusine Cecilie, che e murì un an daspò, forsit tal parturî il fi Indrì. Tal 1496 al clamà a Purcie, parcè che i fasès scuele, l’umanist di Bressie di Milan Bartolomeo Uranio e indi scoltà lis sôs lezions di filosofie e di elocuence. Tal 1505 al le a Padue dulà che si dedicà al studis di plusôrs dissiplinis: lu fasè par altri cence costance e cence precîs orientaments. Cundut achel tal 1509 al rivà a cuistâ la lauree in jurisprudence.
    Chel 1505 al fo par altri un an di significants aveniments par lui: e murì sô mari e, par conseguence, al scugnì tornâ a cjapâ in man la aministrazion dai afârs di famee; al tornà a maridâsi, ma no si sa cun cui ma dome che al ve altris trê fîs; in fin; jessint sclopade la vuere tra Vignesie e l’imperadôr Massimilian (la vuere de Leghe di Cambrai) lui, come cont maiorent di une famee feudâl, al fo clamât al comant des Cernidis di dut il teritori dal Friûl di là de aghe, mentri di ca dal Taiament, tal Friûl di Jevât, chestis a jerin ai ordins dal malfamât Antoni di Savorgnan. I biografs no nus contis ce che al podê fâ cun soldâts di chê fate in chê lungje e sanganose vuere. Ma chê esperience militâr i fasè vignî la idee di meti jù un tratât “De re milirari” in doi libris, che al podè publicâ plui tart.
    Finide la vuere, il cont Jacum si ritirà a Purcie e al vivè in maniere trancuile, fasint il siôr di campagne, coltivant studis sacris e profans, dedicantsi ae cjace, sô viere passion, invidant tal so cjistiel amîs e leterâts e mostrantsi cun lôr un ospit splendit, tignintsi in frecuentis relazions epistolârs cui leterâts dal timp, protezint, conseant e sostignint i studiôs furlans, scrivint lui istès opuscui di diviers gjenar.
Al murì a Purcie tal 1538 e al fo sepulît inte locâl glesie dai Servîts.
    A scrivi, il cont Jacum al scomençà ad ore: il so prin lavôr, dedicât al patrizi venit Sebastiano Priuli, al devi jessi stât componût prime dal 1485, parcè inte dediche no si à iniment ae nomine di arcivescul di Cipro che, juste apont tal 1485, i vignì conferide al Priuli. Tal 1492 al fo stampât a Trevîs, da Gjerart di Flandrie, un so tratât di pedagogjie che al è tra i prins libris vignûts fûr a stampe inte Tiereferme venite: “Jacobi comitis Purliliarum de generosa liberorum educatione opusculum non minus jocandissimum quam utilissimum”.
    Ma la plui interessante fra lis sôs oparis publicadis e je une racolte di letaris, di lui scritis intai ultins agns dal Cuatricent a princips e leterâts contemporanis, soredut venits e furlans – ma ancje al imperadôr Massimilian, al Pontano, al Filarete, e v.i. - su argoments leteraris o di erudizion o di religjon. A puartin il titul “Opus Jacobi comitis Putliliarum epistolarum familiarium”, cence la indicazion dal timp ni dal stampadôr, ma che a semein publicadis intai prins agns dal Cinccent.
   Cul titul: “Due invasioni dei Turchi narrate dal Co: Jacopo da Porcia” a forin stampats a Udin dal Vendrame, tal 1851, su copie tirade fûr dal Liruti, i doi opuscui: “De recenti Forojuliensium clade anni 1499, Kal. Oct.” e, “De veteri Forojuliensium clade, 1477 prid. Kal. Nov.”, che a son lis cronichis di ce che il Purcie al viodè o al savè di testemonis direts circje la prime e la ultime incursion dai Turcs in Friûl. A ’nd è, in fin, une letare dal cont Jacum in laut dal “Commentarii Aquilejenses” di G.B. Candido, stampade ae fin di chê opare (Vignesie, 1521).
   Umanist, storic, biograf, pedagogjist, moralist, scritôr di art militâr, di cjace, di letaris erudidis e discors assetics e, menadôr di malindadis ordenancis, o cjistielan cun pretesis di santolance leterarie, il cont Jacum di Purcie si presente cussì come om masse multiform par jessi capît ad in plen, masse dispersîf par jessi profont, par rivâ a cuistâ une vere fisionomie. Cundut achel al incjarne, inte sô bondante produzion, un moment e un aspiet une vore interessant de nestre culture, tal moment che e cirive di metisi al pas cun chê dal Rinassiment talian. (Josef Marchet – teste tirât fûr da “Il Friuli: uomini e tempi”) - ridusût e voltât par furlan par cure de redazion)





Ladins dal Friûl pag.6 – Avrîl 2016

DAI FATS E DE CULTURE
DES TIERIS LADINIS

Medaie al merit a Rut Bernardi dal Land dal Tirôl

L'impuartant ricognossiment consegnât di resint a Dispruch

St. Ulrich / Urtijëi (Bz) – Di resint a Dispruch / Innsbruck, cjâf lûc dal Land Tirôl, si è davuelte la cerimonie pe consegne di une medaie di aur al merit, pe sô ativitât di scritore e poete in lenghe ladine, oltri che di animadore culturâl, a Rut Bernardi, zovine autore cognossude e preseade ancje in Furlanie. E cognòs in fats une vore ben la nestre leterature, dal sigûr plui di tancj presumûts “critics leteraris” di chenti. E po achì di nô cumò a van plui di mode i fumets, o pûr la cussì clamade conte curte, che di leterari no si rive dabon a imagjinâ ce che e po vê. Cundut achel lis gnovis politichis pe promozion dal furlan a son chestis e al è dibat discuti.
    Rut Bernardi, nassude tal 1962 a St. Ulrich / Urtijëi in Val Gardene, di lenghe mari ladine, e à studiat Romanistiche a Innsbruck, po trê agns al progjet linguistic “Handbuch des Rätoromanischen” ae Universitât di Zurì (CH). E à insegnât lenghe ladine a Urtijëi, e po intes universitâts di Zurì, Innsbruck, Munic di Bavarie e Bressanon / Brixen (sede distacade de Universitât Libare di Bolzan). E fâs part de Comission ladine pal esam di trilinguisim dal Sud Tirôl. E à inmò colaborât ae realizazion di trasmissions culturâls pe radio e la television de Rai-TV-Ladine. Par esempli, dal 1997 al 2009, ogni sabide e à curât une trasmission di un cuart di ore titulade “L liber – da piz a cianton” (“Il libri – in lunc e in larc”). Impuartante ancje la sô colaborazion al progjet linguistic SPELL pal svilup dal ladin scrit unificât. E po traduzions e cors di ladin-gardenês. Dal 2000 gjornaliste publiciste. Tal 2004 e à vût il premi “Förderpreis Walther von der Vogelweide” dal “Sudtiroler Kulturinstitut” a Bolzan. Tal 2003 e 2004 e à vût un sostegn economic par vivi e lavorâ a Viene de bande de “Österreichisches Bundesministerium für Bildung Wissenschaft und Kultur”. Dal 2009 e lavore al progjet sientific alì de Universitât Libare di Bolzan pe redazion di une “Storie de leterature ladine”. Cumò e vîf a Klausen.
   Cemût che o vin vût iniment denant trat Rut Bernardi e colabore cul progjet di elaborazion linguistiche SPELL, ma e je ancje autore di un interessant dialic a sfont linguistic tra la personificazion dal rumantsch-grijun e dal ladin dolomitan. Oltri a chest interès di nature professionâl pal mieç linguistic intes diviersis implicazions, e je ancje cetant impegnade sul teren des rivendicazions dai dirits des feminis.
   Il risultât dal scuintri tra il scjars vigôr di une societât maschiliste in maniere fondamentâl e la ricercje di une corispondence fisiche e spirituâl cuntune anime zimule al è sintetizât, juste apont, tal romanç curt “Lëtres te n fol” dulà che, zovantsi dal mieç naratîf di un diari tornat a cjatâ e partant de “Rahmenerzählung”, si torne a percori la peraule dissindint di une vite sui ôrs, tal volût e eroic cidinôr de protagoniste che e devente il simbul plui evident dal refût di une facil integrazion inte norme prestabilide. Il romanç, vadì, si presente cussì come dividût in diviers episodis, cjadençâts des diviersis notis e letaris, cussì che si indi rigjave un insiemit fragmentari. Il lengaç al risulte net, sclet, essenziâl e a voltis schematic, contribuint a incressi la sensazion di fastidi intun letôr masse usât al lâ dilunc melodic di une lenghe ricercjade, artistiche. Lis dissonancis e la tindince ae plene esposizion dai sintiments plui personâi a fasin di cheste opare un event dabon gnûf pe leterature ladine contemporanie.
    Lis poesiis di Rut Bernardi a son invezit dispès dai costruts semantics o dai zûcs di peraulis, a voltis ironics, a voltis di acuse, dulà che si esprim cheste origjinâl margjinalitât, oltri al za vût iniment gust pe scomposizion o la cumbinazion linguistiche che la svicine, par plui aspiet, ae “poesie concrete” de scuele di Viene.
    E à scrit oparis leterariis, pal teatri, contis e poesiis par ladin, talian e todesc. Lis sôs publicazions di caratar sientific, tra l’altri, a comprendin dizionaris e manuâi. Di segnalâ soredut: “Lëtres te n fol” (1996), “Ladin defin. In drei Akten” (2003), “Nëus jon cun la ferade. 6 stories crimineles” (2002), “Dolomiti. Ein Gipfelbuch” (poesiis par ladin/talian/todesc – 2007), insiemit cun Paul Videsott “ Geschichte der ladinischen Literatur” (2013).
   Par chest impuartant ricognossiment a Rut Bernardi o zontin naturalmentri i compliments de redazion di “Ladins dal Friûl”. (edelweiß)

E torne la “Trienala Ladina”

San Martin de Tor / St. Martin in Thurn (Bz) – E torne la “Trienala Ladina”, rassegne artistiche organizade inte cente des ativitâts davueltis dal Museum Ladin di San Martin de Tor, in Val Badie. Lis iscrizions si son sieradis ai 8 di Març stât. Cumò si sta bielzà lavorant par organizâ la viertidure, che si la fasarà ai 9 di Setembar cu ven, naturalmentri inte sede dal Museum Ladin Ciastiel de Tor. La rassegne po e larà dilunc a restâ vierte fintremai al mês di Jugn dal 2017, colegade a dute une rieste di events.
    La “Trienala Ladina” e à la smire di valorizà e sostignî la ativitât des artistis e dai artiscj des valadis ladinis dolomitanis, deventant une grande oportunitât par fâ cognossi a un public simpri plui slargjât, ancje di no ladins, lis lôr oparis e lis lôr iniziativis artistichis. In sumis un alc che al merte.




,


Ladins dal Friûl pag.7 - Avrîl 2016 

INTAI PRÂTS DE CULTURE FURLANE
Jacum Segalla: fotograf de Val dal Incjaroi
Publicât il so preseôs libri “Intun bati di cèas”

Paulâr – Al jere un timp dulà che la fotografie e deventave un rît almancul straneôs. Cussì il ritrat si traduseve intune sorte di acjadiment meditât sedi dal fotograf stes, che al veve di fâ une rieste di calcui (lûs, pose, distancis) sedi di cui che al veve ordenât il lavôr, che si preparave al moment di consegnâ ae storie personâl e familiâr, chel che al veve di rapresentâ al miei se stes e il propi mont. Da chest vicendevul “strieç” al vignive fûr un document bon di contâ la veretât di un om, di une femine, di un grup sociâl (come i scuelârs cui lôr mestris, e lis assembleis di cualchi cooperative, o il grup di personis che e sunave intune bande par esempli) scrutinant su musis scuasit simpri smaraveadis.
    In efiets al capite ogni tant di cjatâ ator pai nestris paîs, dilunc une fieste, o une sagre, cualchi passionât cultôr che si inzegne a doprâ chês sortis di fotocjamaris, di chês che si viodin aromai nome intai cines sul scomençâ dal Nûfcent. Il consei in chest câs al è di metisi cun pazience in pose in spiete che su chê lastre il procediment chimic al puarti a produsi dai risultâts sorprendents. Dibot magjics. O vedarês un ritrat dabon origjinâl, che al suaze ce che o vês dentris cence nancje savêlu. Potence di une art misteriose, che e veve sparniçât tancj valents fotografs un pôc dapardut, sedi intes citâts che intai paîs, ancje chei plui lontans e fûr di man. Cussì a traviers la lôr opare, recuperade e catalogade dai circui di passionâts, o podìn savê moltis cjossis de nestre storie, su ce che o jerin e su ce che o sin deventâts. Une sorte di ricercje archeologjiche che e je stade buine di puartâ ae lûs detais e soluzions di consegnâ ae curiositât sì, ma ancje al ricuart di ciertis situazions che no si li podaressin mai rivâ a induvinât. Baste pensâ sun chest cont aes testemoneancis fotografichis dai acjadiments de prime Vuere Grande, buinis di contâ plui di ogni pussibil peraule.
    Un di chescj personaçs al è stât Jacum Segalla di Paulâr, un fotograf nassût za fa un secul, ai 15 di Setembar dal 1915, e muart tal 1990, che par scuasit setante agns al è stât un atent e scrupulôs “cronist” di dut che che al sucedeve tal Cjanâl dal Incjaroi, inte Cjargne di ’Sore, une val sverdeant che cumò e à tornât a cjatâ graziis a lui une anime, o miei la sô plui sclete identitât. Un sens di apartignince a un teritori e ai siei personaçs. Inviât inmò di zovin a fâ pratiche inte buteghe dal fotograf Josef Di Piazza, origjinari di Comelians e cuntun studi a Glemone, il fantat al imparà in curt e a 17 agns al tornà tal so paîs dulà che so pari i costruì, dongje de cjase di famee, un laboratori inviant in cheste maniere une ativitât lade po indenant tal timp, a conferme che ancje lis piçulis realtâts come chestis, cuant che a cjatin il “contestoriis” just (che al sedi un poete, un scritôr, un pitôr, un artesan artist e, juste apont, un fotograf di gale) a son buinis di creâ, e meti in vore, vicendis di valôr, sot ogni aspiet.

   La opare di Segalla e scugnì jessi metude de bande dilunc la seconde vuere mondiâl, cuant che al vignì mandât a bati al front. Tornât a cjase la cjatà mieze sdrumade dai todescs. Al tornà a partî di alì, seondât de femine Erneste e po dai fîs Zuan Batiste e Luigjine, che cun passion a àn continuât a puartâ indenant la ativitât. Al pas cui timps, Jacum al metè sù altris iniziativis, come la produzion di cartulinis pai turiscj, che a rivuardavin sedi la Val di Paulâr che il rest de Cjargne. A chel il timp, inmò, che lis e-mail no esistevin e la comunicazion tra lis personis e vignive fate par pueste, la storie di une famee e jere cjapade dentri intun pugn di imagjinis di meti in mostre in cusine, o pûr, par cui che lu veve, tal tinel. Fotografiis di maridaçs, cui vielis di famee, cui pups a pene puartâts a batiâ in glesie. O ben senis di lavôr, su lis monts, a fâ il fen, a puartâ la cjame come lis farinariis, a preparâ lis lissis par podê discjamâ a val il legnam taiât intai boscs in cuote. Episodis insolitis, forsit di no rivâju a crodi, par cui che al vîf inte ete di cumò, dulà che si fasin miârs di fotos e di imagjinis cun ogni sorte di imprest ma che ae fin nol reste dibot nuie di conservâ par rivâ a savê cui che o sin e cui che o jerin.
    A chest “artist de imagjine”, a Jacum Segalla al è stât dedicât un altri biel libri, curât di Egjidio Screm e publicat dal editôr Dree Moro di Tumieç. Si titule, in maniere dabon poetiche, “Intun bati di cèas” (pp.207), che al sta a significâ il marilamp de sierade dal oturatôr dal obietîf fotografic. Al ven fûr, a 25 agns di un altri volum, juste apont tal inovâl dal centenari de nassince dal artist, cul sostegn dal Comun di Paulâr inte cente dai programs pe promozion dal eco-museu “I Mistîrs”, induvinade iniziative che di bessole a val une visite tal Cjanâl dal Incjaroi, zone di vivarosis sugjestions artistichis, che il libri di Segalla al rive a testemoneâ dabon al miei.
Al merte in fin ricuardât che il volum al cjape dentri purpûr dai curts saçs che a son opare, oltri che dal curadôr Egjidio Screm, di Josef Bergamini, Bruno Canciani, Denis Baron, Elise Candussio, Moreno De Toni, Cristine Di Gleria, Claudio Lorenzini, Zuan Pauli Gri, Pieri Piussi, Adriane Stroli e Dino Zanier. (von zercläre)
_______________________________________________________________________________
La 37e edizion dal “Premi Leterari San Simon”

Codroip - Il Comun di Codroip, in colaborazion cu la Arlef, la Societât filologjiche, L’Istitût Pre Checo Placerean e lis associazion La Grame e i Colonos, al à bandît il concors par assegnâ il Premi Leterari in lenghe furlane “San Simon”, 37e edizion, dedicât ae memorie dal poete e scritôr Agnul M. Pitane, par un romanç o par une racolte di contis, e al invie, tacant di cheste edizion, une sezion dal Premi dedicade ae conte cu la tecniche dal fumet, soredut cul fin di coinvolzi i zovin autôrs.
    Dutis lis oparis presentadis a concors a varan di sei coretis, definitivis e prontis pe stampe, cuntune fotografie dal autôr, un curriculum dal stes e une propueste grafiche eventuâl pe cuviertine. Lis oparis a varan di sei segnadis, tant che detule, cul titul dal lavôr stes. Non e cognon e direzion si varà di metiju intune buste sierade in zonte dai tescj/fumets; parsore de buste al varà di sei scrit il titul/la detule. Dut al varà di rivâ dentri lis oris 12.00 di joibe 30 di Jugn dal 2016 alì dal Ufici Protocol dal Comun di Codroip. La buste e varà di sei sierade e cu la scrite “Di no vierzi - Premi Leterari San Simon 2016”. Par ogni altre informazion si po indreçâsi al Sportel pe lenghe furlane, alì de Biblioteche di Codroip, telefon 0432/908198.





Ladins dal Friûl pag.8 – Avrîl 2016


SCRITÔRS E LIBRIS IN MARILENGHE
Pre Antoni Beline: “letaris protestantis”
Publicade la prime racolte di letaris dal archivi di pre Toni

     Pre Antoni Beline al è vignût a mancjâ ai 23 di Avrîl dal 2007: a son passâts bielzà nûf agns e la sô mancjance e pese simpri cetant. Anzit simpri di plui in chest Friûl cjapât inte sorte di confusie di ideis, sul plan politic, sun chel sociâl e soredut sun chel culturâl. Baste viodi la vicende di Sapade/Plodn. Cualchidun no si sarà acuart ma o stin deventant simpri plui sotans sot l’aspiet culturâl, naturalmentri dai assessôrs regjonâi (cu la deleghe ae culture) che a messedin la polente a Triest. I ultins compuartaments di Torrenti po, a son alc che nol po sei acetât, a son di une arogance inteletuâl intai rivuarts dal Friûl che e fâs vignî i sgrisui. Cu la scuse che nus molin cuatri palanchis pal sostegn dal furlan nus fasin gloti di dut e di plui, cence un dret, cence un fin, cence une dignitât e une decence. No si po rindisi a vivulâ, bisugne scombati par vivi come che Diu comande. Bisugne vivi cu la schene drete, cence pôris, pratindint ce che nus spiet par dirit, par leç, par justizie di popul degn di chest non. Pre Antoni Beline, tal inspirânus chescj pinsîrs, nus è stât maestri, un maestri che no podarìn mai dismenteâ. Un maestri di gale che o vin vude la grande fortune di cognossi e di frecuentâ.
    Di Pre Antoni za mês indaûr al è stât publicât un altri libri, “Letaris 1” (pp.248 / Litostampa – Pasian di Prât 2015), che al cjape dentri la prime part des letaris presints tal so archivi personâl. Al è stampât inmò par cure di Glesie Furlane tal agâr dal progjet “Risultivis – Opera Omnia”. Naturalmentri al è dibant spindi peraulis di maniere pe sô recension, miôr lassâ la peraule a pre Toni, cjapantle juste apont di chestis letaris. No coventin zontis, lui al dîs dut e ben. Nô o varessin dome di meti in pratiche ce che lui nus insegne.

    “Siôr Santul, pre Guido Genero, segretari dal C. di Past. Liturgjiche – Udin – Siôr Santul, mi è rivade la tô seconde letare che tu mi invidis a dâ une man pe traduzion dai libris de liturgjie romane. Tu sês in plene reson cuant che tu ti lamentis che no ti ai rispuindût. Se no altri par creance o varès vût di dî alc. Dome che la letare e jere masse cjalcjade e alore, par no impiâ simpri fûcs, o ai vût ’nant stâ cidin.
     Ma nol è che mi interessi. No mi va. Un centri di pastorâl liturgjiche, nol è par voltâ par furlan rituâi che a doprin a Rome. Si po tignî cont, se tu vûs, di chei, ma voaltris o vês di cirî di sboreâ fûr ducj chei “segns” che chi di nô a àn un significât e a nus disin alc. Po dopo, pe part “sacramentâl”, si po ancje doprâ une formule vignude di Rome. Ma prime sgarfin chi di nô. Se no ce liturgjie dal ostie ise? Là isal il popul, che al invente i siei mûts di santificâ i moments plui grancj de vite? Duncje, prime di voltâ la robe di chei altris, cirìn la nestre e chest al è il vuestri compit. Se no o podês lâ a trai.
     La stesse robe e val pal furlan. No nus dîs un lafè nuie un rituâl par furlan se nol è furlan. Se e je robe foreste, e po stâ ancje inte lenghe foreste. Mi ven il scrupul che par voaltris il furlan al sedi une rogne di glotile par fuarce, ma no par convinzion. Baste viodi la capele dal Messâl, che lu stampin sicu “test di dutrine”. Sino mats? Alore vino di fâ dutrine sul messâl, par stâ in logjiche? Nol è just che une cumission (o lis cumissions, che a ’nd è un slac) si pastrocji di furlan dome par no lâ a cirîsi intrics cui “contestadôrs”, “chei che a voressin dut furlan” “chei che no son mai contents” e vie.
    Fintremai che no si viodarà plui cunvinzion inte vuestre conversion, nus tocjarà lâ indenant par con nestri. Po dopo si podarà ancje tornâ a ripiâ la glagn. Mandi. ((26 di Avost dal 1979, pre Antoni Beline, plevan)

    Al Vescul Battisti bons. Alfredo – Udin - Siôr Santul, fra pôcs dîs, ai 25 di chest, a saran za trê agns che lui al è cun nô. Intal aniversari de sô consacrazion – inviestidure – incoronazion, crocifission, mi permet di mandâi il gno pinsîr plen di afiet e di stime e, se al acete, ancje di amicizie. Se Diu vûl, cul timp si cognossarìn simpri miei e si darìn une man come fradis pal ben di cheste nestre Glesie furlane che e je deventade ancje la Sô Glesie sperìn par dute la vite.
   A contin i libris che i vuerîrs di une volte, cuant che a lavin a diliberâ cualchi presonîr o a concuistâ alc di grant, a sintivin mil vôs che a cirivin di fâur pôre e di fermâju. Ma lôr a son lâts indenant istès!
   Tal vanzeli si lei che Gjesù i domandà al vuarp di Betsaide: “Viodistu alc?” E chel, viergint i vôi, al disè: “O viôt la int come lens che a cjaminin”. Alore Gjesù i metè une altre volte lis mans parsore dai vôi e chel al scomençâ a viodi ben. Al viodeve dut clâr (Marc 8, 23 – 25).
    Nissun profete, a prin colp, al viôt clâr, però plui al va indenant e plui il Signôr i fâs viodi. Se si ferme o se al torne indaûr, nol viôt nuie. Se al va indenant, prime al viodarà la int come lens ma po al sarà inceât de Lûs. “O salvarês lis vuestris animis cul tignî dûr (Luche 21, 19).
    Che il Signôr Lu incolmi de sô pas e de sô gracie e che lu conservi. Mandi. (Plêf di San Martin Rualp e Val, 16 di Fevrâr dal 1976 – pre Antoni Beline, plevan)
In sumis al è cetant un biel lei parcè che chestis “letaris protestantis” a son dabon regâl une vore preseôs .

La schede: A. Beline, “Letaris – 1”, Ed. Glesie Furlane – Risultivis, Pasian di Prât 2015, pp.248 .
Ladins dal Friûl” Diretôr responsabil : Renzo Balzan - Reg. Tribunâl di Tumieç n. 123 dai 09.03.98Redazion : 33028 Tierç di Tumieç - V. Dandolo16 / tel. 0433/43696 / e-mail : ladinsdalfriul@gmail.com
F.I.P. (fotocopiât in propi) a Tierç di Tumieç (Ud) V. Dandolo 12 pes Edizions “Union Scritôrs Furlans”.
La publicazion e ven spedide es Bibliotechis dal Friûl, es Istituzions Culturâls Ladinis des provinciis di Bolsan, Trent e Belun, e a ducj chei che a mandin la lôr libare contribuzion doprant il C.C. bancjari nr.19162 dal “Banco di Brescia” (Filiâl di Tumieç) - codiç IBAN: IT50H 03500 64320 0000000 19162
Chest gjornâl inte sô version online si lu cjate tal sît : http://ladinsdalfriul.blogspot.it